Malifalensi nga Nkhani za Unganu wa Umoyu Widu Wachikhristu Ndipuso Uteŵeti
MAY 6-12
CHUMA CHAKUTULIYA MU MAZU NGAKU CHIUTA | 2 AKORINTO 4-6
“Tiwere Vuli Cha”
w04 8/15 25 ¶16-17
Tivuka, Kweni Tivukiya Limu Cha
16 Kuwonesesa kuti te akukho mwauzimu ndiku nkhwakukhumbika ukongwa pa umoyu widu. Asani te pa ubwezi wamampha ndi Yehova Chiuta, tingavuka mwakuliŵavu kweni tingavuka cha kumuteŵete. Yehova ndiyu “wapaska nthazi wakuvuka, ndipu wapereka nthazi zinandi kwaku wo alivi nthazi.” (Yesaya 40:28, 29) Wakutumika Paulo wangusimikiza kuti mazu yanga ngauneneska ndipu wangulemba kuti: “Tiwere vuli cha, kweni chinanga kuti munthu yo tili kubwalu wamala, kweni munthu yo tili mukati waja mufya zuŵa ndi zuŵa.”—2 Akorinto 4:16.
17 Wonani kuti lemba ili likamba kuti “zuŵa ndi zuŵa.” Mazu yanga ngang’anamuwa kuti zuŵa lelosi tikhumbika kugwiriskiya ntchitu vinthu vo Yehova watitipaska. Mumishonale munyaki yo wateŵete mwakugomezgeka kwa vyaka 43, nyengu zinyaki wavukanga ndipuso wakumananga ndi vinthu vakuguŵiska. Kweni wavukiyanga limu cha. Iyu wangukamba kuti: “Zuŵa lelosi ndiyuka mulenjilenji kuti ndipempheri kweniso kuti ndiŵerengi Mazu Ngaku Chiuta ndechendayambi kugwira ntchitu. Venivi vandiwovya kuti ndilutirizgi kukunthiyapu mpaka sonu.” Kukamba uneneska, tingathemba nthazi zaku Yehova asani “zuŵa ndi zuŵa” tipemphera kwaku iyu, kweniso asani tiŵanaŵaniya mijalidu yaki yapachanya ndi vo wakutilayizga.
it-1 724-725
Kukunthiyapu
Tingalekanga cha kugomezga layizgu la umoyu wamuyaya wo Chiuta wakutilayizga. Chinanga kuti ŵanthu angatiwofyeza kuti atibayengi, tilekengi cha kuja ndi chilindizga chenichi. (Aro. 5:4, 5; 1 Ate. 1:3; Chivu. 2:10) Masuzgu ngo tikumana nangu pasonu panu, ngangayanana cha ndi umoyu wamuyaya wo tilindizga. (Aro. 8:18-25) Tikamba viyo chifukwa chakuti masuzgu ngosi ngo tikumana nangu “ngakujalisa cha ndipu ngapepu” chinanga kuti ngangawoneka kuti ngakofya. (2 Akori. 4:16-18) Munthu yo waziŵa kuti masuzgu ngo tikumana nangu nga kanyengu kamanavi ndipu waŵanaŵaniya ukongwa layizgu la umoyu wamuyaya, wavukengi cha ndipuso walutirizgengi kuja wakugomezgeka kwaku Yehova Chiuta.
Kufufuza Fundu Zakuzirwa za mu Bayibolu
w12 2/1 28-29
“Mukondwesengi Yehova”
David Splane wa mu Wupu Wakulongozga wangukamba nkhani ya mutu wenuwu. (2 Akorinto 4:7) Kumbi chuma cho chizumbulika pa lemba ili ntchinthu wuli? Kumbi ndi vo tiziŵa pamwenga zeru zo tenazu? Mubali Splane wangukamba kuti ndivu cha. Iyu wangukamba kuti “chuma cho wakutumika Paulo wangukamba ‘mbuteŵeti wenuwu’ wo ‘uchitiska kuti uneneska uwoneki.’” (2 Akorinto 4:1, 2, 5) Mubali Splane wangukumbusa abali ndi azichi wo ŵenga mukilasi ya Giliyadi kuti myezi 5 yo asambira sukulu iyi, yaŵawovya kuti anozgeke mo angachichitiya uteŵeti wawu. Wanguŵakumbusa so kuti awonengi kuti uteŵeti wawu ngwakuzirwa ukongwa.
