Kumbi Muziŵa vo Mungasankha?

Muvipatala vinandi pacharu chapasi, achita maopaleshoni kwambula kugwiriskiya nchitu ndopa. Kumbi muziŵa umampha nthowa zo zilipu pa nkhani ya chovyu cha munkhwala chambula kugwiriskiya nchitu ndopa? Mukhumbika kuziŵa ndi chilatu chakuti musankhi chovyu cha munkhwala ndipuso opaleshoni mwakukoliyanaku ndi vo muziŵa. Kuti muziŵi vinandi vakukwasana ndi nkhani yeniyi, ŵerengani mutu 7 m’buku lakuti, Khalanibe M’chikondi cha Mulungu. Pavuli paki, weriyanimu mwarombu mu vo mwasambira mwakugwiriskiya nchitu mafumbu ngo nge mumphata umu kuti ngakuwovyeni.

(1) Kumbi chifukwa chikulu cho Akaboni aku Yehova akaniya kuŵikika ndopa nchakuti wuli? (2) Pankhani ya chovyu cha munkhwala, kumbi Akaboni aku Yehova akhumba chovyu wuli? (3) Kumbi ŵanthu wo atama ŵe ndi wanangwa wuli? (4) Nchifukwa wuli munthu watenere kuŵanaŵana umampha ndipuso kuwona kuti ndi udindu waki wakusankha munkhwala pamwenga nthowa zambula kugwiriskiya nchitu ndopa? (5) Kumbi ndi nthowa ziŵi nizi zakukhumbika ukongwa zo madokotala ngangachita asani munthu wataya ndopa zinandi? (6) Kumbi ndi vinthu wuli vo mutenere kuziŵa pa nkhani yakukwaskana ndi nthowa yeyosi yambula kugwiriskiya nchitu ndopa? (7) Kumbi maopaleshoni ngakulungakulu ndipuso ngakusuzga ngangachitika kwambula kugwiriskiya nchitu ndopa? (8) Kumbi nchinthu wuli chakukondwesa cho chichitika muchipatala?

Kuzomera nthowa zinyaki zo zakonkhoskeka m’buku la Chikondi cha Mulungu nchakusankha cha munthu weyosi pakuyija mwakukoliyanaku ndi mo njuŵi yaki yikusambizikiya Bayibolo. Kumbi mwasankha kali mtundu wa munkhwala kweniso nthowa zo imwi mukhumba kweniso ŵana winu, nanga mwazilemba pa kadi la DPA? Nkhani iyi yakonkhoskeka umampha mu Nsanja ya Olonda ya June 15, 2004, ndi ya October 15, 2000, pa mutu wakuti, “Mafunso Ochokera kwa Oŵerenga.” Mwaviyo, yiŵerengeni mwakuphwere. Kuti musankhi nthowa za munkhwala zo mukhumba, gwiriskiyani nchitu mphatika yo ye mu Uteŵeti Widu wa Ufumu wa November 2006, pa mutu wakuti “Kodi Ndimaiona Bwanji Nkhani Yokhudza Tizigawo ta Magazi ndi Njira Zachipatala Zogwiritsira Ntchito Magazi Anga Omwe?” Pakumaliya, wonesesani kuti vo mwasankha mwavilemba umampha pa khadi linu la DPA. Ŵanthu akukumiyani wo mwaŵalemba pa khadi linu ndipuso a m’banja linu wo mbakaboni cha, mutenere kuŵalongosore umampha vo mwasankha.