2 Kuchitiya Vinthu Limoza

KUMBI KUNG’ANAMUWANJI?

Munthulumi ndi munthukazi wo achitiya vinthu limoza mubanja, ŵe nge wakwendesa ndegi ndipuso wakovyana nayu wo achitiya vinthu limoza pa ulendu wawu. Asani munthulumi pamwenga munthukazi wakumana ndi masuzgu, wakamba cha kuti “ndakumana ndi masuzgu,” m’malu mwaki wakamba kuti “takumana ndi masuzgu.”

FUNDU YA M’BAYIBOLU: “Yiwu mbaŵi so cha, kweni liŵavu limoza.”—Mateyu 19:6.

“Munthu wakhumbika cha kuchita vinthu pakuyija munthengwa. Kweni wosi akhumbika kuchitiya vinthu limoza kuti nthengwa yawu yiyendengi umampha.”—Christopher.

NTCHIFUKWA WULI NKHWAKUKHUMBIKA?

Asani akumana ndi suzgu, ŵanthu akutorana wo aleka kuchitiya vinthu limoza, aŵanaŵaniya ukongwa yo wayambisa suzgu lo m’malu mwakuŵanaŵaniya vo angachita kuti amalani nalu. Suzgu limana atilikuzga kuja suzgu likulu.

“Kuchitiya vinthu limoza ndiku kutovya kuti nthengwa yije yakukho. Asani ini ndi mulumu wangu talekanga kuchitiya vinthu limoza, tatingi tijengi nge ŵanthu ŵaŵi wo aja munyumba yimoza kweni weyosi watende yaki. Asani ŵanthu achita viyo, vija vakusuzga kuti akoliyanengi asani akhumba kusankha vinthu vakukhumbika.”—Alexandra.

VO MUNGACHITA

MUKANI MAFUMBU YANGA PAKUMWIJA

• Kumbi ndalama zo ndisaniya nditiziwona kuti “zangu pe”?

• Kumbi ndikondwa ukongwa asani nde kwakundija kuluska asani nde ndi munthu yo ndikutorana nayu?

• Kumbi nditinkhana ndi achibali a mulumu wangu pamwenga a muwolu wangu chinanga kuti iyu wakoliyana nawu?

KAMBISKANANI NDI MUNTHU YO MUKUTORANA NAYU

• Kumbi ndi vinthu nivi vo tichitiya limoza m’banja lidu?

• Kumbi ndi vinthu nivi vo tikhumbika kusintha kuti tichitiyengi limoza?

• Kumbi tingachita wuli kuti tilutirizgi kuchitiya vinthu limoza?

FUNDU ZAKOVYA

• Yeruzgiyani kuti mutchaya bola ndipu mwe mu matimu ngakupambana ndi munthu yo mukutorana nayu. Kumbi mungachitiya vinthu limoza? Awa. Mwakupambana ndi venivi, kumbi mungachita wuli kuti mulongongi kuti mwe mutimu yimoza ndi munthu yo mukutorana nayu?

• M’malu mwakuŵanaŵaniya kuti, ‘Kumbi ndingachita wuli kuti vinthu vindiyendiyengi?’ muŵanaŵanengi kuti, ‘Kumbi tingachita wuli kuti vinthu vitiyendiyengi?’

“Mungaŵanaŵananga cha kuti ndiyani yo wananga pamwenga yo waleka kunanga. Kuchita viyo kungakuwovyani cha kuti muje ndi chimangu kweniso kuti muchitiyengi vinthu limoza munthengwa.”—Ethan.

FUNDU YA M’BAYIBOLU: “Mungaŵanaŵaniyanga vakukhumba vinu pe cha, kweni va ŵanthu anyaki so.”—Afilipi 2:3, 4.