Kulengeka kwa Vinthu, Kuzifika Nyengu ya Zandi

Kumbi kuchanya ndi charu chapasi vikujaku wuli? Nanga lumwi, mwezi, nyenyezi ndi vinthu vinandi va pacharu chapasi vikujaku wuli? Bayibolo limuka umampha kuti vikulengeka ndi Chiuta. Mwaviyo, buku lidu ili litamba kukonkhoska nkhani za m’Bayibolo za kulengeka kwa vinthu.

Bayibolo likamba kuti Chiuta wangwamba kulenga ŵanthu ŵakuyanana ndi Iyu. Ŵanthu yaŵa ŵenga angelu. Kweni charu chapasi chikulengeke taŵanthu. Mwaviyo, Chiuta wangulenga ŵanthu ŵaŵi, munthurumi ndi munthukazi. Zina la munthurumi lenga Adamu, munthukazi wenga Eva ndipu Chiuta wanguŵaŵika m’munda wakutowa. Kweni yiwu angutondeka kuvwiya Chiuta, ndichu chifukwa chaki yiwu angutaya mwaŵi wakuja ndi umoyu.

Kutuliya po Adamu wangulengeke kuzifika panyengu ya Zandi mukulu, pangujumpha vyaka 1,656. Panyengu iyi penga ŵanthu anandi aheni. Kuchanya kwenga ŵanthu ambula kuwoneka, ŵanthu yaŵa ŵenga Satana ndi angelu ŵaki aheni. Pacharu chapasi penga Kaini ndi ŵanthu anyaki so anandi aheni. Pa ŵanthu aheni yaŵa, pengaso anyaki anthazi ukongwa kuluska weyosi. Kweniso penga ŵanthu amampha nge; Abelu, Enoke ndi Nowa. Mu Chigaŵa CHAKWAMBA ichi, tisambirengi za ŵanthu wosi yaŵa ndi vo vachitikanga.