Kumbi Kumala Kwa Charu Nkhwakofya, Nkhwakukondwesa Pamwenga Nkhwakuguŵiska?

Kumbi muŵanaŵananji pa nkhani ya kumala kwa charu, yo ŵanthu anandi aja achikamba kuti charu chimalengi pa December 21, 2012, mwakukoliyana ndi kalendala ya ŵanthu a fuku la Maya? Vithemba pa vo imwi mwalindizganga. Mungakondwa, kuguŵa pamwenga mungaŵavi mantha, asani vo mwalindizganga valeka kuchitika mo imwi mwaŵanaŵaniyanga. Kumbi kwenga ŵaka kunangisa kuti charu chimalengi pa zuŵa lenili?

Kumbi Bayibolo likambanji pa nkhani ya ‘umaliru wa charu’? (Mateyu 24:3, King James Version) Anyaki atopa kuti charu chazamukufya ndi motu. Anyaki akhumbisiska kuti aziwoni vo vazamuchitika pa nyengu iyi. Ndipu anyaki avuka chifukwa alindizga kwa nyengu yitali kuti charu chimalengi kweni chimala cha. Mwakukoliyana ndi fundu zenizi, kumbi nkhani ya kumala kwa charu ndi nthanu ŵaka?

Mungazizwa kuvwa vo Bayibolo likamba pankhani ya kumala kwa charu. Bayibolo likamba vifukwa vo charu chimaliyengi ndipuso likamba kuti anyaki aŵanaŵana kuti charu chiswera kumala. Titikupemphani kuti muvwi mo Bayibolo limukiya mafumbu nganyaki ngo ŵanthu afumba, pankhani ya kumala kwa charu.

Kumbi charu chazamukufya ndi motu?

BAYIBOLO LIMUKA KUTI: “[Chiuta] wajarikiska charu pa viŵanja vaki, mwakuti chireki kusukunika muyaya.”—SUMU 104:5.

Charu chazamukufya ndi motu cha pamwenga kunangika munthowa yeyosi. Bayibolo lititisambiza kuti charu chapasi chikupangika kuti ŵanthu ajengemu. Lemba la Sumu 37:29 likamba kuti, “Ŵakurunjika ŵaharengi charu, ndipu ŵakajanga paku cho muyaya.”—Sumu 115:16; Yesaya 45:18.

Chiuta wati walenga charu, wangukamba kuti charu chenga “chamampha ukongwa,” ndipu weche kuchiwona kuti nchamampha. (Chiyambo 1:31) Iyu walivi maŵanaŵanu ngakuti wanangi charu, m’malu mwaki walayizga kuti, ‘wanangengi wo ananga charu chapasi,’ ndipu wazamuvikiliya charu chapasi kuti chizileki kunangika mpaka muyaya.—Chivumbuzi 11:18.

Panyaki mungazizwa kuti nanga lemba la 2 Petro 3:7 ling’anamuwanji? Lemba ili likamba kuti: “Machanya . . . ndi mtunda [charu] nawu, . . . vaŵikikiya ku motu.” Kumbi mazu ngenanga ngang’anamuwa kuti charu ichi chazamukufya? Nyengu zinyaki, Bayibolo ligwiriskiya nchitu mwakuyeruzgiya ŵaka mazu ngakuti “machanya,” “mtunda” ndipuso “motu.” Mwakuyeruzgiyapu, lemba la Chiyambo 11:1, likamba kuti: “Charu chosi chenga ndi lilimi limoza.” Pa lemba ili, akugwiriskiya nchitu mazu ngakuti “charu,” kung’anamuwa ŵanthu.

Mwaviyo, machanya, charu ndipuso motu vo ve pa 2 Petro 3:7, vilongo kuti vakuyeruzgiya ŵaka. Pa vesi 5 ndi 6 pakonkhoska vo vinguchitika pa Zandi, m’nyengu yaku Nowa. Panyengu iyi ŵanthu pe ndiwu angufwa. Mwaviyo, “charu” cho chingunangika pa nyengu ya Zandi, chamiyanga ŵanthu wosi aheni. Zandi wangunanga so “machanya,” ngo ngamiyanga ŵanthu wo awusanga pa nyengu yo. (Chiyambo 6:11) Mwakuyana ŵaka, lemba la 2 Petro 3:7 likamba za kunangika kwa ŵanthu aheni ndi maboma ngawu nge kuti vazamukufya ndi motu.

