Kumbi Taŵanthu Tikutuliya Pani?

M’Bayibolo, buku lakwamba la Chiyambo, likonkhoska mwambula kusuzga yo wakulenga chilengedu: “Mu chiyambu Chiuta wangulenga kuchanya ndi charu chapasi.” (Chiyambo 1:1) Chiuta wati walenga vinthu vosi vakume ndi nyama, wangulenga ŵanthu akwamba, Adamu ndi Eva. Ŵanthu ŵenga akupambana ndi nyama chifukwa angutoliyaku mijalidu yaku Chiuta ndipuso ŵenga ndi wanangwa wakusankha vo akhumbanga. Mwaviyo, yiwu atingi ajengi ndi mulandu pa vinthu viheni vo atingi achitengi. Asani anguvwiya marangu ngaku Chiuta, atingi ayanduwengi ndi khumbu laku Chiuta mwakuja apapi akwamba a ŵanthu wosi a pacharu chapasi, wo atingi akondwengi kwamuyaya ndi umoyu wachimangu kweniso wakufikapu.

Kweni mungelu munyaki wangugwiriskiya nchitu ŵanthu kuti wafiski jalidu la mbunu lo wenga nalu. Mwaviyo, chifukwa cha vo wanguchita, wanguja Satana kung’anamuwa “Wakususka.” Satana wangunyenga Eva mwakugwiriskiya nchitu njoka. Iyu wangumukambiya kuti watingi wajengi ndi umoyu wamampha kwambula ulongozgi waku Chiuta. Adamu ndi Eva angulondo Satana ndipu ubwezi wawu ndi Mulengi ungumala. Apapi ŵidu akwamba akutaya mwaŵi wakuja ndi umoyu wambula kumala chifukwa chakusankha uheni ndipu tosi titufwa chifukwa chakuti tikuhara ubudi ndi kuleka kufikapu.

Pati pajumpha ŵaka nyengu yimanavi, Chiuta wangukamba kuti watuzgengepu vinthu vakuchitiska chitima venivi ndi kupaska mphapu yaku Adamu nthowa yakusaniriya umoyu wambula kumala. Chiuta wangulayizga kuti “mphapu” pamwenga kuti munthu wapade, wazamutuzgapu Satana kweniso masuzgu ngosi ngo iyu, Adamu ndi Eva akuzisa. (Chiyambo 3:15) Kumbi “mphapu” yeniyi, yatingi yizijengi yani? Vatingi viziziŵikengi kunthazi.

Pa nyengu yeniyo, Satana wanguyesesa kuti khumbu laku Chiuta lileki kufiskika. Ubudi ndi uheni ungusapaliya ukongwa. Chiuta wangukamba kuti wazisengi zandi kuti wanangi ŵanthu wosi aheni. Iyu wangukambiya Nowa kuti wakhomi chingaraŵa ndipu chije nge chibokosi chikulu cho chatingi chiziyandamengi pamaji, kuti chizipozomoski iyu, a m’banja laki kweniso nyama zo wangulangulika kuti waziserezi m’chingaraŵa.

Nowa ndi banja laki angutuwa m’chingaraŵa ndi kwamba kuja m’charu cho mwengavi munthu weyosi, pati pajumpha chaka chimoza kutuliya po Zandi wangwambiya. Kweni pa nyengu iyi, “mphapu” yenga yechendaziŵiki.

—Nkhani iyi yatuliya pa Chiyambo chaputala 1-11; Yuda 6, 14, 15; Chivumbuzi 12:9.