Malifalensi nga Nkhani za Unganu wa Umoyu Widu Wachikhristu Ndipuso Uteŵeti
JUNE 3-9
CHUMA CHAKUTULIYA MU MAZU NGAKU CHIUTA | AGALATIYA 4-6
“‘Nkhani Yakumiya Vinthu Vinyaki’ Ndipuso vo Tisambirapu”
it-1 1018 ¶2
Hagara
Mwakukoliyana ndi vo wakutumika Paulo wangulemba, Hagara wamiya Isirayeli wakuliŵavu yo Yehova wanguchita nayu phanganu kuziya mu Dangu lo wangupereka pa Phiri la Sinayi. Phanganu ili lingubala “ŵana wo mbakapolu.” Ayisirayeli angutondeka kusunga vinthu va muphanganu ili chifukwa chakuti achitanga vinthu viheni. Chifukwa cha venivi, Ayisirayeli angufwatulika cha ndipu Chiuta waŵawonanga kuti mbakubuda kweniso kuti mbakwenere kufwa. Mwaviyo, tingakamba kuti yiwu ŵenga akapolu. (Yoha. 8:34; Aro. 8:1-3) Yerusalemu wa mu nyengu yaku Paulo wayanananga ndi Hagara chifukwa tawuni yeniyi ndiyu yenga likulu lo lamiyanga Isirayeli wakuliŵavu yo wenga ku ukapolu limoza ndi ŵana ŵaki. Kweni Akhristu akusankhika mbana a “Yerusalemu wakuchanya” yo ndi munthukazi wakuyeruzgiya waku Chiuta. Yerusalemu wakuchanya mwenuyu wenge Sara, munthukazi mwanangwa yo wakujapu cha mu ukapolu. Nge mo venge ndi Isaki yo watombozgekanga ndi Yishumaele, ŵana a “Yerusalemu wakuchanya” wo akufwatulika ndi Mwana, nawu atombozgeka ndi ŵana a Yerusalemu wo ŵe mu ukapolu. Chinanga kuti venga viyo, Hagara ndi mwana waki angudikiskika. Venivi vamiyanga mo Yehova wangujowore mtundu wa Isirayeli wakuliŵavu.—Aga. 4:21-31; wonani so Yoha. 8:31-40.
w14 10/15 10 ¶11
Muwugomezgengi Ukongwa Ufumu
11 Chinanga kuti phanganu laku Abrahamu lingufiskika pa nyengu yo mbewu yaki yinguchisere mu Charu Chakulayizgika kweni Malemba ngalongo kuti mazu nganyaki nga muphanganu lenili ngafiskika so mwauzimu. (Aga. 4:22-25) Wakutumika Paulo wangulongo kuti phanganu ili lifiskika ukongwa muvigaŵa viŵi. Chakwamba, mbewu yaku Abrahamu yimiya Khristu ndipu chachiŵi, yimiya Akhristu akusankhika a 144,000. (Aga. 3:16, 29; Chivu. 5:9, 10; 14:1, 4) Munthukazi yo wabala mbewu ndi “Yerusalemu wakuchanya” yo wamiya chigaŵa chakuchanya cha gulu laku Chiuta la vakulengeka vauzimu. (Aga. 4:26, 31) Nge mo phanganu laku Abrahamu lingukambiya, mbewu ya munthukazi yazamuwovya ŵanthu kuti azilonde vitumbiku.
Kufufuza Fundu Zakuzirwa za mu Bayibolu
w09 4/1 13
Kumbi Muziŵa?
Ntchifukwa wuli Yesu pakupemphera wangukamba Yehova kuti “Abba, Ada”?
Mazu nga Chiaramu ngakuti ʼab·baʼʹ ngangang’anamuwa kuti “Ada.” Mazu yanga ngasanirika katatu mumapempheru ngo ngakulembeka mu Bayibolu ndipu ngakamba zaku Yehova, Ada akuchanya. Kumbi mazu ngenanga ngang’anamuwanji?
Buku linyaki likamba kuti: “Mu nyengu yaku Yesu, mazu ngakuti ʼabbāʼ kanandi ngagwiriskikiyanga ntchitu asani ŵana adana awisewu mwaulemu kweniso mwachanju.” (The International Standard Bible Encyclopedia) Mazu yanga ngenga ngamoza mwa mazu ngo mwana wakambanga asani wayamba ŵaka kulongoro. Yesu wangugwiriskiya ntchitu mazu ngenanga pa nyengu yo wapempheranga kwa Awisi mwakutuliya pasi pa mtima. Wachipemphera mumunda wa Gesemani kwati kwaja kamanavi kuti wafwi, Yesu wanguzumbuwa Yehova ndi mazu ngakuti “Abba, Ada.”—Mariko 14:36.
