Mo Tingayanduliya ndi Kagulu Kidu ka Uteŵeti
1. Kumbi ndi vinthu vamampha nivi vo vachitikanga pa Sambiru la Buku la Mpingu vo vechekuchitika m’timagulu ta uteŵeti wakumunda?
1 Kumbi pe vinthu vinyaki vo vachitikanga pa Sambiru la Buku la Mpingu vo muwona kuti mphanyi valutirizganga kuchitika? Timagulu yiti tenga timanatimana kweniso kwenga kwambula kusuzga kucheza ndi weyosi. Ivi vachitiskanga kuti tilekengi kusuzgika kuziŵiliyana ndi ŵanthu wo angatiwovya kuti chigomezgu chidu chilutirizgi kukuwa. (Nthanthi 18:24) Wakuchitiska sambiru la buku waŵaziŵanga umampha ukongwa ŵanthu a m’kagulu kaki ndipu wawovyanga munthu weyosi pakuyija. (Nthanthi 27:23; 1 Pet. 5:2, 3) Venivi ndivu vichitika so chinanga ndi mazuŵa nganu ku timagulu ta uteŵeti wakumunda.
2. Kumbi tingachita wuli kuti tikuzgi chanju m’kagulu kidu ka uteŵeti wakumunda?
2 Yambani Ndimwi Kuchitapu Kanthu: Timagulu ta uteŵeti wakumunda natu nthimana mwakuyanana ndi mo ngenge magulu nga sambiru la buku. Kugwiriya “pamoza” nchitu yakupharazga ndi anyidu kutovya kuti tije nawu pa ubwezi wakukho. (Ŵaf. 1:27) Kumbi pa ŵanthu a m’kagulu kinu mbalinga wo mukuyendapu nawu mu uteŵeti? Kumbi ‘mungatandauwa mtima’ winu mwa kwenda ndi ŵanthu akupambanapambana? (2 Ŵakor. 6:13) Tikhoza so kudana munthu munyaki wa m’kagulu kidu kuti waziryi chakurya kunyumba kwidu pamwenga kuti wazijepu nasi pa Kusopa kwa Pabanja. M’mipingu yo yilonde alendu akuzikamba nkhani, timagulu ta uteŵeti tisinthana kuphwere mulendu yo waza. Gulu lo liphwere mulendu pa sabata yo, likumana kuti liryiyi pamoza chakurya ndi kuchiskana chinanga kuti mulendu yo wangasankha kuleka kurya nawu.
3. Kumbi tiwovyeka wuli kuziya mu kagulu kidu ka uteŵeti?
3 Chinanga kuti mazuŵa nganu maunganu ngachitika kaŵi sabata yeyosi, ving’anamuwa kuti aliska alekengi kwende abali ndi azichi cha. Wakuwonere kagulu wasankhika kuti wachiskengi ndipuso kuwovya mpharazgi weyosi pakuyija mo wangachitiya mu uteŵeti. Asani wakuwonere kagulu kinu ka uteŵeti wakumunda wechendayendepu namwi, mupempheni kuti muyendi nayu. Mwezi wewosi, m’bali wakuwonere uteŵeti nayu wapharazga ndi kagulu kamoza mu mpingu kukumaliya kwa sabata. M’mipingu yo mwe timagulu ta uteŵeti wakumunda timana wakhoza kupharazga natu kaŵi pachaka. Kumbi asani wakuwonere uteŵeti watende kagulu kinu muluta mu uteŵeti?
4. (a) Kumbi maunganu ngakunozgeke uteŵeti ngachitika wuli? (b) Kumbi nchifukwa wuli titenere kupereka nyumba zidu kuti muchitikiyengi maunganu ngakunozgeke uteŵeti wakumunda?
4 Kanandi vija umampha kuti apharazgi akumanengi ku kagulu kawu pakunozgeke uteŵeti kukumaliya kwa sabata. Asani mpingu we ndi malu ngakupambanapambana ngakunozgekiyaku uteŵeti wakumunda pa nyengu yakuyanana vitovya kuti apharazgi angayendanga mtunda utali cha pakuluta ku timagulu tawu ndi kuchigaŵa chakupharazgaku. Apharazgi anozgeke liŵi kweniso aswera cha kufika ku chigaŵa chakupharazgaku. Wakuwonere kagulu wasuzgika cha kuwovya apharazgi wo we mu kagulu kaki. Pavifukwa vinyaki, timagulu tiŵi pamwenga tinandi tinganozgeke pamoza. Asani mpingu wakumana kuti unozgeke limoza uteŵeti wakumunda pa Chisulu sabata yakwamba ya mwezi pamwenga pavuli pa Sambiru la Nsanja ya Olonda, kanandi vija umampha kuti gulu lelosi likumani so pakulija ndi chilatu chakuti wakuwonere kagulu waŵagaŵi ndi kukamba ko alutengi mwechendajali ndi rombu.—Wonani bokosi lakuti “Kumbi Mungapereka Nyumba Yinu?”
5. Chinanga kuti mazuŵa nganu tikuleka kuchita Sambiru la Buku la Mpingu, nchifukwa wuli tileka kudandawula?
5 Chinanga kuti mazuŵa nganu tikuleka kuchita Sambiru la Buku la Mpingu, Yehova weche kutipaska vosi vo vingatiwovya kuti tichiti khumbu laki. (Ŵah. 13:20, 21). Yehova watitiphwere ndipu tisoŵa kanthu cha. (Sumu 23:1) Tisaniya vitumbiku vinandi chifukwa cha timagulu tidu ta uteŵeti wakumunda. Asani titesesa ‘kumija kwawanangwa, tazamuvuna so kwawanangwa.’—2 Ŵakor. 9:6.
[Bokosi papeji 6]
Kumbi Mungapereka Nyumba Yinu?
Mipingu yinyaki yibanya magulu nga uteŵeti wakumunda kukumaliya kwa sabata chifukwa chakusoŵa nyumba zakunozgekiyamu. Maunganu ngakunozgeke uteŵeti wakumunda nchigaŵa cha vakuchitika va mpingu, mwaviyo ndi mwaŵi ukulu kuzomerezga kuti maunganu yanga ngachitikiyengi kunyumba kwinu. Kumbi mungapereka nyumba yinu? Mungachitanga soni cha chifukwa cha mo nyumba yinu yiliri. Ŵara ndiwu aziŵengi asani nyumba yinu yingagwiriskikiya nadi nchitu chifukwa cha ko yili ndipu awonengi fundu zinyaki zo awonanga pakusankha malu ngakuchitiyaku sambiru la buku. Asani mungayanja kuti nyumba yinu yigwiriskiyi nchitu kambiyani wakuwonere kagulu kinu.