Nchifukwa Wuli Mutenere Kuŵerenga Bayibolo?

Bayibolo ndakutchuka ukongwa kuphara buku lelosi pacharu chapasi. Nchifukwa wuli tikamba viyo? Ndambula kusuzga kulivwisa. Le ndi nkhani zo zikuchitika nadi pa umoyu wa ŵanthu ndipuso mo achitiyanga vinthu ndi anyawu kweniso ndi Chiuta. Munkhani zenizi tisambiramu fundu zakovya zo zikulembeka munthowa yipusu, zingafwatulikiya mu vineneru vinandi ndipu ŵanthu a muvyaru vakupambanapambana atizivwa mwambula kusuzga. Fundu za m’Bayibolo zigwira nchitu nyengu zosi.

Fundu yakukhumbika kuyiziŵa njakuti, Bayibolo ndi buku lakukamba ŵaka zaku Chiuta cha kweni ndakutuliya kwaku Chiuta. Likamba za zina laku Chiuta, mijalidu yaki kweniso kuti wazamusintha cha chilatu chaki cho wangulenge charu ndi ŵanthu. Bayibolo likonkhoska so nkhani yo yaŵapu kwa nyengu yitali pakati paku Chiuta ndi Satana: Nkhani yeniyi njakukhumbika kuyiziŵa chifukwa yikwaska chilengedu chosi ndipu umaliru waki ngwakukondwesa. Kuŵerenga Bayibolo ndi maŵanaŵanu ngamampha, kutovya munthu kuti waje ndi chivwanu ndipuso chilindizga.

M’Bayibolo mwe nkhani zinandi zo zingasanirika cha kwekosi. Mwakuyeruzgiyapu, Bayibolo lititikambiya uneneska wakukwaskana ndi nkhani nge izi:

• Kweniko tikutuliya kweniso chifukwa cho tisuzgikiya

• Vo Chiuta wakuchita kuti wawombo ŵanthu wosi

• Vo Yesu wakutichitiya

• Vo Chiuta wachitengi ndi charu kweniso wachitiyengi ŵanthu

Yesesani kuŵerenga nkhani zakulondopu kuti muziŵi nkhani zo ze m’Bayibolo.