Maunganu Ngakunozgeke Uteŵeti Ngatitiwovya Kuti Tigwirengi Umampha Nchitu Yakupharazga

1. Kumbi maunganu ngakunozgeke uteŵeti ngatitiwovya wuli?

¹ Nyengu yinyaki, Yesu wangukumana dankha ndi akusambira ŵaki 70 ŵechendaluti kuchipharazga. (Luka 10:1-11) Iyu wanguŵachiska ndipuso wanguŵakumbuska kuti Yehova, yo ndi “Mbuya wa chivuna” waŵalongozgengi. Wanguŵapaska so ulongozgi wa mo atingi achitiyengi nchitu yo wanguŵatuma ndipuso wanguŵagaŵa “ŵaŵi ŵaŵi.” Mazuŵa nganu napu, maunganu ngakunozgeke uteŵeti ngatitichiska kweniso ngatitiwovya kuti tigwirengi umampha nchitu yakupharazga.

2. Kumbi unganu wakunozgeke uteŵeti utenere kuchitika kwa nyengu yitali wuli?

² Nyengu yosi iyi, unganu wakunozgeke uteŵeti wachitikanga maminiti 10 pamwenga 15. Ivi vasazgangapu kugaŵana, kusankha chigaŵa chakuchipharazgaku ndipuso rombu. Kweni sonu pe kusintha. Kwambiya mu April, unganu uwu utenere cha kujumpha maminiti 7. Ndipu asani uchitika pavuli pa maunganu nga mpingu, utenere kuchitika mwakudumuwa ukongwa chifukwa ŵanthu aja kuti ayanduwa kali ndi fundu za m’Malemba zo asambira. Kuchita unganu uwu mwakudumuwa kuwovyengi apharazgi kuti amaliyengi nyengu yinandi mu uteŵeti. Asani apharazgi ndipuso apayiniya ayambapu kali kupharazga, unganu uwu utenere kuchitika so mwakudumuwa.

3. Kumbi maunganu ngakunozgeke uteŵeti ngatenere kuchitika wuli kuti apharazgi wosi ayanduwengi?

³ Maunganu ngakunozgeke uteŵeti ngatenere kuchitika munthowa yakuti apharazgi wosi ayanduwengi. Mwakuyeruzgiyapu, m’mipingu yinyaki achita unganu uwu m’magulu, m’malu mwakuchitiya pamoza. Ivi vitovya apharazgi kuti aleki kwenda mtunda utali pakuluta ko achitiya unganu uwu kweniso ko amupharazga. Apharazgi agaŵika mwambula kusuzga ndipuso akuwonere magulu asuzgika cha kuwovya mupharazgi weyosi pakuyija. Wupu wa ŵara ungakambiskana kuti uwoni vo angachita malinga ndi mo vinthu viliri. Mwechendamalizi unganu uwu ndi rombu lakudumuwa, weyosi watenere kuziŵiya limu ko mwamupharazga kweniso munthu yo wayendengi nayu.

4. Nchifukwa wuli unganu wakunozgeke uteŵeti ngwakukhumbika ukongwa nge maunganu ngosi nga mpingu?

⁴ Unganu Uwu Ngwakukhumbika Ukongwa nge Maunganu Ngosi nga Mpingu: Mbapharazgi wosi cha wo angasanirika pa unganu wakunozgeke uteŵeti chifukwa uchitika kuti uwovyi wo amupharazga. Kweni titenere kuziŵa kuti, unganu uwu nawu ngwakukhumbika ukongwa nge maunganu ngosi nga mpingu. Mwakuyanana ndi maunganu nga mpingu, unganu uwu nawu nchawanangwa chakutuliya kwaku Yehova ndipu utitiwovya kuti tiyanjanengi ndipuso tichiskanengi pa nchitu zamampha. (Ŵah. 10:24, 25) Yo wachitiskengi unganu uwu wakhumbika kunozgeke umampha kuti wo amupharazga ayanduwi. Mwaviyo, apharazgi wosi wo aluta mu uteŵeti atenere kusanirikapu pa unganu uwu.

Unganu wakunozgeke uteŵeti ngwakukhumbika ukongwa nge maunganu ngosi nga mpingu

5. (a) Kumbi wakuwonere uteŵeti we ndi udindu wuli? (b) Kumbi mzichi wangachitiska wuli unganu wakunozgeke uteŵeti?

