Mugwiriskiyengi Nchitu jw.org/tog Pakupharazga​—“Jani Bwezi Laku Yehova”

Pa jw.org pe mutu wakuti, “Zimene Baibulo Limaphunzitsa.” Pa mutu wenuwu pe kamutu kakuti, “Jani Bwezi Laku Yehova” ndipu pasanirika sumu, mavidiyo kweniso vo ŵana angachita. Kumbi mukugwiriskiyapu nchitu vo visanirika pakamutu kenaka pakupharazga? Asani musambira Bayibolo ndi mpapi yo we ndi ŵana anamana, kumbi mungayesa kumulongo vo visanirika pakamutu kenaka? Kuchita venivi kungawovya yo musambira nayu kuti wayambi kuwona vinyaki pa Webusayiti yidu.

M’bali munyaki wagaŵiyanga kapepala ka Uthenga wa Ufumu Na. 38, ndipu wangukumana ndi munthukazi munyaki yo wangwamba kuŵerenga kapepala yaka wati walonde ŵaka. Munthukazi uyu wenga ndi ŵana wo angukayanja ukongwa kapepala yaka. M’bali uyu wati wakambiskana nayu nkhani za m’kapepala kenaka, wangumukonkhoske so za Webusayiti yidu yo yikulembeka papeji lakumaliya. M’bali wanguwona kuti munthukazi uyu wakhumbanga kuziŵa vinandi. Mwaviyo, iyu wangumujuliya ka vidiyo kaku Kalebe pafoni kuti wawonere limoza ndi ŵana ŵaki.

Mzichi munyaki wangukambiya munthukazi yo wagwira nayu nchitu kuti te ndi Webusayiti yo ye ndi nkhani zakovya mabanja. Munthukazi uyu wanguchijula Webusayiti ya jw.org limoza ndi ŵana ŵaki. Pavuli paki, munthukazi uyu wanguchikambiya mzichi kuti ŵana ŵaki akuloŵeza sumu ya mutu wakuti, “Lalikira Mawu” yo yisanirika so pakamutu kakuti, “Jani Bwezi Laku Yehova.”

Mwaviyo, tikhumbika kuyiziŵa umampha Webusayiti yidu ndipuso tikhumbika kukopa mavidiyo, sumu kweniso vinthu vinyaki kuti tivisungi mufoni pamwenga vipangizu vinyaki. Asani mungachita venivi musuzgikengi cha kugwiriskiya nchitu Webusayiti yidu mu uteŵeti. Ichi nchidya chamampha ukongwa cho chingatiwovya kuti titeŵete Ambuya!​—Mac. 20:19.