Vo Akuŵerenga Afumba

Ntchifukwa wuli ntchakukanizgika kuŵika mabuku nga Akaboni aku Yehova pa mawebusayiti nganyaki?

Chifukwa chakuti tigaŵiya mabuku ngidu kwambula kutchaja mtengu, anyaki aŵanaŵana kuti kukopa ndi kuŵika mabuku ngidu pa mawebusayiti nganyaki, nkhwakuzomerezeka. Kweni kuchita viyo, nkhuswa Fundu zo Mukhumbika Kulondoa ndipu venivi vachitiska masuzgu ngakulu. Nge mo Fundu zo Mukhumbika Kulondo zikambiya, nkhwakuzomerezeka cha “kuto vinthu pa webusayiti iyi ndi kuviŵika pa Intaneti (nge pa mawebusayiti nganyaki pamwenga pamalu ngo ŵanthu angavito kwambula kusuzga.)” Ntchifukwa wuli tikanizga?

Ndi mulandu kuto vinthu pa mawebusayiti ngidu ndi kuviŵika pa mawebusayiti nganyaki. Ŵanthu akugaruka kweniso anyaki, aŵika mabuku ngidu pa mawebusayiti ngawu kuti alandizgi Akaboni aku Yehova kweniso ŵanthu anyaki. Yiwu aŵika vinthu ivi pa mawebusayiti yanga kuti ŵanthu akayikiyengi vo visanirika pa mawebusayiti ngidu. (Sumu 26:4; Nthanthi 22:5) Anyaki agwiriskiya ntchitu vinthu vo visanirika mu mabuku ngidu pamwenga kasayini ka webusayiti yidu ya jw.org kuti asaskiyi malonda ndipu anyaki aŵika kasayini yaka mu ma app nga mu foni. Mwakuzomerezeka ndi marangu nga boma, te ndi mazaza ngakutore ŵanthu kukhoti kuti aleki kugwiriskiya ntchitu mwambula kwenere vinthu vosi va pa webusayiti yidu. (Nthanthi 27:12) Kweni asani tingazomereza ŵanthu, chinanga angaŵa abali ndi azichi, kuti aŵikengi vinthu vidu pa mawebusayiti nganyaki pamwenga kugwiriskiya ntchitu kasayini ka jw.org kusaskiya malonda, akhoti angatiwovya cha asani tikhumba kukanizga ŵanthu akususka ndi amalonda.

Kukopa mabuku pamawebusayiti nganyaki kungaŵa kwakofya. Yehova wakupaska udindu wakupereka chakurya chauzimu kwa “kapolu wakugomezgeka ndi wazeru” pe. (Mate. 24:45) “Kapolu” uyu wagwiriskiya ntchitu mawebusayiti ngaki pe pakupereka chakurya chauzimu. Mawebusayiti yanga ndi www.jw.org^®, tv.jw.org^®, ndi wol.jw.org^®. Kweniso te ndi ma app ngatatu pe ngakuzomerezeka nga pa foni ndi vipangizu vinyaki. Ma app yanga ndi JW Language^™, JW Library^®, ndi JW Library Sign Language^™. Tigomezga kuti palivi munthu yo wangasintha vo visanirika pa mawebusayiti ndi ma app yanga pamwenga kuvigwiriskiya ntchitu pakusaska malonda. Tikhumbika cha kupanga dawunilodi chakurya chauzimu pa mawebusayiti nganyaki, chifukwa vingachitika kuti akusinthamu vinthu vinyaki.—Sumu 18:26; 19:8.

Kweniso kuŵika mabuku ngidu pa mawebusayiti ngo ngazomereza ŵanthu kukamba maŵanaŵanu ngawu, kungapaska mwaŵi akugaruka ndi ŵanthu anyaki kuti asuskengi gulu laku Yehova. Ivi vingachitiska kuti ŵanthu akayikiyengi vo gulu lisambiza. Abali anyaki amukaku asani ŵanthu asuska Akaboni pa Intaneti. Venivi vichitiska kuti ŵanthu anyozengi zina laku Yehova. Kukambiskana ndi ŵanthu pa Intaneti ndi nthowa yamampha cha ‘yakulunguchizgiya mwakuzika ŵanthu wo atitisuska.’ (2 Timo. 2:23-25; 1 Timo. 6:3-5) Viwoneka so kuti ŵanthu anyaki ajulisa maakaunti ngaboza pa Intaneti mu zina la Akaboni aku Yehova, Wupu Wakulongozga kweniso abali a mu wupu uwu. Kweni palivi munthu wa mu Wupu Wakulongozga yo we ndi webusayiti yaki pamwenga akaunti pamalu ngakucheziyapu nga pa Intaneti.

Kuziŵisa ŵanthu za jw.org kutovya kupharazga “uthenga wamampha.” (Mate. 24:14) Vinthu vapafoni pamwenga pa tabuleti vo tigwiriskiya ntchitu mu uteŵeti ativinozga so nyengu zosi. Tikhumba kuti munthu weyosi wayanduwengi navu. Nge mo Fundu Zo Mukhumbika Kulondo zikambiya, mungamutumiziya munthu buku pa foni pamwenga kumutumiziya linki ya chinthu chechosi cho chisanirika pa webusayiti yidu ya jw.org. Asani tiziŵisa ŵanthu za webusayiti yidu, titiŵawovya kuziŵa ko kutuliya chakurya chauzimu, yo ndi “kapolu wakugomezgeka ndi wazeru.”