Ulongozgi Kwaku wo Akamba Nkhani pa Unganu wa Uteŵeti
Kwambiya ndi Uteŵeti Widu wa Ufumu wenuwu, kalembedu ka ndondomeku ya Unganu wa Uteŵeti kasintha. Ulongozgi ndi vikumbusu vo valembeka viserengi m’malu mwa ulongozgi wo wengapu kali ndipu ukonkhoska mwakuvwika umampha vo vikulembeka m’nkhani yakuti, “Kumbi tinganozgeke wuli unganu wa uteŵeti?” yo ye mu Uteŵeti Ŵidu wa Ufumu wa Chichewa wa May 2009.
◼ Nkhani: Nkhani iyi yituliya m’mabuku ngakupambanapambana ndipu njakukhumbika cha kuti akuvwisiya amukepu. Wakukamba nkhani, watenere kuŵika ukongwa maŵanaŵanu ngaki pa fundu zo ziwovyengi ukongwa mpingu.
◼ Nkhani ya Mafumbu ndi Kwamuka: Nkhani iyi iyananaku ndi Sambiru la Nsanja ya Olonda, ndipu mazu ngakwamba ndi ngakumaliya ngatenere kuja ngafupi ndipuso mafumbu ngafumbika pa ndimi yeyosi. Wakukamba nkhani watenere kukambapu vinthu vinandi cha. Malemba ngo ngakoliyanaku ukongwa ndi nkhani ngangaŵerengeka asani mwe ndi nyengu. Mungaŵerenganga cha ndimi, pijapija asani akukambiyani kuti muŵerengi.
◼ Nkhani Yakukambiskana: Nkhani iyi njakukhumbika kuti akuvwisiya amukengepu. Ndi nkhani yakukamba munthu yimoza waka cha kweniso nyengu zosi nja mafumbu ndi kwamuka pe cha.
◼ Vakuyeruzgiyapu ndi Kufumba: Mubali yo wapaskika nkhani yo yikhumbika “chakuyeruzgiyapu” ndiyu we ndi udindu wakusaniya ŵanthu akuti achiti chakuyeruzgiyapu cho. Watenere kuchita ndiyu cha chakuyeruzgiyapu. Wo waŵasankha kuti amuwovyi, atenere kuja ŵanthu wo angafiska kukonkhoska umampha fundu yo yikhumbika ndipuso atenere kuŵa ndi jalidu lamampha ndipu iyu watenere kupangana nawu kweche nyengu asani nkhwamachitika. Nkhwamampha cha kugwiriskiya nchitu apharazgi asonu kuti achiti chakuyeruzgiyapu cha mo mungachitiya mu uteŵeti chifukwa chakukhumba waka kuti nawu aluteku pa pulatifomu, chinanga kuti anyaki angagwiriskikiya nchitu nge ŵeneku a nyumba. Apharazgi wo achita chakuwoniyapu atenere kulereska akuvwisiya. Ŵanthu wo “afumbikengi” atenere kuchimukiya papulatifomu m’malu mwakumukiya pa malu ngo aja. Mutenere kuyesere vakuyeruzgiyapu ndi kufumba. Asani nyengu yamala, mubali watenere kukamba nkhani yaki mwakudumuwa, ivi vimuwovyengi kuti waleki kutuzgapu vakuyeruzgiyapu ndi kufumba. Ateŵeti akovya atenere kufumba wakukumaniska nchitu za wupu wa ŵara pamwenga mura munyaki ŵechendasankhi ŵanthu wo angachita chakuyeruzgiyapu.
Asani pe nkhani inyaki yo ye ndi ulongozgi wapade, mutenere kuwulondo mwakuphwere. Asani abali akamba nkhani pa Unganu wa Uteŵeti mwakulondo ulongozgi wo wakonkhoskeka, viwovyengi kuti Maunganu nga Uteŵeti ngalutiriyi kuchitika ‘mwaulemu ndi mwadongosolu.’—1 Ŵako. 14:40.