Kumbi Tingajivikiliya Wuli ku Nyifwa Yakuza ndi Phungu (Maleliya)?

Mu nyengu ya chifuku titenere kuvikiliya ukongwa mabanja ngidu ku matenda nga Phungu. Kuchita viyo kulongo kuti tiwona umoyu nge mo Yehova watiwuwone. (Sumu 36:9) Akhristu atesesa kujivikiliya ku vinthu vo vingaŵika umoyu wawu pangozi chifukwa chakuti awonga chawanangwa cha umoyu chakutuliya kwaku Chiuta. Ivi visazgapu kuvwiya marangu ngo ngangawovya kuti ajivikiliyi ku matenda nge Phungu.

Matenda nga Phungu ngabaya ŵanthu anandi ukongwa, kweni wo atufwa ukongwa mbana wo ŵechendafiki vyaka 5. Kweni mabanja ngangajivikiliya ku nyifwa yakuza chifukwa cha Phungu, asani ngangayesesa kuvwiya marangu ngosi ngakukwaskana ndi kujivikiliya ku matenda yanga. A Unduna wa Vaumoyu ndi Unandi wa Ŵanthu, atitichiska kuti tigonengi mu usingiti wakubizgika mu munkhwala ndi chilatu chakuti tijivikiliyi ku Phungu. Usingiti ngwakutchipa ukongwa asani tingawuyeruzgiya ndi vo vinangika chifukwa chakugonekeka m’chipatala pamwenga kufwa kwa munthu.

Mwaviyo mitu ya mabanja yitenere kuwonesesa kuti ŵana ŵawu wosi agona mu usingiti, kweniso kuti malu ngosi ngakuzunguliya nyumba yawu ngawoneka umampha. Munyengu ya vuwa, mutenere kuwonesesa kuti balaza linu lilivi vinthu vo mungateka maji nge vimatayala, vimbali pamwenga vimazenji. Nchifukwa wuli mutenere kuchita viyo? Nchifukwa chakuti uzuzu ubaliyana mu maji ngo ngaleka kwenda.

Matenda nga Phungu ngaswera cha kubaya ŵana wo ŵechendafiki vyaka 5 asani aleka kulonde chovyu chakwenere. Mwaviyo asani muwona ŵaka kuti mwana wafunda muliŵavu, walivi khumbu la chakurya, wapesa pamwenga wawukuwa, NYENGU YENIYO, tchimbiriyani nayu ku chipatala kuti wakalonde munkhwala wa Phungu nge Coaterm (La), Artesanate pamwenga Lonart, Du-cotexin, pamwenga Quinine. Panadol ndi Cafenol ndi munkhwala wa phungu cha. Asani muswera kuluta nayu ku chipatala mwana yo watama Phungu, wakhoza kumala ndopa. Ivi vingachitiska kuti madokotala ngaŵanaŵani kuti waŵikiki ndopa chifukwa yiwu awona kuti nthowa yakuchizgiya munthu yo watama ukongwa Phungu nkhumuŵika ndopa.

Ŵara ndi ateŵeti akovya ndiwu atenere kuja panthazi kupereka chakuwoniyapu chamampha chakuphwere ŵana ŵawu. (1 Timote 5:8) Asani yiwu atimutole ku chipatala liŵiliŵi mwana wawu yo watama Phungu vingawovya kuti apapi anyaki mu mpingu nawu achitengi viyo.

Gulu linyaki la apharazgi wo asuzgika ukongwa ndi phungu, mbanthukazi wo ŵe ndi nthumbu. A Unduna wa Vaumoyu akamba kuti anthukazi wosi wo ŵe ndi nthumbu, atenere kuluta ku chipatala asani azuwuka ŵaka ndi chilatu chakuti akalonde chovyu chakujivikiliya ku matenda ngo ngachitiska kuti ŵanthu wo ŵe ndi nthumbu amalengi ndopa. Munthukazi yo waleka kutama phungu panyengu ya nthumbu wabala mwana wanthazi. (Wonani Galamukani! ya November 2009 peji 26 mpaka 29).

Pakumaliya tichiska apharazgi wosi kuti aziŵisengi ŵara a mpingu asani munthu munyaki m’banja lawu aluta nayu ku chipatala. Asani kwe nkhani yakukwaskana ndi ndopa, ŵara aziŵisengi abali wo we mu Komiti Yakukambiskana ndi Achipatala (HLC) wo angakuwovyani.

Mafumbu Ngakuweriyamu

1. Kumbi matenda nga Phungu ngakofya wuli, ukongwaukongwa ku ŵana?

2. Kumbi tingavikiliya wuli ŵanthu a m’banja lidu ku matenda nga Phungu?

3. Kumbi apapi achikhristu atenere kuchitanji asani awona kuti mwana wawoneka kuti watama Phungu?