Mubali Splane wangukamba kuti ‘viyaŵi vadongu’ vimiya liŵavu lidu. Iyu wangupambanisa pakati pa viyaŵi vadongu ndi viyaŵi vagolidi. Viyaŵi vagolidi vigwiriskikiya ntchitu kaŵikaŵi cha. Kweni viyaŵi vadongu ndivu kanandi vigwiriskikiya ntchitu. Asani tingaŵika chuma muviyaŵi vagolidi, tiŵikengi ukongwa maŵanaŵanu ngidu pa chiyaŵi chagolidi mumalu mwa chuma. Mubali uyu wangukamba so kuti: “Abali ndi azichi yimwi mwasambira sukulu iyi, mungachijiŵanaŵaniyanga ukongwa cha. Pakuti sonu mwe amishonale, mukhumbika kuchiwovya ŵanthu kuti akamuziŵi Yehova, chifukwa mwe viyaŵi vadongu.”
w09 11/15 21 ¶7
Lutirizgani Kwanja Abali
7 Kumbi isi tichita wuli? Kumbi tingachita wuli kuti ‘tisanuzgi mtima’ widu pa nkhani ya kwanja abali? Kanandi ŵanthu atanjana chifukwa chakuti mbamsinkhu umoza pamwenga a mtundu umoza. Ndipu ŵanthu wo atanja vinthu vakuyanana, kanandi acheze limoza. Kweni tikhumbika ‘kusanuzga mitima yidu’ asani tiwona kuti abali ndi azichi anyaki mumpingu ticheza nawu viŵi cha. Tingachita umampha kujifumba mafumbu yanga: ‘Kumbi nditanja kusere mu uteŵeti pamwenga kucheza ndi ŵanthu a msinkhu wangu pe kweniso wo ndiyanana nawu mtundu? Asani nde pa Nyumba ya Ufumu, kumbi ndicheza nawu ukongwa cha wo ayamba waka sonu kuwungana chifukwa chakukhumba kuti pajumphi dankha nyengu ndipu ndingaziyamba kwanjana nawu? Kumbi nditesesa kutawuzga weyosi mumpingu, kaya ndi mwana pamwenga mura?’
MAY 13-19
CHUMA CHAKUTULIYA MU MAZU NGAKU CHIUTA | 2 AKORINTO 7-10
“Uteŵeti Wakovya Abali wo Akumana ndi Masoka nga Chilengedu”
w98 11/1 25 ¶1
“Chiuta Watanja Munthu yo Wapereka Mwakukondwa”
Chakwamba, Paulo wangukambiya Akhristu a ku Korinto za abali ndi azichi a ku Makedoniya wo angulongo chakuwoniyapu chamampha pa nkhani yakovya wo angukumana ndi masuzgu. Paulo wangulemba kuti: “Likondwa lawu likulu kweniso ukavu wawu, vinguŵachitiska kuti aje akupaska ukongwa pa nyengu yo ayesekanga ukongwa chifukwa cha masuzgu.” Abali ndi azichi a ku Makedoniya anguchita ivi mwakuchichizgika cha. Ndichu chifukwa chaki Paulo wangukamba kuti, “Mwakukhumba kwawu atipemphanga kuti aŵi ndi mwaŵi wakupereka mphasu zawezi.” Vo abali ndi azichi a ku Makedoniya anguchita vingulongo chakuwoniyapu chamampha ukongwa chifukwa yiwu ŵenga ‘akavu.’—2 Akorinto 8:2-4.
Kovya Abali Ŵidu pa Masuzgu Kutumbika Yehova
TIYERUZGIYI kuti mwe mu chaka cha 46 C.E., ndipu ku Yuda kwe nja yikulu ukongwa. Akusambira aku Yesu achiyuda wo aja kwenuku alivi ndalama zakuti aguliyi chakurya cho ntchakukwera ukongwa. Nja yaŵapweteka ukongwa ndipu ŵepafupi kuzinduka nayu. Kweni kwaja kamanavi kuti awoni chanju chikulu chaku Yehova, ndipu vo viŵachitikiyengi palivi wakusambira munyaki yo vikumuchitikiyapu. Kumbi ntchinthu wuli cho chichitikengi?
