Soua lỹaʼt seis nhuaxanaguec

So Moisés taq Aarón taỹa so faraón ra ỹanem ra lʼaqtac ñi Dios: «Ra saishet ra auashen ra jec na ỹalamaxatpi nache ñamaq na tabanopi na aralamaxat ʼalhua». Na tabanopi ʼenaʼam na lotaxañepi laterai ra renaxan. Ỹataqta qalota so lotaxañepi taigui na lmateʼ so egipciopi naicʼtaxa ra sallaxanec qoʼ choxorac. ʼEnauac so ʼalhua nlaxalec na tabanopi. Qalaxaye so ʼalhua Gosén, maye lmaʼ so israelitapi, qaica ca netaña. Neʼena cuarta nhuaxanaguec taq ca laỹipi ndotec na egipciopi huoʼo ra nquejnaxac qaq na israelitapi saishet. So faraón nachoxoreteqot so Moisés: «Qonapega ñi Jehová ra nqatec na lotaxañepi nache lcopague nache ishet ra jec na lalamaxatpi». Ñi Jehová nqatec qalaxaye so faraón ltaxa naralaxat so lʼaqtac. ¿Petaʼa huoʼo ca naʼaq so faraón ishet ra naralaxat?

Lcopague, ñi Jehová ʼenapec: «Ra so faraón ñaq ʼeetalec saq ỹashen ca ỹalamaxatpi nache ca lalo animalpi so egipciopi ralola nache ileu». Nache ca lỹa naʼaq, ipacchigui so nasaxauec ñi Jehová qalaxaye so lalo animalpi so israelitapi qaica ca machaqca. Naicʼtaxa reʼera so faraón saishet ra ỹalaq chaʼaye ỹataqta qaramchigui.

Nache ñi Jehová ltaxa ỹamaq so Moisés ra iguelaxa so faraón nache ỹasaxasheguem na alo. Neʼena alo ñigui na lamoxoỹaxa nache talec ʼenauac na egipciopi. Nache ỹoʼot ra nasheguem na lhueta ỹataqta quiaxaguet. Qalaxaye so faraón saq ỹashen ra jec so mayepi.

Ñi Jehová ltaxa ỹamaq so Moisés ra iguelaxa so faraón ra iaʼaxatem: «¿Ñaq ʼeetalec ra saq auashen ra jec ra ỹalamaxatpi? Nache qonte soʼot ra anaq na lache». Nache so lỹa naʼaq ipacchigui, ñi Jehová ỹamaq na lache, nqashelgaxa taq norec. Qaica ca lỹa ʼenaʼam seʼeso. Chaʼaye nlaxajñe na ʼepaqpi taq na nanguishecpi, qalaxaye ye ʼalhua Gosén saishet ra talec. Nache so faraón ʼenapec: «Qonapega ñi Jehová ra tachiguiña neʼena nache ishet ra jec». Ñi Jehová ỹoʼot ra viʼiguet qalaxaye so faraón ỹoltaxa saishet ra ipacchigui.

So Moisés ʼenapec: «Nagui na langostapi chec na nonañi saq ʼamaqtac nanguishecpi lliʼiỹoxot aso lache». Ỹataqta qalota langostapi chec ʼenauac so noʼonañepi. So faraón nachoxoreteqot so Moisés: «Qonapega ñi Jehová ra nqatec neʼena na langostapi». Ñi Jehová nqatec, qalaxaye so faraón ñaq ʼeetalec ra qaramchigui.

Ñi Jehová ʼenapega so Moisés: «Auachaxasheguem na arhuaq na piguem». Nache huoʼo so ltaʼaraic napañe. Nache so egipciopi iviraʼa soua tres naʼaxaʼte ra qaica ca ilaʼa. Ndotec so israelitapi huoʼo na leraxa huetaʼa ye lmaʼ.

So faraón ʼenapega so Moisés: «Qauesomiỹa ʼam taq ʼanpueblo, qalaxaye qaucotañi na qareloi animalpi». So Moisés ỹasateguet: «Iuen ra sachoq ʼenauac na qarelopi yaqtoʼ sanqot ra qarachetaqtaxanaqte ñi Dios». Nache so faraón ỹataqta ralemata nache nalaxañe: «¡Aỹem qocaʼai! Chaʼaye ra ltaxa ʼam ñauaneʼ nache ʼam salauat».