Mugwiriskiyengi Nchitu Webusayiti Yidu mu Upharazgi​—“Kumuka Mafumbu Ngakukwaskana ndi Bayibolo”

Pa chigaŵa chakuti “Vo Bayibolo Lisambiza” cho che pa jw.org, pasanirika kamutu kakuti “Kumuka Mafumbu Ngakukwaskana ndi Bayibolo.” Asani tikungawona kali mafumbu yanga, tingalongo munthu yo tipharazgiya pa Webusayiti yidu kuti wasaniyi kwamuka kwa m’Malemba. Tingagwiriskiya so nchitu mafumbu yanga asani tikhumba kwamba kupharazgiya munthu mu uteŵeti. Tingasankha fumbu lo tiwona kuti lingakopa ŵanthu anandi m’chigaŵa chidu ndi kufumba yo titimupharazgiya kuti wakambi maŵanaŵanu ngaki, pavuli paki tingamulongo vo Bayibolo likamba kutuliya pa jw.org. Ndipu tingamukonkhoske pamwenga kumulongo mo tisaniriya nkhani. Nthowa yinyaki, nkhumukambiya kuti waŵerengi yija kwamuka pa Webusayiti. Muwolu wa wakuwonere dera munyaki watamba kukambiskana ndi munthu kuti: “Ŵanthu anandi atijifumba kuti, ‘Kumbi Chiuta ndiyu wachitiska kuti tisuzgikengi?’ Kumbi ndingakulongoni kwamuka kwa fumbu lenili kwa masekondi 51 pe?” Pavuli paki wato foni yaki ya m’manja ndi kujula nkhani yakuvwisiya yo wakukopa pa jw.org yo yimuka fumbu ili. Pakumaliya watimulongo mutu 11 wa buku la Bayibolo Lisambizanji?