⁵ Wakuchitiska Wakhumbika Kunozgeke: Kuti munthu wakakambi umampha nkhani pa maunganu nga mpingu, wakhumbika kupaskikiya limu kweche nyengu. Ivi vitimuwovya kuti wanozgeke mwakukwana. Mwakuyana ŵaka, wakuchitiska unganu wakunozgeke uteŵeti nayu wakhumbika kupaskikiya limu kweche nyengu kuti wanozgeke mwakukwana. Asani magulu nga uteŵeti ngaungana pakungija, akuwonere magulu pamwenga wo atiŵawovya ndiwu atenere kuchitiska unganu uwu. Kweni asani mpingu wosi uchitiyengi pamoza unganu wakunozgeke uteŵeti, wakuwonere uteŵeti ndiyu watenere kusankha yo wangachitiska unganu uwu. Akuwonere uteŵeti anyaki alembe limu ndondomeku ndipu atiŵapaska wo achitiskengi kweniso yinyaki atiyiŵika pabolodi la mpingu. Wakuwonere uteŵeti watenere kuchita vinthu mwazeru asani wasankha wo angachitiska unganu uwu. Ndipuso watenere kukumbuka kuti malusu nga ŵanthu wo wangasankha ngangawovya kuti apharazgi ayanduwi. Asani palivi mura, mteŵeti wakovya pamwenga m’bali wakubatizika yo wangachitiska unganu uwu, wakuwonere uteŵeti wangasankha mzichi wakubatizika wakwenere kuti ndiyu wachitisiki.—Wonani nkhani yakuti, “Asani Mzichi Ndiyu Wachitiskengi Unganu Wakunozgeke Uteŵeti.”

6. Nchifukwa wuli wakuchitiska unganu wakunozgeke uteŵeti wakhumbika kunozgeke umampha?

⁶ Asani tapaskika nkhani mu Sukulu ya Uteŵeti Waku Chiuta pamwenga mu Unganu wa Uteŵeti, tinozgeke mwakukwana. Mbamanavi wo aleka kunozgeke mpaka pa zuŵa la maunganu. Mwakuyana ŵaka, titenere so kunozgeke vo tamukamba asani tapempheka kuti tikachitiski unganu wakunozgeke uteŵeti. Pakuti unganu uwu sonu uchitikengi kwa nyengu yimanavi, wakuchitiska weyosi wakhumbika kunozgeke umampha kuti ŵanthu ayanduwengi ndipuso waleki kurya nyengu. Kunozgeke umampha kusazgiyapu kuziŵiya limu chigaŵa cho mwamupharazgaku.

7. Kumbi ndi vinthu nivi vinyaki vo mungakambiskana pa unganu wakunozgeke uteŵeti?

⁷ Vo Mungakambiskana: Chifukwa chakuti vigaŵa vipambana, muŵanda wakugomezgeka wapereke limu cha ndondomeku ya vo mungakambiskana sabata yeyosi pa unganu wakunozgeke uteŵeti. Bokosi lakuti “Vo Mungakambiskana pa Unganu Wakunozgeke Uteŵeti,” le ndi fundu zinyaki zo mungakambiskana. Nyengu zosi, unganu uwu utenere kuchitika mwakukambiskana. Mungasankha so kuchita chakuwoniyapu pamwenga mungawonere kavidiyo kakukwaskana ndi uteŵeti ka pa jw.org. Wakuchitiska watenere so kuŵanaŵaniya vo vingawovya wo aluta mu uteŵeti pa zuŵa lo.

Pakunozgeke uteŵeti, wakuchitiska watenere so kuŵanaŵaniya vo vingawovya wo aluta mu uteŵeti pazuŵa lo

8. Kumbi ndi vinthu wuli vo mungakambiskana pa unganu wakunozgeke uteŵeti pa Chisulu ndi pa Sabata?

⁸ Pa Chisulu, apharazgi anandi agaŵiya Chigongwi cha Alinda ndipuso Galamukani! Anandi wo aluta mu uteŵeti pa Chisulu, aŵavi mpata mkati mwa sabata ndipu angaluwa vo angunozgeke pa Kusopa kwa Pabanja. Mwaviyo, vingaja umampha kuti wakuchitiska wagwiriskiyi nchitu masachizgu nga vo mungakamba ngo ngasanirika papeji lakumaliya la Uteŵeti Widu wa Ufumu. Mungakambiskana so nkhani zinyaki zo zachitika pambula kuswera m’chigaŵa chinu pamwenga zakukwaskana ndi maholidi kuti muwoni mo mungazigwiriskiya nchitu pakugaŵiya magazini. Kweniso mungakambiskana vo mungakamba kuti muziweriyeku kwaku wo alonde magazini. Asani apharazgi anyaki ayambapu kali kugaŵiya magazini nga mwezi wo, wakuchitiska wangaŵafumba kuti akonkhoski vo yiwu atanja kukamba pakugaŵiya magazini pamwenga vinthu vakukondwesa vo vaŵachitikiyapu. Pa Sabata, wakuchitiska wangachita so viyo ndi mabuku nganyaki ngo mugaŵiya mwezi wo. Nyengu yeyosi mungagaŵiya timabuku takusambiziya nge Uthenga Wamampha ndipuso Vwiyani Chiuta kweniso buku la Bayibolo Lisambizanji. Mwaviyo, wakuchitiska unganu uwu wangakonkhoska mwakudumuwa mo mungagaŵiya vinthu venivi.

