Abali Ampupuka, Kumbi Muyesesa Kuti Muje ndi Udindu Mumpingu?
1. Kumbi mphanyengu niyi yo m’bali wampupuka watenere kugwiriskiya nchitu ulongozgi wa pa 1 Timote 3:1?
1 “Asani yumoza walembe [wakhumba udindu NW] . . . , wakhumbira mlimu weneku.” (1 Tim. 3:1) Mazu nga m’Bayibolo yanga ngachiska abali kuti ayenere maudindu mumpingu. Kumbi ivi vikhumba kuti mukuwi dankha? Kukamba uneneska, mbumampha kuyesesa kukhumba udindu mumpingu mweche anamana. Ivi vikuwovyeningi kuti musambiziki ndipuso mulongo kuti mwe akwenere kuzija mteŵeti wakovya asani mwakuwa. (1 Tim. 3:10) Asani ndimwi m’bali wakubatizika, kumbi mungalongo wuli kuti mukhumba udindu?
2. Kumbi mungachita wuli kuti muje ndipuso mulongo mtima wakujipereka?
2 Kujipereka: Ziŵani kuti asani mukhumba udindu mumpingu, mukhumba kutchuka pamwenga kuzirwa cha kweni mukhumba nchitu yamampha. Mwaviyo, jani ndi mtima wakukhumba kovya abali ndi azichi ŵinu. Kuti muchiti venivi, muŵanaŵaniyengi mo Yesu wachitiyanga. (Mat. 20:28; Yoh. 4:6, 7; 13:4, 5) Mupempheni Yehova kuti wakuwovyeni kuja ndi mtima wakuŵanaŵaniya anyinu. (1 Ŵakor. 10:24) Kumbi mungaŵawovya abali akukota pamwenga ambula nthazi mumpingu winu? Kumbi mutijipereka kugwira nchitu ya kupupa, kukolopa ndipuso nchitu zinyaki zakuphwere Nyumba ya Ufumu? Kumbi mutijipereka kukamba nkhani mu Sukulu ya Uteŵeti Waku Chiuta asani yo wangupaskika waza cha ku maunganu pa zuŵa lo? Mukondwengi asani mutijipereka kuti muwovyi anyinu.—Mac. 20:35.
3. Kumbi kwanja Yehova nkhwakukhumbika wuli, nanga tingamuyanja wuli?
3 Kwanja Yehova: Nkhwakukhumbika ukongwa kuti mteŵeti waku Chiuta wayanjengi Yehova kupambana ndi kuja ndi lusu lapade pamwenga zeru zakuwa nazu. Munthu yo watanja Yehova wawona vinthu nge mo Yehova ndi Yesu ativiwone. (1 Ŵakor. 2:15, 16) Iyu walongo “chipasu cha mzimu.” (Ŵag. 5:22, 23) Iyu wapharazga mwaphamphu ndipu waŵika panthazi nchitu za Ufumu. (Mat. 6:33) Mungaja akwanja Yehova asani muchita sambiru la pakumwija mwakujalikiskika. Ivi visazgapu kuŵerenga Bayibolo zuŵa lelosi, magazini ngengosi ngasonu nga Chigongwi cha Alinda ndi Galamukani!, kweniso kunozgeke maunganu nga mpingu ndi kuchisanirikapu. (Sumu 1:1, 2; Ŵah. 10:24, 25) Pakumuchiska Timote kuti walutirizgi kwanja Yehova, Paulo wanguti: “Jichenjeriyengi wamweni . . . ku chisambizgu chaku.” (1 Tim. 4:15, 16) Mwaviyo, muyesesengi kukamba umampha nkhani zo mwapaska mu Sukulu ya Uteŵeti Waku Chiuta. Munozgekiyengi uteŵeti wakumunda ndipuso mulutengi kuchipharazga nyengu zosi. Jani ndi vilatu nge, kuchita upayiniya, kuchiteŵete pa Beteli pamwenga kuchisere Sukulu ya Bayibolo ya Abali Ambula Kuto kweniso yesesani kuvifiska. Kwanja Yehova kukuwovyeningi kuti ‘muthaŵi ma ulakalaka nga uhurwa [unyamata].’—2 Tim. 2:22.
4. Kumbi kuthembeka ndipuso kugomezgeka nkhwakukhumbika wuli?
4 Kuthembeka Ndipuso Kugomezgeka: Abali wo angusankhika kuti agaŵi chakurya kwa Akhristu munyengu ya akutumika, ŵenga “akusimikizgika” kuti mbakuthembeka ndipuso akugomezgeka. Mwaviyo, akutumika afipanga mtima cha kuti nchitu yilekengi kuchitika. Ivi vinguwovya akutumika kuti aŵiki mtima pa nchitu zinyaki zakukhumbika ukongwa. (Mac. 6:1-4) Mwakuyana ŵaka, asani mwapaskika nchitu mumpingu winu, mutenere kuyigwira ndi mtima wosi. Muchitengi nge Nowa yo wangulondo ulongozgi wosi wo wangupaskika kuti wakhomi chingaraŵa. (Chiy. 6:22) Yehova wawona kuti kugomezgeka nkhwakukhumbika ukongwa ndipu kulongo kuti mutimuyanja nadi.—1 Ŵakor. 4:2; wonani bokosi lakuti, “Umampha Wakusambizika Nchitu.”
5. Nchifukwa wuli abali ampupuka atenere kuyesesa kuti aje ndi udindu mumpingu?
5 Nge mo ukambiya uchimi, Yehova watendesa liŵi nchitu yakuwunganiska ŵanthu. (Yes. 60:22) Pa avereji, ŵanthu pafupifupi 250,000, abatizika chaka chechosi. Chifukwa cha unandi wa ŵanthu ŵenaŵa wo asambira uneneska, pakhumbika abali akwenere wo atanja Yehova kuti aje ndi ma udindu mumpingu. Mazuŵa nganu, mu gulu laku Yehova mwe nchitu zinandi kuphara kali. (1 Ŵakor. 15:58) Abali ampupuka, kumbi muyesesa kuti muje ndi udindu mumpingu? Asani muchita viyo, mukhumba nadi nchitu yamampha!
[Fundu yo yakonkhoskeka papeji 2]
Chifukwa cha unandi wa ŵanthu wo asambira uneneska, pakhumbika abali akwenere wo atanja Yehova kuti aje ndi ma udindu mumpingu
[Bokosi papeji 3]
Umampha Wakusambizika Nchitu
Abali ampupuka wo mbakwenere ayanduwa ukongwa asani ŵara atiŵasambiza kweniso atiŵapaska nchitu. Pavuli pa maunganu, wakuwonere dera wanguja kunthazi kwa nyumba ya ufumu ndipu wachiskanga mpharazgi. Iyu wanguwona mnyamata yo wanguma nayu pafupi, wangumufumba asani walindizga iyu kuti wakambiskani nayu. Mnyamata yo wangumuka kuti wakupaskika nchitu yakupeya kunthazi mu Nyumba ya Ufumu pavuli pa unganu wewosi. Apapi ŵaki angunozgeka kuti akengi ku nyumba kweni iyu wakhumbanga dankha kugwira nchitu yo wakupaskika. Wakuwonere dera yo wangukondwa ndipu wangunderepu. Iyu wangukamba kuti: “Ŵara a mumpingu wo, nyengu zosi akhumbisiskanga kusambiza abali ampupuka wo mbakwenere mwakuŵapaska maudindu. Mwaviyo, yiwu asuzgikanga cha kuzomerezga abali ampupuka kuti aje ateŵeti akovya pa nyengu yo ndachezanga pa mpingu wawu.”