Kalata Yakutuliya ku Wupu Wakulongozga

Akwanjiwa Apharazgi Anyidu:

Ndi mwaŵi ukulu ukongwa kuti tisope limoza Yehova Chiuta yija wauneneska! “Tigwira ntchitu limoza ndi Chiuta” ndipu tapaskika ntchitu yakupaturika kweniso yakutaska umoyu yakupharazga ndi kusambiza uthenga wamampha wa Ufumu waki wo ukujalikiskika. (1 Akori. 3:9; Mate. 28:19, 20) Kuti tifiski ntchitu yeniyi ya pacharu chosi mwachimangu ndipuso mwakukoliyana, tikhumbika kuchita vinthu mwandondomeku.—1 Akori. 14:40.

Buku ili likuwovyeningi kuti muvwisi mo vinthu vitende mu mpingu wachikhristu mazuŵa nganu. Likonkhoska mwaŵi ndi udindu wo weyosi we nawu nge Kaboni waku Yehova. Asani muwonga mwaŵi winu ndipuso mufiska udindu wo mwenawu mujengi ndi “chivwanu chakukho.”—Machi. 16:4, 5; Aga. 6:5.

Mwaviyo, titikuchiskani kuti mulisambiri mwakuphwere buku ili. Wonani vo mungachita kuti mugwiriskiyengi ntchitu vo mwasambira. Mwakuyeruzgiyapu, asani mwazomerezeka pambula kuswera yapa kuja mupharazgi wambula kubatizika, kumbi mukhumbika kuchitanji kuti mubatiziki kuja Kaboni waku Yehova? Asani mukubatizika kali, kumbi mungachita wuli kuti mulutirizgi kuja pa ubwezi wakukho ndi Yehova kweniso kuti musazgiyeku uteŵeti winu? (1 Timo. 4:15) Ntchinthu wuli cho mungachita kuti mu mpingu muje chimangu? (2 Akori. 13:11) Buku ili limuka mafumbu ngenanga.

Asani ndimwi mubali, kumbi mungachita wuli kuti muje mteŵeti wakovya ndipu pavuli paki muje mura? Abali anandi akhumbika mwaliŵi kuti alongozgengi mu mpingu chifukwa ŵanthu masawuzandi nganandi atuza mugulu laku Chiuta. Buku lenili, likuwovyeningi kuziŵa vo mungachita kuti muje akwenere maudindu ngenanga.—1 Timo. 3:1.

Tipemphera kwaku Chiuta ndi mtima wosi kuti buku ili likuwovyeni kuziŵa udindu winu mugulu laku Yehova ndipuso kuwuwona kuti ngwakuzirwa. Titikuyanjani ukongwa mosi, ndipu tilutirizga kupemphera kuti muje mugulu la ŵanthu alikondwa wo asopengi Yehova, Ada ŵidu akuchanya mpaka muyaya!—Sali. 37: 10, 11; Yesa. 65: 21-25.