Uthenga Wamampha ku Ŵanthu a Mitundu Yosi

Kuyuskika kwaku Yesu kunguchitiska kuti akusambira ŵaki aje ndi chigomezgu chakukho kweniso phamphu. Wakutumika Paulo, wangupharazga chigaŵa chosi cha Asia Minor ndi Mediterranean, wangujalikiska mipingu ndi kuchiska Akhristu kuti aje akukho chinanga kuti ŵenga pakati pa ŵanthu a mijalidu yiheni kweniso asuskikanga mwankhaza. Chinanga kuti akumananga ndi masuzgu ngenanga, Chikhristu chingwamba kuziŵika ndipu ŵanthu anandi anguja Akhristu.

Pavuli paki, Paulo angumuŵika mujeri. We mujeri, wangulemba makalata ngakuchiska ndipuso ngakupereka ulongozgi ku mipingu yachikhristu. Iyu wangutcheŵeska so za ampatuku wo ŵenga akofya. Mwakulongozgeka ndi mzimu wakupaturika waku Chiuta, Paulo wangukambiya limu kuti “mphumphi zakusaruka” zakukamba vinthu “vakupuruska” zazamusere pakati pawu ndi “kuguziya [akusambira, NW] pavuli pawu.”—Machitidu 20:29, 30.

Mpatuku wenuwu, ungwamba kukumaliya kwa nyengu ya akutumika. Pa nyengu yeniyi, Yesu wanguvumbuliya wakutumika Yohane vo vatingi vichitikengi kunthazi. Nge mo Yohane wangulembe, ŵanthu akususka pamwenga asambizi aboza atingi amukanizgengi cha Chiuta kufiska vo wakhumbanga kuchita ndi charu ndipuso ŵanthu. “Mtundu wosi ndi fuku ndi kalongororedu ndi khamu” azamukuvwa uthenga wamampha wa Ufumu waku Chiuta. (Chivumbuzi 14:6) Charu chazamuja so paradayisu ndipu weyosi yo wakhumba kuchita khumbu laku Chiuta, wangazija m’charu chenichi!

Kumbi wenuwu “mbuthenga wamampha” cha kwaku imwi? Asani ndi viyo, ziŵani vinandi vakukwaskana ndi uthenga waku Chiuta wa m’Bayibolo wo upharazgika ku ŵanthu wosi ndipuso mo mungayanduliya nawu sonu kweniso munthazi.

Mungaŵerenga Bayibolo pa www.jw.org mu vineneru pafupifupi 50. Pa malu ngenanga, mungaŵerenga so timabuku iti: Kumbi Bayibolo le Ndi Uthenga Wuli? ndi Uthenga Wamampha Wakutuliya Kwaku Chiuta kweniso buku lakuti, Kumbi Bayibolo Lisambizanji Weniukongwa? Mungasaniya so mabuku nganyaki ngo ngakonkhoska chifukwa cho tingagomezge Bayibolo, mo tingagwiriskiya nchitu ulongozgi waki wakovya m’banja lidu ndi pa umoyu widu. Ndipuso mungafumba Kaboni weyosi waku Yehova kuti muziŵi vinandi.

—Nkhani iyi yatuliya m’buku la Machitidu, Ŵaefesu, Ŵafilipi, Ŵakolose, Filimone, 1 Yohane, Chivumbuzi.