Nchinthu wuli chichitikengi pa nyengu ya kumala kwa charu?

BAYIBOLO LIMUKA KUTI: “Charu chikungunuka, ndi chilakalaka chaki; kweni mweniyo wachita khumbu laku Chiuta, wajaririya muyaya.”—1 YOHANE 2:17.

“Charu” cho chikungunuka ndi charu chayichu cha, kweni mbanthu wo ŵe pacharu chapasi, wo vakuchita vawu vikoliyana cha ndi khumbu laku Chiuta. Nge mo dokotala wangachitiya upaleshoni munthu kuti waleki kusuzgika, ndimuso Chiuta wazamuchitiya. Iyu ‘wazamudumuwa’ ŵanthu aheni kuti ŵanthu amampha azikondwi ndi umoyu pacharu chapasi. (Sumu 37:9) Chifukwa cha fundu yeniyi, ‘kumala kwa charu’ ndi nkhani yakukondwesa ukongwa.

M’Bayibolo linyaki mazu ngakuti “kumala kwa charu,” akungafwatuliya kuti “umaliru wa vinthu va m’charu,” pamwenga “umali wa mgonezi.” (Mateyu 24:3; New International Version) Mwaviyo, chifukwa chakuti ŵanthu amampha ndipuso charu chapasi vazamupona pa nyengu yo charu chazamumaliya, ndikuti charu chazamuja ndi vinthu ndipuso mgonezi wufya. Ndichu chifukwa chaki Bayibolo likamba kuti “mgonezi wo utuza.”—Luka 18:30.

Yesu wangukamba kuti nyengu iyi ndi “nyengu yakunozge vinthu.” Panyengu iyi wazamunozga vosi kuti taŵanthu tizije so ndi umoyu wamampha nge mo Chiuta wakhumbiyanga pakwamba. (Mateyu 19:28, NIV) Panyengu iyi tazamukondwa ndi vinthu ivi:

• Charu chapasi cha paradayisu cho chazamuja chakuvikilirika ndipuso mwazamuja vinthu vinandi vamampha.—Yesaya 35:1; Mika 4:4.

• Nchitu zakukondwesa ndipuso zakuyandulisa.—Yesaya 65:21-23.

• Matenda ngosi ngazamumala.—Yesaya 33:24.

• Ukoti wazamumala.—Jobu 33:25.

• Akufwa azamuyuka.—Yohane 5:28, 29.

Asani tichita “khumbu laku Chiuta,” kung’anamuwa kuchita vo iyu watitikambiya, tikhumbika cha kopa kuti charu chimalengi. M’malu mwaki, tikhumbisiskengi kuti charu chimali.

Kumbi charu che pafupi nadi kumala?

BAYIBOLO LIMUKA KUTI: Asani muwona kuti venivi vichitika, “ziŵani kuti waŵandika ufumu waku Chiuta.”—LUKA 21:31.

Pulofesa Richard Kyle wakulemba kuti, “kusintha kwa vinthu mwamabuchibuchi ndipuso viwawa kwachitiska kuti ŵanthu aŵanaŵanengi kuti charu chimalengi nadi.” (The Last Days Are Here Again) Ŵanthu aŵanaŵana viyo, ukongwa asani awona kuti viwawa ndipuso kusintha kwa vinthu kuluta panthazi.

Achimi wo angukamba za kumala kwa charu, angukhumba ŵija cha kulemba kweni anguchita kukambirika ndi Chiuta kuti alembi vinthu vo vatingi vizilongongi kuti charu che pafupi kumala. Ŵanaŵanani za mauchimi nganyaki yanga ndipu wonani asani ngafiskika m’nyengu yidu.

