So Jehoiadá saq ñiʼi

Aso Jezabel huoʼo aso llale lʼenaxat Atalía, aso maye ỹataqta yiloxoi ʼenaʼam aso lateʼe. Aso Atalía huaronguet so ntaʼa ye Judá. Coʼollaq so maye ileu nache nmenguet so llalec. Qaq coʼollaq ileu so llalec, nache aso Atalía ỹaqona so nʼonataxanaxac ye Judá. Yaqtoʼ ra qaica ca lỹa ỹaqona reʼera lʼonataxanaxac nache huotaique ra ỹalauat ʼenauac so llalacpi so ntaʼa. ¡Taqaʼen ỹalauat na maiche lauarepi! Ỹoqoʼoye qañiaʼa aso maye.

So ntaxaỹaxanec Jehoiadá taq aso lhua Jehoseba soua maye ỹaỹaten na ỹoʼotaq aso Atalía ỹataqta qauem. Soua maye ỹoxojñe so ʼoonolec laual aso Atalía lʼenaxat Jehoás, naicʼtaxa ra qaỹauanalec nache qaỹalauat. Soua maye nqañoxotoigui aso templo iviraʼa ra nogotolec.

Coʼollaq so Jehoás iviʼi so siete ra lañaxataxac nache so Jehoiadá laỹonat ʼenauac na lataxalapi na alleppi taq so levitapi. ʼEnapega: «Qanauañitalec qome ye ñegueuo añi templo. Saishet ra iuen ra huoʼo ca pauo». Nache so Jehoiadá ỹanaxanaxangui aso naro yaqtoʼ ntaʼa so Jehoás. Na shiỹaxauapi lmaʼ ye Judá nalaxañe: «¡ʼEna na qaralamaxat ntaʼa!».

Aso nateʼe Atalía huaʼaqchigui na lalaxac so shiỹaxauapi nache nqalegoqtaua añi templo. Qaq coʼollaq ilaʼa so ralaxaic ntaʼa nache nalaxañe: «¡Qomiʼ qaiqueʼelaxaʼt! ¡Qomiʼ qaiqueʼelaxaʼt!». ʼEnauac na lataxalapi na alleppi ỹaqoneua aso nateʼe yiloxoi qaipaxanec, qaỹache taq qaỹalauat. Aso maye qauem naloqnaxanaxat. ¿Négueʼt ca huagui ye Judá nagui?

So Jehoiadá itauan so pueblo ra naỹamaxate ñi Jehová. Seʼeso naỹamaxataxac so mayepi ỹan ra lʼaqtac ra ndotec ỹioʼoxoren ñi Dios. So Jehoiadá ỹoʼot ra nlaxajñe so templo lalamaxat so Baal taq so nqolacpi. Ỹoltaxa ỹoʼot ra roʼonataxan so ntaxaỹaxanecpi taq so levitapi huaña añi templo ñi Jehová, yaqtoʼ na shiỹaxauapi ỹioʼoxoren ñi maye huaña yeʼeye. Taqaʼen ỹamaxalec ra qailotegue añi templo yaqtoʼ ndotec paigui na ntaxaỹaxanecpi taq so levitapi. Lcopague so Jehoiadá taq so lataxalapi na alleppi qannaicapegue so Jehoás iviraxattauaʼa so lmaʼ ltaʼaraic taq qansoʼonaxanaxangui aso nsoʼonaxaqui so ntaʼa. So shiỹaxauapi lmaʼ ye Judá ỹataqta machiguiñe. Nagui qanqatec ra lloxonataxanaxac so Baal taq aso Atalía, ỹoltaxa ishet ra qaỹioʼoxoren ñi Jehová. ¿Apetaʼa so Jehoiadá saishet ra ñiʼi? ¿Ananomtaʼa ra souaxat reʼera nache itauan so qalota shiỹaxauapi?