Longoni Kuti Muwonga Chawanangwa Chikulu Chaku Chiuta
1. Nchifukwa wuli titimuwonga ukongwa Yehova?
1 Pa ‘vawanangwa vamampha’ vinandi vaku Yehova, chawanangwa chikulu ukongwa ndi sembi ya uwombozi yo yikuperekeka ndi Mwana waki wakwanjiwa. (Yako. 1:17) Ndipu ichitiska kuti tilonde vitumbiku vinandi kusazgapu kugowokereka maubudi (Ŵaefe. 1:7) Pachifukwa ichi, titimuwonga ukongwa Yehova nyengu zosi. M’nyengu ya Chikumbusu, tipatuwa nyengu yakurungurukiya pa chaŵanangwa chamampha ukongwa ichi.
2. Kumbi tingawovya wuli banja lidu kuti lije ndi mzimu wakuwonga sembi ya uwombozi?
2 Wovyani Banja Linu Kuti Liŵi ndi Mzimu Wakuwonga: Kuti muwovyi banja linu kuwonga, mu masabata ngakufupi ndi Chikumbusu cho chichitikengi pa March 30, mungakhoza kugwiriskiya nchitu nyengu yinu ya Kusopa kwa pa Banja kwa mazulu, pakukambirana nkhani zakukwaskana ndi uwombozi. Kweniso ŵerengani ndi kukambirana Malemba nga m’Bayibolo ngakunozgeke Chikumbusu zuŵa lelosi nge banja. Weyosi watenere kurunguruka pa mo wayanduliya ndi sembi ya uwombozi ndipuso mo yakwaskiya mo wawone Yehova, mo watijiwone, mo wawone anyaki ndipuso munthazi. Chingaja so chakovya kuti musambirengi sumu ziŵi zasonu, nambala 8 ndi 5, zo zigwiriskikiyengi nchitu pa chikumbusu.—Sumu 77:12.
3. Kumbi tingalongo wuli kuti tiwonga?
3 Mo Tingalongole Kuti Tiwonga: Kuwonga sembi ya uwombozi kutitichitiska kuti tikambiyengi anyidu zaku Yehova ndi chanju chaki chikulu pakutuma Mwana waki. (Sumu 145:2-7) Mu myezi ya March, April, ndi May, mabanja nganyaki ngalongo kuwonga mwakupanga manozgeru ngakuti munthu yumoza wa m’banja lo wachiteku upayiniya wakovya. Asani ivi vingakusuzgani, kumbi mungakhoza ‘kujiwombole nyengu’ yakuti muchiti vinandi mu uteŵeti? (Ŵaefe. 5:16) Kuwonga kutichitiskengi so kuti tiwovyi ŵanthu anyaki kuti azisaniriki nasi pa Chikumbusu. (Chivu. 22:17) Yambani kulemba mazina nga ŵanthu wo mukuŵapharazgiyapu, masambiru nga Bayibolo, achibali, akugwira nawu nchitu ndipuso azengezgani wo mukhumba kuŵadana, kuti muzigwiri mwakukwana nchitu yapade yakudaniya ŵanthu ku Chikumbusu.
4. Kumbi nyengu ya Chikumbusu tingayigwiriskiya nchitu mwazeru munthowa nizi?
4 Nyengu ya Chikumbusu yititipaska mpata wamampha wakulongole Yehova kuti tiwonga chawanangwa cho wakupaska mtundu wa ŵanthu. Mwaviyo, tiyeni tigwiriskiyi nchitu nyengu yeniyi kuti tikuzgi ndi kulongo kuwonga sembi ya uwombozi ndi “usambasi wambura mapenjeka waku Khristu.”—Ŵaefe. 3:8.