Yezgani Achimi—Amosi
1. Kumbi chakuwoniyapu chaku Amosi chingatiwovya wuli?
1 Kumbi nyengu zinyaki titijiwona kuti te ambula kwenere kupharazga chifukwa chakuti te akavu? Asani ndi viyo, chakuwoniyapu chaku Amosi chitichiskengi ukongwa. Iyu waŵetanga mbereri ndipuso wenga mlimi kweni Yehova wangumugwiriskiya nchitu kupharazga uthenga wacheruzgu. (Amosi 1:1; 7:14, 15) Mazuŵa nganu, Yehova wagwiriskiya so nchitu akavu. (1 Ŵakor. 1:27-29) Kumbi ndi vinthu wuli vinyaki vo tingasambira kwaku Amosi vo vingatiwovya pakuteŵete Yehova?
2. Nchinthu wuli cho chingatiwovya kuti tileki kuchita mantha asani ŵanthu atitisuska mu upharazgi?
2 Mungachitanga Mantha Cha Asani Atikususkani: Amaziya, wa sembi yo wasopanga mwana wa ng’ombi, mu ufumu wa kunkhondi wa mafuku 10 nga Ayisraele wati wavwa uchimi waku Amosi, wangumudikisa ndipu wangumukambiya kuti, ‘Ruta! Thaŵiya ku charu cha Yuda! Ungachimanga so cha ku Beteli!’ (Amosi 7:12, 13) Kuti wapemphi umampha Fumu Yeroboamu kuti yikanizi nchitu yaku Amosi, Amaziya wangusintha uthenga wo Amosi wangukamba. (Amosi 7:7-11) Kweni venivi vingumuchitiska mantha cha Amosi. Mazuŵa nganu alongozgi avisopa nawu anyengere alongozgi andali kuti atombozgengi ŵanthu aku Yehova. Kweni Yehova watitisimikizgiya kuti chidya chechosi chingachita kanthu cha paku isi.—Yes. 54:17.
3. Kumbi ndi mauthenga ngakukhumbika nanga ngo tipharazga mazuŵa nganu?
3 Pharazgani Cheruzgu Chaku Chiuta Ndipuso Vithumbuku Vaki Vakunthazi: Chinanga kuti Amosi wangupharazga za cheruzgu chakukwaskana ndi ufumu wa kunkhondi wa mafuku 10 nga Ayisraele, wangumaliza buku la m’Bayibolo lo liziŵika ndi zina laki, mwakulemba layizgu laku Yehova ndipuso vitumbiku vo wazisengi. (Amosi 9:13-15) Nasi tipharazga “zuŵa la cheruzgu” laku Chiuta lo lituza, cho nchigaŵa cha uthenga “wa ufumu” wo tikhumbika kupharazga. (2 Pet. 3:7; Mat. 24:14) Paradayisu wazamuŵaku asani Yehova wazinanga ŵanthu aheni pa Aramagedoni.—Sumu 37:34.
4. Kumbi tisimikizga wuli kuti Yehova watiwovyengi kuti tifiski khumbu laki?
4 Tiyeseka ukongwa asani tipharazga uthenga wa Ufumu m’charu cho ŵanthu anandi asuska ndipu ivi vichitiska kuti tileki kuchita vinthu mwakukolerana ndi khumbu laku Yehova kweniso kujipereka kwidu. (Yoh. 15:19) Chinanga kuti ve viyo, te ndi chigomezgu chakuti Yehova walutirizgengi kutiwona kuti te akwenere kuchita khumbu laki nge mo wanguchitiya Amosi.—2 Ŵakor. 3:5.