Buku lo lazumbulika pachanya yapa, likamba so kuti: “Mazu ngakuti ʼAbbāʼ ngasanirika viŵiviŵi cha mumabuku nga Ayuda wo ŵengaku mu nyengu ya ulamuliru wa Aroma ndi Agiriki. Veviyo chifukwa yiwu awonanga kuti nkhuŵavi ulemu kudana Chiuta ndi zina lenili.” Kweni buku ili likamba so kuti, “Yesu . . . wangugwiriskiya ntchitu mazu ngenanga pakupemphera kuti walongo kuti wakoliyana ukongwa ndi Chiuta.” Mazu ngakuti “Abba” ngasanirika so mumabuku ngaŵi ngo ngakulembeka ndi wakutumika Paulo. Venivi vilongo kuti Akhristu a mu nyengu ya akutumika nawu agwiriskiyanga so ntchitu mazu ngenanga asani apemphera.—Aroma 8:15; Agalatiya 4:6.
w10 11/1 15
Kumbi Muziŵa?
Kumbi wakutumika Paulo wang’anamuwanganji wachikamba kuti liŵavu laki lenga ndi ‘mabamba ngakulongo kuti wenga kapolu waku Yesu’?—Agalatiya 6:17.
▪ Ŵanthu a mu nyengu ya akutumika atenere kuti aŵanaŵananga vinthu vinandi ŵati avwa vo Paulo wangukamba. Mwakuyeruzgiyapu, munyengu yakali ŵanthu wo akoleka kunkhondu, wo aba vinthu munyumba yakusopiyamu kweniso akapolu wo athaŵa ambuyawu, aŵawotchanga ndi chisulu kuti aziŵikengi. Munthu yo wenga ndi bamba lenili, ŵanthu amupaskanga ulemu cha.
Kweni ndi nyengu zosi cha po munthu yo wenga ndi mabamba ngenanga alekanga kumupaska ulemu. Mwakuyeruzgiyapu, ŵanthu anandi mu nyengu yakali ajiwotchanga ndi chisulu kuti aje ndi mabamba kuti alongo mtundu wawu pamwenga chisopa chawu. Buku linyaki likamba kuti: “Asiriya ajidindanga mabamba ngakulongo achiuta ŵawu, Hadad ndi Atargatis. Yiwu ajidindanga mabamba yanga pakasukusuku pamwenga pakhosi . . . Ndipu ŵanthu wo asopanga chiuta munyaki zina laki Dionysus ajidindanga jani la chimiti chinyaki.”—Theological Dictionary of the New Testament.
Ŵanthu anyaki wo akambapu pa nkhani za mu Bayibolu, awona kuti Paulo wakambanga va mabamba ngo wenga nangu chifukwa cha nkhaza zo ŵanthu anyaki amuchitiyanga pa nyengu yo wachitanga umishonale. (2 Akorinto 11:23-27) Kweni vingachitika so kuti Paulo wakambanga mabamba chayingu cha kweni jalidu lo wenga nalu lo lamuziŵikiskanga kuti ndi Mkhristu.
JUNE 10-16
CHUMA CHAKUTULIYA MU MAZU NGAKU CHIUTA | AEFESO 1-3
“Mo Yehova Watendese Gulu Laki”
it-2 837 ¶4
Chisisi Chakupaturika
Ufumu Waku Mesiya. Paulo wangulemba va kuvumbulika kwa chisisi chakupaturika chaku Khristu. Pa Aefeso 1:9-11, iyu wangukamba mo Chiuta wanguvumbuliya “chisisi chakupaturika” cha khumbu laki. Iyu wangukamba kuti: “Chisisi chenichi chikoliyana ndi venivo vikumunozge kweniso khumbu laki, kuti waŵiki nthowa yakwendese vinthu asani nyengu yakuŵikika yamaliya limu, ndi chilatu chakuti wawunganisi pamoza vinthu vosi mwaku Khristu, vinthu vakuchanya ndi vinthu vapacharu chapasi. Mwaku iyu mweniyo te akukoliyana nayu ndipuso tikuŵikika nge akuhara, pakuti wangutisankhiya limu mwakukoliyana ndi khumbu laku yo wafiska vinthu vosi nge mo wasankhiya mwakukoliyana ndi khumbu laki.” “Chisisi chakupaturika” chenichi chisazgapu Ufumu waku Mesiya. “Vinthu vakuchanya” vo Paulo wakambanga pa lemba ili mbanthu wo amulamuliya limoza ndi Khristu kuchanya. “Vinthu vapacharu chapasi” mbanthu wo azamuja pacharu chapasi. Yesu wangukambiya akusambira ŵaki kuti chisisi chakupaturika chenichi chikwaskana ndi Ufumu waku Chiuta. Iyu wangukamba kuti: “Yimwi mwapaskika chisisi chakupaturika cha Ufumu waku Chiuta.”—Mariko 4:11.
