Vinthu vo Mukhumbika cha Kuchita Asani Muchitisa Sambiru la Bayibolu

Kulongoro Vinthu Vinandi: Mukhumbika cha kumukonkhose fundu yeyosi yo ye mundimi. Yesu wagwirisiyanga ntchitu mafumbu kuti wawovyi ŵanthu kuŵanaŵaniyapu kweniso kuti asaniyi ŵija ansala. (Mat. 17:24-27) Kufumba mafumbu nkhwamampha chifukwa kungakuwovyani kuti muziŵi vo wakusambira waziŵa kweniso vo wagomeza. (be-CN 253 ndimi 3-4) Asani mwafumba fumbu mukhumbika kumulindiza mpaka po wamukiya. Asani wakusambira wamuka vaboza, mungamukambiyanga cha ansala m’malu mwaki mufumbeni so fumbu linyaki lo lingamuwovya kuti wasaniyi yija ansala yaunenesa. (be-CN 238 ndimi 1-2) Mulongorongi munthowa yakuti wakusambira wavwisisengi fundu zo mutimusambiza.—be-CN 230 ndimi 4.

Kukonkhosa Vinthu Vakusuza Kuvwisa: Mukhumbika cha kukonkhosa vinthu vosi vo muziŵa pa nkhani yo mukambisana. (Yoh. 16:12) Konkhosani waka fundu yikulu yo ye mundimi. (be-CN 226 ndimi 4-5) Fundu zinyaki zingaja zakukondwesa kweni zingabisa fundu yikulu ya nkhani yo mukambisana. (be-CN 235 ndimi 3) Asani muwona kuti wakusambira wavwisa fundu yo mukambisana, mbwenu lutani pa ndimi yinyaki.

Kukhumba Waka Kumaliza: Chilatu chidu ntchakuti tiŵafiki pamtima m’malu mwakumaliza waka mutu. (Luka 24:32) Mukonkhosengi malemba ngo nge ndi fundu zikuluzikulu kuti Mazu Ngaku Chiuta ngamuwovyi. (2 Ŵakor. 10:4; Ŵah. 4:12; be-CN 144 ndimi 1-3) Mugwirisiyengi ntchitu vakuyeruziyapu vambula kusuza. (be-CN 245 ndimi 2-4) Ŵanaŵaniyani masuzu ngo wakusambira wakumana nangu kweniso vo wagomeza ndipu muwovyeni kuziŵa mo sambiru lo lingamuwovye. Mufumbengi mafumbu nge yanga: “Kumbi mutuvwa wuli ndi vo tisambira?” “Kumbi ivi vititisambizanji vakukwasana ndi Yehova?” “Kumbi muwona kuti mungapinduwa wuli asani mungagwirisiya ntchitu ulongozi wenuwu?”—be-CN 238 ndimi 3-5; 259 ndimi 1.