Kovya Abali Ŵidu pa Masuzgu Kutumbika Yehova
4 Mu kalata yaki yachiŵi yakuluta kwa Akorinto, Paulo wangukonkhoska kuti uteŵeti wachikhristu we ndi vigaŵa viŵi. Chinanga kuti kalata iyi walembiyanga Akhristu akusankhika, kweni mazuŵa nganu yikwaska so “mbereri zinyaki” zaku Khristu. (Yoha. 10:16) Chigaŵa chakwamba cha uteŵeti widu ndi “uteŵeti wakuyanjanisa” wo ung’anamuwa ntchitu yidu yakupharazga ndi kusambiza. (2 Akori. 5:18-20; 1 Timo. 2:3-6) Chigaŵa chachiŵi cha uteŵeti widu, nkhuwovya abali ndi azichi ŵidu mu chivwanu. Yapa Paulo wakambanga “uteŵeti wakovya.” (2 Akori. 8:4) Pa mauteŵeti ngosi ngaŵi, “uteŵeti wakuyanjanisa” ndipuso “uteŵeti wakovya,” mazu ngakuti “uteŵeti” ngakufwatulika kutuliya ku mazu nga Chigiriki ngakuti di·a·ko·niʹa. Kumbi kuziŵa ko mazu yanga ngakutuliya nkhwakovya wuli?
5 Mwakugwiriskiya ntchitu mazu ngamoza nga Chigiriki pakukonkhoska mauteŵeti ngosi ngaŵi, Paulo wanguŵika ntchitu yakupereka chovyu mu gulu la mauteŵeti nganyaki ngo mpingu wachikhristu wachitanga. Yapa ndipu wakamba kali fundu yakuti: “Pe mauteŵeti ngakupambanapambana, kweni pe Mbuya yumoza. Pe so ntchitu zakupambanapambana, . . . Kweni vinthu vosi venivi vichitika kuporote mwa mzimu weniwo umoza.” (1 Akori. 12:4-6, 11) Paulo wanguyeruzgiya mauteŵeti ngakupambanapambana nga mpingu ndi ‘uteŵeti wakupaturika.’ (Aro. 12:1, 6-8) Ndichu chifukwa chaki wapatuwanga nyengu yaki kuti ‘wateŵete akupaturika’!—Aro. 15:25, 26.
6 Paulo wanguwovya Akorinto kuziŵa kuti kovyana pa nyengu ya masuzgu ntchigaŵa cha uteŵeti kweniso kusopa. Wonani vo iyu wangukamba: Akhristu apereka chovyu ‘pakuti atijithereska ku uthenga wamampha wakukwaskana ndi Khristu.’ (2 Akori. 9:13) Mwaviyo, chifukwa chakulondo vo Yesu wangusambiza, Akhristu atovya abali ŵawu mu chivwanu. Paulo wangukamba kuti vo Akhristu achitiya abali ŵawu, vilongo “wezi ukulu ukongwa waku Chiuta.” (2 Akori. 9:14; 1 Petu. 4:10) Chigongwi cha Alinda cha December 1, 1975, chingukambapu vakukwaskana ndi kuteŵete abali ŵidu, ko kusazgapu kupereka chovyu. Magazini iyi yingukamba kuti: “Tingakayikanga cha kuti Yehova Chiuta kweniso mwana waki Yesu Khristu awona kuti uteŵeti uwu ngwakukhumbika ukongwa.” Kukamba uneneska, ntchitu yakupereka chovyu ntchigaŵa cha kusopa Yehova.—Aro. 12:1, 7; 2 Akori. 8:7; Ahe. 13:16.
Kumbi Ndalama Zakwendese Ntchitu za Ufumu Zituwa Pani?
