So paʼatec nhuaxanaguec

So Moisés ʼenapega so faraón saishet ra ltaxa nauane. Qalaxaye so huotaique jec nache raʼaqtaxanem: «Ca laiñe na pe nache ca huaʼauchiguiñe ñalec na ʼenauac egipciopi ileu. So llalec so faraón taqaʼen so llalacpi so esclavopi».

Ñi Jehová ʼenapega so israelitapi: «Qauqataxañiiai ca nallec ʼamaqtaqaic. Qaualauachi ca qagueta llalec iviʼ ca ʼoonolec viʼi nache qahuoxogoñia ca ltagoʼq ra qauamiñi naua lasom ca noỹic. Qauahuochi na lapat nache qolliqui qaỹalecneguet aca pan qaica ca lalegue. Nache iuen ra mashe qanaỹamaxachita qaỹayiñe caua qoroxochi taq qarapelaʼachilliʼ. Neʼena pe qamiʼ ñaqateguesop». ¿Ca ʼeetec ca arcuennataxac soua israelitapi ỹataqta machiguiñe?

So laiñe na pe, so lamaxashec ñi Jehová taỹa ʼenauac na nmate ye Egipto. ʼEna qaica ca lanaxat ỹahuotaʼa na ntagoʼq na lasom, nache so huaʼauchiguiñe ñalec ileu. Qalaxaye ca lasom huoʼo ca lanaxat na ntagoʼq so lamaxashec ñi Jehová saishet ra ỹalauat. ʼEnauac na nhuolecpi ye Egipto, naicʼtaxa sallaxanec qoʼ choxoraq, ʼenauac ileu so huaʼauchiguiñe ñalec. Qalaxaye na llalacpi so israelitapi saishet ra ileu.

So huaʼauchiguiñe llalec so faraón taqaʼen ileu. So faraón mashe saishet ra naʼañaxateguet nache ʼenapega so Moisés taq Aaron: «¡Qoquiỹaʼai neʼena! Qauesomiỹa qavioʼoxoriñi ca qanatamnaxalai. Qauachi ca qareloi animalpi nache qoqui».

Seʼeso pe nache nlaqchigui so caʼagoxoic. So israelitapi ỹalat ye Egipto qanaloqchichiguiñi na nhuolecpi taq na tribupi. Huoʼo so 600.000 ỹallepi, taq qalota ʼalpi taq ñaqpiolecpi. Taqaʼen lỹatac so shiỹaxauapi saishet ra israelitapi, yaqtoʼ taqaʼen ỹoʼoxoren ñi Jehová.  ¡Qaq nagui nache so israelitapi qaisoueguesop!

Ra yaqtoʼ ntoueetaʼac ra ñi Jehová ncaʼalaxateguesop so mayepi nache iuen ra iqataxanai ca nallec amaqtaqaic ʼenauac na viʼi. Nache reʼera qaỹamataʼac Pascua.