Phamphu Linu Lingawanga Pawaka cha
1. Kumbi lemba la 1 Ŵakorinte 9:26, ligwira wuli nchitu pa uteŵeti widu?
1 Wakutumika Paulo wangulemba kuti: “Ini ndichimbiya nge ngwakukayikakayika cha; kuti ndibakafuwa, nge ngwakukung’untha mude mwaŵaka cha.” (1 Ŵako. 9:26) Yapa, Paulo wakambanga kuti waŵikanga maŵanaŵanu ngaki pa chinthu chimoza ndipuso wayesesanga kuja ndi vilatu vauzimu. Kweni mazu yanga ngagwira so nchitu ukongwa pa uteŵeti widu. Tikhumba kuti ‘tikung’unthengi mude mwawaka cha,’ pamwenga kuti phamphu lidu lingawanga pawaka cha. Kumbi tingachita wuli venivi?
2. Kumbi tingayezga wuli Paulo ndi apharazgi anyaki a mu nyengu ya akutumika pa nkhani ya kusankha nyengu ndi malu ngo tingachipharazgaku?
2 Mulutengi ko Kusanirika Ŵanthu: Paulo ndi Akhristu anyaki a mu nyengu ya akutumika apharazganga ko kwasanirikanga ŵanthu. (Machi. 5:42; 16:13; 17:17) Asani ŵanthu anandi muchigaŵa chidu asanirika kumazulu, yingaja nyengu yamampha ukongwa yo tingalutiya kuchipharazga ku nyumba ndi nyumba. Kumbi ndi nyengu niyi yo ŵanthu atanja kuchigula vinthu kumsika? Nyengu iyi yikhoza kuja yamampha ukongwa yakuchitiya upharazgi wa mumsewu.
3. Kumbi tingachita wuli kuti phamphu lidu lileki kuwa pawaka asani tipharazga mu chigaŵa chidu?
3 Mupharazgengi Mwazeru mu Chigaŵa Chinu: Titenere so kuphwere kuti phamphu lidu lingawanga pawaka cha asani tipharazga mu chigaŵa chidu. Mwakuyeruzgiyapu, m’malu mwakuti ŵanthu anandi asere mu chigaŵa chimoza, vingaŵa umampha kugaŵa kuti gulu lije ndi ŵanthu amana, chifukwa ivi vingawovya kuti paleki kuja nchitu yikulu yakugaŵa ndi kulongozga gulu likulu. Tingachita so umampha kupempha chigaŵa chakufupi ndi ko tija kuti tileki kwendanga mtunda utali.
4. Kumbi nchinthu wuli cho chingatiwovya kuti tigwiri umampha nchitu ya ‘urovi wa ŵanthu’?
4 Yesu wanguyeruzgiya apharazgi ndi “ŵarovi ŵa ŵanthu.” (Marko 1:17) Chilatu cha murovi nkhuroŵa waka cha kweni kubaya somba. Mwaviyo, arovi wo aziŵa umampha nchitu yawu aluta ku malu ngo aziŵa kuti somba zamusanirika ndipuso nyengu yeniyo atamba kuroŵa. Yiwu agwiriskiya nchitu phamphu lawu mwazeru. Nasiso titenere kulongo phamphu lenili mu uteŵeti widu.—Ŵahe. 6:11.