“Chitiyani Ukaboni Mwakukwana”
1. Kumbi wakutumika Paulo wangulongo chakuwoniyapu chamampha nichi mu uteŵeti?
1 Paulo wangukambiya Timote kuti, “fiska uteŵeti waku.” (2 Tim. 4:5) Penga pakwenere kuti Paulo wakambi mazu yanga chifukwa chakuti kutuwa mu 47 C.E., kufika mu 56 C.E., ndipu wamaliza maulendu ngatatu nga umishonale. Buku la Machitidu lizumbuwa mwakuwerezgawerezga mazu kuti Paulo “wasimikizganga” pamwenga kuti kuchitiya ukaboni mwakukwana. (Mac. 23:11; 28:23) Kumbi tingachitiya wuli ukaboni mazuŵa nganu?
2. Kumbi tingachita wuli kuti tichitiyi ukaboni mwakukwana asani tipharazga ku nyumba ndi nyumba?
2 Kupharazga Nyumba ndi Nyumba: Kuti tipharazgiyi ŵanthu wo ŵechendavwepu uthenga wamampha, titenere kuŵayende pa nyengu zakupambanapambana. Kanandi anthurumi asanirika panyumba chakumazulu pamwenga kukumaliya kwa sabata. Tiyesesengi kuluta kaŵikaŵi kunyumba za ŵanthu wo aleka kusanirika pakhomu ndi chilatu chakuti tikambiskanengi ndi ŵanthu pa nyumba yeyosi. Kumbi tingachita wuli asani ŵanthu titiŵasaniya mbwenu cha? Tingaŵalembe kalata pamwenga kuŵambiya foni.
3. Kumbi ndi mipata niyi yo yingatiwovya kuti tipharazgengi pakweru ndipuso mwamwaŵi?
3 Kupharazga Pakweru ndi Mwamwaŵi: Mazuŵa nganu ateŵeti aku Yehova atovya ŵanthu wosi wo angavwisiya kuti aziŵi “chinjeru” cheneku. Nyengu zinyaki apharazga “mu msewu” pamwenga “mu misika.” (Nthanthi 1:20, 21) Pakuchita vinthu va zuŵa ndi zuŵa, kumbi titesa kusaniya mipata yakupharazgiya? Kumbi nasi titangwamika “ndi mazu”? (Mac. 18:5) Asani tichita viyo, ndikwesa tifiska udindu widu wakuchitiya ukaboni.—Mac. 10:42; 17:17; 20:20, 21, 24
4. Kumbi kuromba ndi kulunguruka pa mazu ngaku Chiuta kungatiwovya wuli kuti tichitiyengi ukaboni mwakukwana?
4 Nyengu zinyaki tingatondeka kuchitiya ukaboni chifukwa cha mphwayi pamwenga soni. Kweni cho titenere kukumbuka nchakuti Yehova waziŵa vo tingafiska ndi vo tingatondeka. (Sumu 103:14) Asani te ndi masuzgu ngenanga, tirombengi kwaku Yehova kuti watiwovyi kuja ndi chiganga chakuti tikambiskanengi ndi ŵanthu. (Mac. 4:29, 31) Kusambira Mazu ngaku Chiuta pakutija ndi kulunguruka pa vo tasambira, kungatiwovya kuti tilutirizgi kwanja uthenga wamampha. (Ŵaf. 3:8) Ivi vitiwovyengi kuti tiwupharazgengi mwaphamphu.
5. Kumbi tingachita wuli kuti nasi tifiski nawu uchimi waku Yoele?
5 Uchimi waku Yoele, ungukambiya limu kuti lechendazi zuŵa likulu kweniso lakofya laku Yehova, ateŵeti aku Chiuta alutirizgengi kupharazga kwambula kopa chechosi. (Yoele 2:2, 7-9) Tiyeni tiyesesi kuchita vosi vo tingafiska pakugwira nchitu yakupharazga yo yazamuchitika so cha.