9. Kumbi mungakambiskana vinthu wuli pa Chisulu ndi pa Sabata asani mugwira nchitu yapade?

⁹ Asani pa Chisulu pamwenga pa Sabata mpingu ugwira nchitu yapade, nge yakugaŵiya timapepala takudaniya ŵanthu ku Chikumbusku pamwenga ku unganu, wakuchitiska unganu uwu wangakonkhoska mo tingagaŵiya magazini limoza ndi timapepala. Wangakamba so vo tingachita asani munthu wakhumba kuziŵa vinandi kutuliya m’Bayibolo. Mungakambiskana so vakuchitika vo vilongo kukhumbika kwa nchitu yapade yo mugwira.

10, 11. Nchifukwa wuli apharazgi nawu akhumbika kunozgeke unganu uwu?

¹⁰ Mupharazgi Weyosi Wakhumbika Kunozgeke: Apharazgi nawu angawovya kuti unganu wakunozgeke uteŵeti wakumunda uje wakukondwesa. Angachita ivi mwakunozgeke limu pa Kusopa kwa Pabanja kuti asaniyi fundu zo angachikambiyaku apharazgi anyawu. Tikhumbika so kutole limu magazini ndi mabuku unganu uwu wechendayambi kuti tileki kuswera kuluta ko tamupharazga.

¹¹ Tikhumbika so kufika mwaliŵi. Mbuneneska kuti tiyesesa kufika mwaliŵi pa maunganu nga mpingu. Kweni tingatimbanyizga anyidu asani tifika mwakuswera pa unganu wakunozgeke uteŵeti. Kumbi vingachitika wuli venivi? M’bali yo wachitiska unganu uwu waŵanaŵaniya vinthu vinandi wechendagaŵi ŵanthu. Mwakuyeruzgiyapu, asani pe apharazgi amanavi, iyu wangasankha kuti wosi aluti kuchigaŵa cho alutaku kaŵikaŵi cha. Asani apharazgi anyaki ayenda pasi pakuza ku unganu uwu ndipu chigaŵa cho amupharazgaku che kutali, wangaŵapempha kuti ayendi ndi wo ŵaza pagalimotu. Asani chigaŵa cho amupharazgaku nchakofya, wakuchitiska wangasankha kuti abali ayende limoza ndi azichi. Apharazgi wo atama wangaŵapempha kuti akapharazgengi pamsewu pamwenga kunyumba zo zilivi masitepusi. Apharazgi asonu angapempheka kuti ayende limoza ndi apharazgi wo aziŵa vinandi. Kweni asani apharazgi anyaki afika mwakuswera, wakuchitiska wangayamba so kugaŵa. Mbuneneska kuti nyengu zinyaki pangaŵa vifukwa vakuvwika vo tingaswere. Kweni asani nyengu zosi tiswera, tingajifumba kuti, kumbi nchifukwa chakuti nditiwudelera unganu wakunozgeke uteŵeti, pamwenga nchifukwa chakuti nditondeka kunozgeka mwaliŵi kunyumba?

12. Kumbi mutenere kuŵanaŵaniya fundu nizi asani mupenja kupangana ndi munthu kuti muyendi nayu?

¹² Unganu wakunozgeke uteŵeti wechendayambi, mupharazgi wangapangana ndi munyaki kuti ayende limoza pamwenga wangachita kupaskika munthu wakuti wayendi nayu. Asani kanandi mupangana ndi munthu kuti muyendengi nayu mu uteŵeti, vingaja umampha kuti nyengu zinyaki muyendengeku so ndi ŵanthu akupambanapambana. (2 Ŵakor. 6:11-13) Nyengu zinyaki mungapangana ndi mupharazgi wasonu ndi chilatu chakuti mumuwovyi kuti wasambizengi mwalusu. (1 Ŵakor. 10:24; 1 Tim. 4:13, 15) Mutenere kulondo vo wakuchitiska unganu uwu wakukambiyani, kusazgapu malu ngo mwamukwambiya kupharazga. Asani unganu uwu wamala, tikhumbika kusoka mwaliŵi ndipu titenere cha kusintha munthu yo atigaŵiya kuti tiyendi nayu.

13. Kumbi unganu wakunozge uteŵeti ungatiwovya wuli?

¹³ Akusambira 70 wo Yesu wanguŵatuma kuti akagwiri nchitu yakupharaza “anguwe ndi chimwemwi.” (Luka 10:17) Tikayika cha kuti nchitu yawu yingwenda umampha chifukwa chakuti Yesu wangukambiskana dankha nawu ŵechendaluti kuchipharazga. Nasi mazuŵa nganu tingayanduwa ukongwa ndi unganu wakunozgeke uteŵeti. Asani tosi titijipereka ndi kuchita vo tingafiska, unganu uwu ungatiwovya kuti tigwirengi umampha nchitu yidu yakuchitiya ‘ukaboni ku ŵanthu amitundu yosi.’—Mat. 24:14.

