Qaỹeʼeguen ra lpiʼiỹaxac

So Abrahán ỹapaxaguenec so llalec Isaac ra ỹauotec ñi Jehová taq ra piʼiỹa na ỹachaxanapecpi. So iviʼi 25 viʼiyel ra nachaalataxac so Isaac nache ñi Jehová huoʼo so iỹaxanot so Abrahán ra ỹoʼot ỹataqta qalaqaic. ¿Auaỹaten négueʼt so ỹaxanot?

Ñi Dios ʼenapega so Abrahán: «Auacona ñi ʼoonolec aỹalec nache aỹem aỹanot auotaʼa ra arachetaqtaxanacte huaña aca qasoxonaxa ye ʼalhua Moria». So Abrahán saỹaỹaten táʼaencoʼ ñi Jehová iỹaxanot reʼera qalaxaye so maye ỹalaxaguet.

So nteʼetom so lỹa naʼaq, so Abrahán lỹatac so Isaac taq soua dos lamaxashe nqona ye Moria. Qaq coʼollaq iviʼira tres naʼaxaʼate so ñaq qoỹocta nache soua mashe ỹalletaʼa aso qasoxonaxa. So Abrahán ʼenapega soua lamaxashe ra noʼonañi iuataʼaguet chaʼaye so maye taq so Isaac ỹoʼot so lachetaqtaxanaxat. Nache so Abrahán ỹache so lainonec taq ỹami so llalec so qoipaqpi maye lalonaxat ra ỹachetac. So Isaac inat so ltaʼa ʼeeta: «¿Chaq huague ca huetaʼague ca animal ra savigaxataq yaqtoʼ qarachetaqtaxanaxat? So Abrahán ỹasateguet: «ʼAm ỹalqolec, ñi Jehová maiche qomiʼ ỹanem».

Qaq coʼollaq iviraʼa aso qasoxonaxa nache soua maye ỹoʼot aso lcaʼatoxonaxalate. So Abrahán iqoñerat naua lhuaxaye taq naua lapiaʼate so llalec Isaac nache ỹasaxalec aso lcaʼatoxonaxalate.

So Abrahán ỹacona so lainonec. Qalaxaye so ivitaʼa so laloqo ra ỹoʼot reʼera nache so ángel ñi Jehová chemqot na piguem ʼeeta: «¡Abrahán! ¡Saishet qome ra huoʼo ca qonac na nsoqolec! Nagui saỹaten ra ʼam huoʼo ra arpiʼiỹaxac ñi Dios, chaʼaye qaica ca ʼeeqtega ra auanec ra aỹalec auotaʼa arachetaqtaxanaxat». Nache so Abrahán ilaʼa so qagueta lhuaraic ra ỹemaqtaiguilo soua lcoue so nsheʼela. Nache isouec so Isaac, nqaʼen nmenguet so qagueta ra ỹavigaxat ra lachetaqtaxanaxat.

Nache seʼeso naʼaq ñi Jehová ỹamataʼac ra nauochaxaua so Abrahán. ¿Auaỹaten táʼaencoʼ? Chaʼaye so Abrahán ỹoʼot ʼenauac so ỹamaxalec ñi Jehová, naicʼtaxa ra saishet ra ỹaỹateeteguet táʼaencoʼ ra iỹaxanot.

Nache ñi Jehová ỹieguelaxalec ra nasaxauec so ỹachaxana ra ỹanem: «ʼAm sanem ca achiquiaxac, nache ʼam sanem ca qalota aỹalacpi». Reʼera naigui ra chigoqchigui so lauolecpi so Abrahán ñi Jehová ỹanem ca achiquiaxacpi ʼenauac na shiỹaxauapi ʼonaxaic ra lataxac.