Malu Ngidu nga pa Intaneti, Ngakupangikiya kuti Ngawovyi Isi ndi Ŵanthu Anyaki

Yesu wakutituma kuti tipharazgi uthenga wamampha wa Ufumu “mu charu chosi chapasi uli mbukaboni ku mitundu yosi.” (Mat. 24:14) Kuti ‘tifiski umampha uteŵeti widu,’ ma adiresi yanga,watchtower.org, jw-media.org, ndi jw.org ngabanyika ndi kupanga adiresi yimoza ya jw.org.​—2 Tim. 4:5.

“Mu Charu Chosi Chapasi”: Pa charu chosi chapasi, munthu yumoza pa ŵanthu atatu ŵewosi wagwiriskiya nchitu Intaneti. Ŵanthu anandi atanja kupenjerezga vinthu pa Intaneti, ukongwaukongwa ampupuka. Malu ngidu ngatovya ŵanthu kuti asaniyi kwamuka kwa mafumbu ngawu kutuliya m’Bayibolo pa Intaneti. Malu yanga ngatiŵawovya kuti angasuzgikanga cha kuziŵa gulu laku Yehova ndi kupempha kuti asambirengi Bayibolo kwawezi. Ngatovya so kuti uthenga wamampha ufikiyi ŵanthu m’vigaŵa vakusuzga kupharazgaku uthenga wa Ufumu.

“Mitundu Yosi”: Kuti tipharazgiyi ŵanthu a “mitundu yosi,” titenere kupharazga uthenga wamapha mu vineneru vakupambanapambana. Ŵanthu wo awona malu ngidu nga jw.org angasaniya uthenga widu mu vineneru pafufupi 400 kuruska malu nganyaki ngengosi pa Intaneti.

Mungagwiriskiyengi Nchitu Umampha: Chilatu cha malu nga jw.org, nkhupharazgiya ŵanthu pe cha. Kweniso nchakuti Akaboni aku Yehova nawu angagwiriskiyengi nchitu. Asani mwe ndi vipangizu vo ve ndi Intaneti, ngaziŵeni umampha malu ngidu nga jw.org. Masachizgu ngo nge mumphata umu, ngakuwovyeningi kuti muziŵi mo mungachitiya pakugwiriskiya nchitu malu yanga.

[Chithuzi papeji 3]

(For fully formatted text, see publication)

Yesani Kungagwiriskiya Nchitu

1 Lembani kuti www.jw.org pa malu ngakulembapu adiresi pa Intaneti.

2 Penjerezgani vo mukhumba pa malu yanga mwakujula po pe mitu ya nkhani yo ye pachanya, timitu to te m’mphepeti kweniso pa mazu ngo nge ndi mzeri kusi kwaki.

3 Yesani kugwiriskiya nchitu malu ngidu nga jw.org pa foni yinu asani ye ndi Intaneti. Asani mwagwiriskiya nchitu foni peji laki lija limana chifukwa chakuti foni njimana kuruska kompyuta kweni uthenga waki upambana cha.