“Tamusaniya Mesiya”!

Vyaka pafupifupi 400, kutuliya po buku lakumaliya la Malemba ngachiheberi lingulembeke, uchimi wo Mika wangukamba wakukwaskana ndi Mesiya, ungufiskika: Yesu wanguwiya nadi ku Betelehemu. Pati pajumpha vyaka pafupifupi 30, mu 29 C.E., chigaŵa chakwamba cha uchimi waku Danyele wo wakambanga kuza kwaku Mesiya, chingufiskika. Yesu wangubatizika ndipu Chiuta wangumusankha mwakugwiriskiya nchitu mzimu wakupaturika. Mesiya pamwenga kuti Mphapu, yo angumulindizga kwa nyengu yitali, wanguza nadi pa nyengu yaki!

Yesu wati wabatizika ŵaka wangwamba uteŵeti waki “wakugozga ufumu waku Chiuta.” (Luka 8:1) Nge mo angukambiya achimi, Yesu wenga walisungu, wakufwasa ndipuso waŵanaŵaniyanga ukongwa ŵanthu. Vo wasambizanga venga vakovya ndipuso valongonga kuti wayanjanga ŵanthu, iyu wachizganga ŵanthu a “unthomboru wosi” pamwenga kuti akutomboroka, kulongo kuti Chiuta wamuwovyanga. (Mateyu 4:23) Ŵanthu amisinkhu yosi anguza kwaku Yesu ndipu angukamba nge mo wangukambiya yumoza wa akusambira ŵaki kuti: “Tamusaniya Mesiya”!​—Yohane 1:41.

Yesu wangukamba kuti kwazamuja nkhondu, viyewuyewu ndipuso masuzgu nganyaki nganandi pacharu chapasi, iyu wechendayambi kuwusa. Iyu wanguchiska wosi kuti ‘akhazgi.’​—Marko 13:37.

Yesu wenga wakufikapu kweni wangulutirizga kuvwiya Chiuta ndipu pakumaliya arwani ŵaki angumubaya. Nyifwa yaki yenga sembi yakufikapu yo yikuchitiska kuti tizije ndi umoyu wambula kumala m’Paradayisu, wo Adamu ndi Eva anguwutaya.

Kufwa kwaku Yesu kweniso kuyuskika kwaki ndi Chiuta nge mungelu wanthazi pati pajumpha mazuŵa ngatatu, vingufiska uchimi. Pavuli paki, iyu wanguwoneke kwa akusambira ŵaki akujumpha 500. Yesu wechendaluti kuchanya, wangulangula akusambira ŵaki kuti akapharazgi uthenga wamampha wakukamba zaku iyu ndi Ufumu waki ku ŵanthu a “mitundu yosi.” (Mateyu 28:19) Kumbi yiwu angugwira nchitu yeniyo kufika pani?

—Nkhani iyi yatuliya m’buku la Mateyu, Luka, Yohane 1 Akorinte.