10 Chakwamba, tipereka vawanangwa vidu chifukwa chakuti titanja Yehova ndipu tikhumba kuchita vinthu “vo vitimukondwesa.” (1 Yoha. 3:22) Yehova wakondwa nadi ndi munthu yo wapereka mwakukhumba kwaki. Tiyeni tiwoni vo wakutumika Paulo wangukamba pa nkhani yakupaska. (Ŵerengani 2 Akorinto 9:7.) Mkhristu wauneneska wadandawula cha pakupereka ndipuso wachita kuchichizgika cha. Mumalu mwaki wapereka chifukwa chakuti ‘wasimikiza mumtima mwaki.’ Ivi ving’anamuwa kuti wapereka chifukwa chakuti wawona suzgu ndipu wakhumba kuwovya pa suzgu yo. Munthu waviyo ngwakwanjiwa kwaku Yehova, “pakuti Chiuta watanja munthu yo wapereka mwakukondwa.” Bayibolu linyaki likamba kuti: “Chiuta watanja ŵanthu wo atanja kupereka.”
Kufufuza Fundu Zakuzirwa za M’Bayibolu
‘Mphasu Yambula Makambika’ Yaku Chiuta Yititichiska
2 Paulo wanguziŵa kuti vosi vo Chiuta wakukamba vazamuchitika chifukwa cha sembi yo Khristu wakupereka. (Ŵerengani 2 Akorinto 1:20.) Mwaviyo, ‘mphasu yawezi yambula makambika’ yisazgapu vinthu vosi vamampha vo Yehova wazakutichitiya kunthazi kuziya mwaku Yesu. Kukamba uneneska, mphasu iyi njapade ukongwa mwakuti taŵanthu tingafiska cha kukonkhoska. Kumbi mphasu iyi yitenere kutikwaska wuli? Kumbi yitenere kutichiska wuli po tinozgeke Chikumbusu cho chazamuchitika pa Chitatu, pa 23 March, 2016?
g99 7/8 20-21
Kumbi Kumalika Nkhuheni?
Mu Malemba nga Chigiriki Ngachikhristu mazu ngakuti kau·khaʹo·mai, ngafwatulika kuti “kumalika, kukondwa, kweniso kujiŵikamu.” Mazu yanga ngalongo kuti kumalika kwe posi paŵi, nkhwamampha kweniso nkhuheni. Mwakuyeruzgiyapu, Paulo wangukamba kuti: “Tikondwi chifukwa cha chilindizga cha unkhankhu waku Chiuta.” Iyu wangukamba so kuti: “Mweniyo wamalika, wamalikiyi mwaku Yehova.” (Aroma 5:2; 2 Akorinto 10:17) Venivi ving’anamuwa kuti titenere kumalika mwaku Yehova chifukwa iyu ndi Chiuta widu ndipu kuchita viyo kutiwovyengi kuti tikondwengi chifukwa cha zina laki lamampha ndipuso mbiri yaki yamampha.
MAY 20-26
CHUMA CHAKUTULIYA M’MAZU NGAKU CHIUTA | 2 AKORINTO 11-13
“Paulo Wenga ndi ‘Minga Muliŵavu’”
w08 6/15 3-4
Tingaja ndi Nthazi Asani Talopwa
Paulo wangupempha Yehova kuti watuzgemu “minga muliŵavu” laki, wo wenga nge suzgu yambula kumala. Iyu wangupempha Yehova maulendu ngatatu kuti watuzgemu suzgu iyi muliŵavu laki. Tiziŵa cha kuti wakumananga ndi suzgu wuli. Kweni nge mo minga uŵaŵiya, suzgu yo Paulo wenga nayu yatingi yimuchitiskengi kuti waleki kukondwa pakuteŵete Yehova. Iyu wanguyeruzgiya suzgu iyi ndi kupumika makofi nyengu zosi. Yehova wangumukambiya kuti: “Wezi wangu ukulu ngwakukwana kwaku yiwi, pakuti nthazi yangu yija yakufikapu mu kulopwa.” Yehova wanguwutuzgamu cha minga muliŵavu laku Paulo. Paulo wakhumbikanga kulutirizga kulimbana nawu. Iyu wangukamba so kuti: “Pakuti asani ndalopwa, penipo ndipu ndija ndi nthazi.” (2 Akori. 12:7-10) Kumbi iyu wang’anamuwanganji?
