Gwiriskiyani Nchitu Webusayiti ya jw.org mu Uteŵeti

Webusayiti yidu nchidya chakukhumbika ukongwa cho chingatiwovya kupharazga uthenga wamampha “ku vigoti va panupasi.” (Mac. 1:8) Ŵanthu anandi wo titiŵapharazgiya aziŵa cha mo angasaniriya webusayiti ya jw.org. Yiwu asaniya webusayiti yeniyi asani mupharazgi waŵalongo.

Wakuwonere dera munyaki wakukope mu foni yaki ya m’manja vidiyo yakuti, Nchifukwa Wuli Tikhumbika Kusambira Bayibolo? ndipu asani wakumana ndi ŵanthu akuvwisiya watiŵalongo. Mwakuyeruzgiyapu, asani wapharazga kunyumba ndi nyumba wakamba kuti: “Ndikambiskana ndi ŵanthu kuti ndiŵawovyi kusaniya kwamuka kwa mafumbu ngatatu ngakukhumbika ukongwa ngakuti: Nchifukwa wuli pacharu chapasi pe masuzgu nganandi viyo? Kumbi Chiuta wangamalisengi wuli? Nanga tingachita wuli kuti tikunthiyepu pasonu panu? Kavidiyo yaka kamuka mafumbu ngenanga.” Iyu watamba kuwonesa vidiyo ndipu wawona mo mweneku wanyumba wachitiya. Vidiyo iyi njakunozga ukongwa ndipu ŵanthu anandi akhumba cha kulekezga kuyiwonere. Pavuli paki wakuwonere dera wakambiya mweneku wanyumba kuti: “Nge mo mwavwiya kuti mungapempha kusambira Bayibolo pa Intaneti, ndingakulongoni mo tichitiya.” Asani mweneku wanyumba wazomera, watimulongo mo tisambiriya Bayibolo ndi ŵanthu mwakugwiriskiya nchitu kabuku ka Uthenga Wamampha. Ndipu asani ngwakutangwamika, wakambiskana nayu kuti wazimulongo pa ulendu wakuweriyaku. Pa nyengu yo mubali yo wapumuwa kuti waguli vakumwa vakuzizirisa kukhosi, wachita so venivi ndi munthu yo waja nayu pafupi asani wakambiskana nayu mwakufwatuka. Kumbi yimwi mugwiriskiya nchitu Webusayiti ya jw.org mu uteŵeti?