• Nkhondu, vilala, viyeuyeu ndipuso videru.—Mateyu 24:7; Luka 21:11.

• Unandi wa uchikana marangu.—Mateyu 24:12.

• Kunangika kwa charu chapasi chifukwa cha ŵanthu.—Chivumbuzi 11:18.

• Kujanja, kwanja ndalama, kwanja vakusangaluska kuruska kwanja Chiuta.—2 Timote 3:2, 4.

• Kumala kwa nthengwa.—2 Timote 3:2, 3.

• Kuleka kuzomerezga maukaboni ngakuti charu che pafupi kumala.—Mateyu 24:37-39.

• Kumemezeka kwa Uthenga wa Ufumu pacharu chosi chapasi.—Mateyu 24:14.

Nge mo Yesu wangukambiya kuti asani “muwona venivo vosi,” muziŵi kuti charu che pafupi kumala. (Mateyu 24:33) Akaboni aku Yehova agomezga kuti ukaboni uwu ngwauneneska ndipu apharazgiya ŵanthu za chigomezgu chawu mu vyaru vakukwana 236.

Asani charu chamala cha pa nyengu yo tagomezganga, kumbi ving’anamuwa kuti chimalengi cha?

BAYIBOLO LIMUKA KUTI: ‘Po ŵatiti, “chimangu ndi wanangwa!” penipo ndipu phasulu liŵawiyengi kwakubuchizga, uli ndi mo urwirwi utumuwiya wanthumbu; ndipu kuti azamupozomoka kosi cha.’—1 ŴATESALONIKA 5:3.

Bayibolo liyeruzgiya kunangika kwa charu ndi urwirwi wo munthu wanthumbu watuvwa asani we pafupi kubala. Urwirwi wo, utamba mwamabuchibuchi ndipuso uthaŵika cha. Nyengu yo yajaku kuti umaliru ufiki, yiyanana ŵaka ndi ya munthu wanthumbu, iyu waziŵa kuti we pafupi kubala chifukwa cha vinthu vo wawona. Nyengu zinyaki, dokotala wangamukambiya zuŵa lo wabaliyengi, chinanga kuti zuŵa lo lingajumpha, waja mbwenu ndi chigomezgu kuti wabalengi nyengu yeyosi. Mwakuyana ŵaka, chifukwa chakuti charu chikumala cha panyengu yo ŵanthu aŵanaŵaniyanga, venivi vingasintha cha fundu yakuti te “mu mazuŵa ngakumaliya.”—2 Timote 3:1.

‘Asani visimikizgu vakuti charu che pafupi kumala viwoneke limu pakweru,’ mungajifumba kuti, ‘Nchifukwa wuli ŵanthu anandi atondeka kuzomerezga kuti te m’mazuŵa ngakumaliya?’ Bayibolo lilongo kuti po umaliru we pafupi, anandi azakuvitole kanthu cha visimikizgu venivi. M’malu mwakuzomerezga kuti vinthu vasintha nadi ukongwa mazuŵa nganu, yiwu asuska mwakunyoza ndipu akamba kuti: ‘Kwambiya ku zuŵa lenilo apapi ŵidu akufwiya, vinthu vosi vaja viyo pe kutuwa ku chiyambo cha ulengi.’ (2 Petro 3:3, 4) Munthowa yinyaki, tingakamba kuti ukaboni wakuti te m’mazuŵa ngakumaliya uwoneke limu kweni anandi azerezge dala.—Mateyu 24:38, 39.

Nkhani iyi yakonkhoska Malemba ngamanavi ŵaka ngo ngalongo kuti umaliru we pafupi nadi.a Kumbi mukhumba kuziŵa vinandi? Asani ndiviyo, kumanani ndi Akaboni aku Yehova kuti musambirengi nawu Bayibolo kwawezi. Mukhoza kusankha kuti muzisambirengi nawu panyumba yinu pamwenga pamalu ngengosi ngo mungayanja. Imwi mukhumbika ŵaka kusaniya nyengu ndipu muyanduwengi vinthu vinandi.