w06 12/15 24 ¶17-18
Yehova Wapereka ‘Mzimu Wakupaturika ku Ŵanthu wo Atimupempha’
17 Pakumuka mapempheru ngaku Paulo, Chiuta wangumukambiya kuti: “Wezi wangu ukulu ngwakukwana kwaku yiwi, pakuti nthazi yangu yija yakufikapu mu kulopwa.” Paulo wangukamba kuti: “Mwaviyo ndikondwengi ukongwa ndi kulopwa kwangu, kuti nthazi yaku Khristu yijaliriyi paku ini nge chihema.” (2 Akorinto 12:9; Sumu 147:5) Paulo wanguwona kuti kuziya mwaku Khristu, nthazi yaku Chiuta yenga nge chihema ndipu yingumuvikiliya. Mazuŵa nganu napu, Yehova wamuka mapempheru ngidu munthowa yakuyanana ndi yeniyi. Iyu wavikiliya ateŵeti ŵaki.
18 Mbuneneska kuti chihema chingayitondekesa cha vuwa pamwenga mphepu kuti yileki kuputa, kweni chivikiliya munthu yo we mukati ku vinthu venivi. Mwakuyanana ŵaka, tilekengi cha kukumana ndi masuzgu chinanga kuti “nthazi yaku Khristu” yititivikiliya. Nthazi iyi yititivikiliya mwauzimu ku vinthu viheni va mucharu kweniso kwaku Satana yo wawusa charu ichi. (Chivumbuzi 7:9, 15, 16) Mwaviyo, asani mwe ndi suzgu yo muwona kuti ‘yimala cha pa umoyu winu,’ mutenere kuziŵa kuti Yehova wawona masuzgu nginu ndipu watuvwa “kuliya kwinu.” (Yesaya 30:19; 2 Akorinto 1:3, 4) Paulo wangulemba kuti: “Chiuta ngwakugomezgeka ndipu wazomerezengi cha kuti muyeseki kujumpha po mungakunthiyapu. Ndipu asani muyeseka iyu wanozgengi nthowa yakuti mufiski kukunthiyapu.”—1 Akorinto 10:13; Afilipi 4:6, 7.
“Iyu Wapaska Nthazi Wakuvuka”
8 Ŵerengani Yesaya 40:30. Chinanga kuti tingaŵa ndi malusu, pe vinthu vinyaki vo tingachita cha ndi nthazi zidu. Tosi titenere kuziŵa fundu iyi. Chinanga kuti wakutumika Paulo wachitanga vinthu vinandi kweni penga vinthu vinyaki vo vamutondekesanga kuchita vosi vo wakhumbanga. Iyu wati wakambiya Chiuta vo wafipanga navu mtima, Yehova wangumukambiya kuti: “Nthazi yangu yija yakufikapu mu kulopwa.” Paulo wanguvwisa fundu iyi. Iyu wangukamba kuti: “Asani ndalopwa, penipo ndipu ndija ndi nthazi.” (2 Akori. 12:7-10) Kumbi iyu wang’anamuwanganji?
9 Paulo waziŵanga kuti penga vinthu vinyaki vo watingi wachitengi cha pakuyija kwambula kuwovyeka ndi Chiuta. Iyu wakhumbikanga mzimu wakupaturika kuti umupaski nthazi asani walopwa. Kweniso mzimu waku Chiuta wamuwovyanga Paulo kuchita vinthu vo watingi wafiskengi cha pakuyija. Venivi ndivu so vingachitika ndi isi. Asani Yehova watipaska mzimu waki wakupaturika, tiŵengi ndi nthazi ukongwa!
Kufufuza Fundu Zakuzirwa za mu Bayibolu
Vo Akuŵerenga Afumba
“Kuchanya kwachitatu” ko kukambika pa 2 Akorinto 12:2, kutenere kuti ndi Ufumu waku Chiuta wo Yesu Khristu wazamulamuliya ndi a 144,000 wo apanga “kuchanya kufya.”—2 Petu. 3:13.