Asani Mzichi Ndiyu Wachitiskengi Unganu Wakunozgeke Uteŵeti

Asani mzichi ndiyu wachitiskengi unganu uwu, watenere kuvwala thawulu pamwenga chinthu chinyaki kumutu ndipuso watenere kuja pasi. Vo wakambengi pa unganu uwu vitenere kuyanana ndi vo m’bali watingi wakambengi. M’malu mwakuchita nge wasambiza, iyu watenere kuchitiska unganu uwu munthowa yakukambiskana. Asani wapempha mzichi munyaki wakubatizika kuti warombi, mzichi yo wapempheka watenere so kuvwala thawulu pamwenga chinthu chinyaki kumutu. Asani paza m’bali wakubatizika, mzichi yo wachitiska unganu uwu watenere kuleke m’bali yo kuti ndiyu wamalizi kuchitiska unganu wo. Wakuwonere uteŵeti wakhumbika kuwone limu vapanthazi ndipu watenere kupereka ulongozgi kuti vinthu vizileki kutimbanyizgika. Mwakuyeruzgiyapu, pa unganu wakunozgeke uteŵeti wo mzichi wachitiska pangasanirika m’bali wakubatizika yo wechendakwanisi vyaka 14, kweni ŵara awona kuti wangachitiska cha unganu uwu. Pa vakuchitika nge ivi, wakuwonere uteŵeti watenere kuziŵiska wosi wo azamusanirika pa unganu uwu kuti mzichi ndiyu wazamuchitiska, kweni m’bali yo wangaziromba asani ŵara awona kuti wangafiska. Vingachitika kuti pa unganu uwu pangasanirika m’bali wavyaka vakujumpha 14, kweni ngwakwenere cha kuchitiska unganu pamwenga kuromba ku mpingu pa vifukwa vo ŵara aziŵa. Asani veviyo, mura watenere kukambiya mzichi kuti ndiyu wazichitiski unganu uwu ndipuso kupereka rombu kweni watenere cha kumukambiya vo m’bali yo wakunanga. Ŵara atenere so kumukambiya limu m’bali yo mazuŵa ngo azichi azamuchitiskiya unganu uwu.

Vo Mungakambiskana pa Unganu Wakunozgeke Uteŵeti:

Masachizgu nga vo mungakamba nga mu Uteŵeti Widu wa Ufumu.
Kavidiyo ka pa jw.org kakukwaskana ndi uteŵeti.
Mungakambiskana so vo mupharazgi wangakamba asani watamba kukambiskana ndi munthu pamwenga kuti munthu wazomeri ulendu wakuweriyaku kweniso vakukwaskana ndi chawanangwa cho munthu wangapereka asani walonde mabuku.
Lemba lo likoliyana ndi nchitu yakupharazga.
Vakuchitika va mu uteŵeti vo ve m’mabuku ngidu pamwenga vo vachitikiya apharazgi mumpingu winu.
Nkhani zinyaki za mu Uteŵeti Widu wa Ufumu.
Fundu zinyaki zapambula kuswera za mu Unganu wa Uteŵeti.
Nkhani za mu Chigongwi cha Alinda zakukwaskana ndi uteŵeti.
Nkhani zakukwaskana ndi uteŵeti za m’mabuku ngakupambanapambana nge buku la Sukulu ya Utumiki kweniso ‘Bwera Ukhale Wotsatira Wanga.’
Vinthu vinyaki va pa jw.org vo tingagwiriskiya nchitu mu uteŵeti.
Vinthu vinyaki va m’Bayibolo lasonu la New World Translation vo tingagwiriskiya nchitu mu uteŵeti.
Mo tingapharazgiya Ahindu, Abuda, ŵanthu wo agomezga kuti Chiuta kulivi ndipuso wo agomezga kuti vinthu vikuchita kusambuka.
Mo tingamukiya munthu yo wakana kumupharazgiya.
Mo tingawovye yo tayenda nayu mu uteŵeti.
Vo tingachita asani takumana ndi munthu yo walongoro chineneru chinyaki.
Mo tingapharazgiya munthowa zakupambanapambana nge pa foni kweniso m’malu ngo musanirika ŵanthu anandi, mo tingachitiya maulendu ngakuweriyaku ndipuso masambiru nga Bayibolo.
Mo tingasinthiya upharazgi widu, kuchita vinthu mwakuphwere mu uteŵeti, kulongo mijalidu yamampha, kuleka kwanjiya pakupharazga ndipuso fundu zinyaki.