Kumbi Mwaŵi Uwu Mwazakuwugwiriskiya Nchitu?
Chikumbusku cha Chaka Chinu Chitiwovyengi Kulongo Kuwonga
1. Kumbi ndi mwaŵi wapade nuwu wo tazamuja nawu pa nyengu ya Chikumbusku?
1 Chikumbusku cho chazamuchitika pa April 14, chitipaskengi mwaŵi wapade wakulongo kuti tiwonga Yehova chifukwa cha umampha waki. Nkhani yo ye pa Luka 17:11-18, yilongo mo Yehova ndi Yesu awone nkhani ya kuwonga. Chakupaska chitima nchakuti pa ŵanthu amakhati 10 wo anguchizgika, yumoza pe ndiyu wanguluta kuchiwonga. Kunthazi uku, sembi yaku Yesu yazamuchitiska kuti ŵanthu azichizgiki nthenda zosi ndipu azamuja ndi umoyu kwamuyaya. Tikayika cha kuti zuŵa lelosi tazamuwonga Yehova chifukwa cha vitumbiku venivi. Kweni kumbi masabata ngatuza yanga, tazamulongo wuli kuti titimuwonga?
2. Kumbi tingalongo wuli kuti tiwonga sembi yaku Yesu?
2 Lutirizgani Kuja ndi Mtima Wakuwonga: Kuti munthu waje ndi mtima wakuwonga, watenere kuŵanaŵaniya dankha. Ndondomeku yakuŵerenge Bayibolo pa nyengu ya Chikumbusku yisanirika m’mabuku nga Chichewa nge Kalendala ya Mboni za Yehova ndi Kuphunzira Malemba Tsiku ndi Tsiku. Kweniso yiŵikikengi pa Webusayiti yidu ya jw. org, Chikumbusku chechendachitiki. Ndondomeku iyi yitiwovyengi kuti tije ndi mtima wakuwonga. Mungachita umampha ukongwa kukambiskana nkhani iyi nge banja. Kuchita ivi, kungatiwovya kuti tilutirizgi kuja ndi mtima wakuwonga. Kweniso kungatiwovya kuja ndi jalidu lamampha.—2 Ŵakor. 5:14, 15; 1 Yoh. 4:11.
3. Kumbi tingalongo wuli mtima wakuwonga pa nyengu ya Chikumbusku?
3 Longoni Kuti Muwonga: Munthu wakuwonga walongo ndi vakuchita vaki. (Ŵakol. 3:15) Munthu wamakhati yo wanguchizgika wangwesesa kuwerere ndi kuchiwonga kwaku Yesu. Tikayika cha kuti wangukambiya so anyaki mo wanguchizgikiya mwakutondweska. (Luka 6:45) Kumbi nasi tigwirengi ndi mtima wosi nchitu yakudaniya ŵanthu ku Chikumbusku kuti tilongo kuwonga? Kuchita upayiniya wakovya pamwenga kusazgiyaku nyengu yo tipharazgiya pa nyengu ya Chikumbusku, ndi nthowa yamampha yo tingalongole kuti tiwonga. Pa zuŵa la Chikumbusku, mtima wakuwonga wazakutichitiska kuti tilonde alendu wo azamufika ndi kuja akunozgeka kumuka mafumbu ngawu.
4. Kumbi tingachita wuli kuti tizileki kudandawula asani Chikumbusku chakapu?
4 Kumbi Chikumbusku ichi chiŵengi chakumaliya? (1 Ŵakor. 11:26) Tiziŵa cha, kweni cho tiziŵa nchakuti asani chikumbusku ichi chingaŵa chakumaliya, tazamuŵavi so mwaŵi wakulongo kuti tiwonga. Kumbi mwaŵi uwu mwazakuwugwiriskiya nchitu? Tiyeni tiyesesengi kuti vo tilongoro kweniso vo tilunguruka mu mtima, vikondweskengi Yehova, yo Wakutipaska sembi yaku Yesu.—Sumu 19:14.