Kudanika kuti “kuchanya kwachitatu” chifukwa chakuti Ufumu uwu ngwapachanya ukongwa.
“Paradayisu” yo Paulo ‘wangukwamphulikiyaku’ muchiwona, watenere kuti wang’anamuwa (1) paradayisu yo tilindizga panu pasi kunthazi, (2) paradayisu wauzimu yo wazamuŵaku mucharu chifya yo wazamuphara yo walipu sonu ndipuso (3) “paradayisu waku Chiuta” wakuchanya yo wazamujaliyaku limoza ndi wapanu pasi.
it-2 177
Kufyofyonthana
“Kufyofyonthana Mwakupaturika.” Akhristu akwambiriya ‘afyofyonthananga mwakupaturika’ (Aro. 16:16; 1 Akori. 16:20; 2 Akori. 13:12; 1 Ate. 5:26) pamwenga kuti “kufyofyonthana mwachanju.” (1 Petu. 5:14) Anthukazi afyofyonthanga anthukazi anyawu pe, ndipu anthulumi nawu afyofyonthanga anthulumi anyawu pe. Vo ŵanthu yaŵa achitanga pakutawuzgana, vayanananga waka ndi vo Aheberi akwambiriya achitanga chifukwa nawu afyofyonthananga pakutawuzgana. Chinanga kuti Malemba ngakambapu chechosi cha pa nkhani iyi, kweni ‘kufyofyonthana mwakupaturika’ pamwenga kuti “kufyofyonthana mwachanju,” kwalongonga kuti abali ndi azichi mumpingu ayanjananga ndipuso akoliyananga ukongwa.—Yoha. 13:34, 35.
MAY 27–JUNE 2
CHUMA CHAKUTULIYA MU MAZU NGAKU CHIUTA | AGALATIYA 1-3
“Ndingumususka Ukongwa pa Masu ndi pa Masu”
Kumbi Muwona Vinthu Nge Yehova pa Nkhani ya Urunji?
16 Ŵerengani Agalatiya 2:11-14. Peturo wanguwila muchiŵana chakopa ŵanthu. (Nthanthi 29:25) Chinanga kuti pakwamba waziŵanga mo Yehova wawoniyanga ŵanthu ambula kudumulika, Peturo wawopanga vo atingi akambengi Ayuda wo angutuwa mumpingu wa ku Yerusalemu. Wakutumika Paulo yo wengapu pa nkhumanu yo yinguchitika ku Yerusalemu mu 49 C.E., wangususka vo Peturo wanguchita ku Antiyoke ndipu wangukamba pakweru vinthu vachinyengu vo wanguchita. (Machi. 15:12; Aga. 2:13) Kumbi Akhristu wo ŵenga Ayuda cha, wo angukwaskika ndi vinthu vambula urunji vo Peturo wanguchita, anguchita wuli? Kumbi anguguŵa? Kumbi Peturo watingi walondekengi maudindu chifukwa cha vo wangunangisa?
“Palivi cho Chingaŵaguŵiska” Ŵanthu wo Atanja Yehova
12 Peturo wanguwopa ŵanthu ndipu vamuchitiskanga kuti nyengu zinyaki wanangisi vinthu kweni wangulutirizga kuja wakugomezgeka kwaku Yesu ndi Yehova. Mwakuyeruzgiyapu, wangukana Yesu pakweru katatu. (Luka 22:54-62) Pavuli paki, Peturo wangutondeka kuchita vinthu nge Mkhristu, chifukwa wawonanga kuti Akhristu wo ŵenga Ayuda ŵenga akukhumbika ukongwa kuluska wo ŵenga Ayuda cha, chifukwa chakuti ŵenga ambula kudumulika. Kweni wakutumika Paulo wenga ndi maŵanaŵanu ngamampha pa nkhani iyi, iyu wawonanga kuti mpingu wenga malu ngakuchitiyamu sankhu cha. Maŵanaŵanu ngo Peturo wenga nangu ngenga ngaheni. Jalidu laku Peturo lechendatimbanyizgi abali ndi azichi, Paulo wangumuchenya mwaliŵi masu ndi masu. (Aga. 2:11-14) Kumbi kunyada kungumuchitiska Peturo kuti waleki maphara ngakuchilonde umoyu? Awa. Iyu wanguŵanaŵaniyapu ukongwa pa vo Paulo wangumuchenya ndipu wanguvigwiriskiya ntchitu kweniso wanguleka cha kuchita nawu maphara.
Kufufuza Fundu Zakuzirwa za mu Bayibolu
w14 9/15 16 ¶20-21
Teŵetiyani Chiuta Mwakugomezgeka Chinanga Kuti Mukumana ndi “Masuzgu Nganandi”
20 Nanga tingachita wuli asani tiyukilika kwambula kuwoneke? Pamwenga tingachita wuli kuti tileki kugongowa? Titenere kuŵanaŵaniya sembi yaku Yesu. Yeniyi ndiyu nthowa yamampha ukongwa yo tingaleke kugongowa. Ivi ndivu wakutumika Paulo wanguchita. Iyu waziŵanga kuti nyengu zinyaki wakondwanga cha. Waziŵanga so kuti Khristu wakufwiya ŵanthu arunji cha kweni wakufwiya ŵanthu akubuda. Ndipu nayu wenga wakubuda. Ndichu chifukwa chaki wangulemba kuti: “Umoyu wo ndija sonu muliŵavu, nde nawu chifukwa chakuvwana mu Mwana waku Chiuta, mweniyo wakundiyanja ndipu wakujipereka chifukwa chaku ini.” (Aga. 2:20) Paulo wangulonde sembi yaku Yesu ndipu wawonanga kuti yitimukwaska ukongwa.
21 Sembi yaku Yesu yingakuwovyani ukongwa asani namwi mutiyiwona kuti ntchawanangwa cho Yehova wakupaskani. Ivi ving’anamuwa kuti mulekiyengi limu cha kugongowa. Vingachitika kuti tilutirizgengi kulimbana ndi maŵanaŵanu ngakugongowa mpaka mucharu chifya. Kweni kumbukani kuti wo aleka kuvuka ndiwu azamulonde mphotu. Zuŵa laku Yehova le pafupi ukongwa po Ufumu waki wazamujalikiska chimangu kweniso wazamuchitiska kuti ŵanthu wosi akugomezgeka azije akufikapu. Chinanga kuti mukumana ndi masuzgu nganandi, yesesani kuti muzisere mu Ufumu wenuwu.
it-1 880
Kalata Yakuluta kwa Agalatiya
Palivi ukaboni wakulongo kuti Paulo wachikamba kuti, “Hate, Agalatiya akupusa yimwi!” wakambanga za ŵanthu wo ajanga kumpotu kwa charu cha Galatiya. (Aga. 3:1) Mumalu mwaki, Paulo wachenyanga ŵanthu anyaki mumpingu wo anyengekanga ndi Ayuda anyaki wo achiskanga ukongwa midawuku yachiyuda. Ayuda ŵenaŵa achiskanga ŵanthu kuti angaja arunji asani angalondo marangu ngaku Mozesi mumalu mwakulondo phanganu lifya. (2:15–3:14; 4:9, 10) Paulo wangulembe kalata iyi “mipingu ya ku Galatiya.” (1:2) Mu mipingu yeniyi mwenga Ayuda ndipuso ŵanthu wo ŵenga Ayuda cha. Pa ŵanthu wo ŵenga Ayuda cha, anyaki ŵenga akudumulika penipo anyaki ŵenga ambula kudumulika. Ndipu tikayika cha kuti mu mipingu iyi mwenga so anyaki akutuliya muvyaru vinyaki. (Machi. 13:14, 43; 16:1; Aga. 5:2) Wosi pamoza adanikanga kuti Akhristu a ku Galatiya chifukwa chakuti ajanga ku Galatiya. Mwaviyo, tingakamba kuti mukalata yaki, Paulo wachenyanga ŵanthu wo ajanga kumpotu kwa Galatiya cha chifukwa waŵaziŵanga cha ndipu viwoneka kuti wangulutaku cha. Kweni iyu wachenyanga ŵanthu wo ajanga kumwela kwa Galatiya chifukwa waŵaziŵanga umampha.