w12 7/15 27-28 ¶3-4
Yehova Wawunganisa Banja Laki
3 Mozesi wangukambiya Ayisirayeli kuti: “Yehova Chiuta widu ndi Yehova yumoza pe.” (Mara. 6:4) Vo Yehova wachita vikoliyana ndi khumbu laki. Ndichu chifukwa chaki ‘nyengu yakuŵikika yati yamaliya limu,’ Chiuta wanguŵika “nthowa yakwendese vinthu” kuti wawunganisi pamoza vakulengeka vaki vosi. (Ŵerengani Aefeso 1:8-10.) Kuwunganisa kwenuku kwe muvigaŵa viŵi. Chigaŵa chakwamba chitovya Akhristu akusankhika kuti anozgeke kuchija kuchanya ndipu Yesu Khristu ndiyu wamuja Mulongozgi wawu. Kuwunganisa kwenuku kungwamba pa Pentekositi mu 33 C.E., pa nyengu yo Yehova wangwamba kuwunganisa ŵanthu wo amulamuliya ndi Khristu kuchanya. (Machi. 2:1-4) Akhristu akusankhika akambika kuti mbarunji chifukwa cha sembi yaku Khristu. Mwaviyo, yiwu aziŵa kuti akusankhika kuti aje “ŵana aku Chiuta.”—Aro. 3:23, 24; 5:1; 8:15-17.
4 Chigaŵa chachiŵi chitovya ŵanthu anyaki kuti anozgeke kuzija pacharu chapasi mu Paradayisu mu Ufumu waku Khristu. A “mzinda ukulu” ndiwu apanga gulu lakwamba la ŵanthu wo azamuja pacharu chapasi. (Chivu. 7:9, 13-17; 21:1-5) Mu Ulamuliru Waku Yesu wa Vyaka 1000, ŵanthu anandi azamuyuskika ndipu nawu azamuja mu Paradayisu. (Chivu. 20:12, 13) Chiyuka chenichi chazamulongo so kuti te akukoliyana ukongwa! Kukumaliya kwa vyaka 1000, “vinthu vapacharu chapasi,” pamwenga kuti ŵanthu, azamuyeseka kakumaliya. Ŵanthu wo azamulongo kuti mbakugomezgeka, Chiuta wazakuŵawona kuti mbana ŵaki.—Aro. 8:21; Chivu. 20:7, 8.
Kufufuza Fundu Zakuzirwa za mu Bayibolu
Mungazomerezanga Chechosi cha Kuti Chikutondekeseni Kulonde Unkhankhu
15 Kukunthiyapu kwidu asani tichita khumbu laku Yehova kuwovyengi ŵanthu anyaki kuti alonde unkhankhu. Paulo wangukambiya mpingu wa ku Efeso kuti: “Nditikupemphani kuti muleki kuwere vuli chifukwa cha masuzgu ngo ndikumana nangu chifukwa chaku yimwi, pakuti venivi mbunkhankhu winu.” (Aefe. 3:13) Kumbi Paulo wang’anamuwanganji po wakambanga kuti masuzgu ngaki ngenga ‘unkhankhu’ kwa Akhristu a ku Efeso? Paulo wenga wakunozgeka kulutirizga kuteŵete Akhristu a ku Efeso chinanga kuti wakumananga ndi masuzgu. Ndipu venivi valongonga kuti mwaŵi wo abali ŵenaŵa ŵenga nawu wenga ukulu ndipuso wapachanya ukongwa. Asani Paulo wanguthera pa nyengu ya masuzgu, vatingi vilongongi kuti ubwezi wawu ndi Yehova, uteŵeti ndipuso chigomezgu chawu venga vambula ntchitu. Kukunthiyapu kwaku Paulo kunguwovya kuti Chikhristu chiluti panthazi ndipu vingulongo kuti kuja wakusambira waku Yesu nkhwakukhumbika ukongwa kuluska chechosi cho tingaŵa nachu.
“Mo Tingaziŵiya Chanju Chaku Khristu”
21 Mazu nga Chigiriki ngo ngakufwatulika kuti “kuziŵa,” ngang’anamuwa kuti “munthu wangaziŵa vinthu chifukwa cha vo vikumuchitikiyapu.” Tikhumbika kulongo chanju nge mo Yesu wachitiyanga. Tingalongo chanju chenichi asani titovya anyidu kweniso asani titiŵagowoke ndi mtima wosi. Asani tichita viyo, tingaziŵa “chanju chaku Khristu cho chiluska kuziŵa vinthu.” Ndipu tingaluwanga cha kuti asani tiyesesa kuchita vinthu nge Khristu, tijengi pa ubwezi wamampha ukongwa ndi Yehova Chiuta widu.
JUNE 17-23
CHUMA CHAKUTULIYA MU MAZU NGAKU CHIUTA | AEFESO 4-6
“Vwalani Vidya Vosi Vankhondu Vakutuliya Kwaku Chiuta”
Achinyamata, Mungasukunyikanga Cha Pakulimbana ndi Dyaboli
WAKUTUMIKA Paulo wanguyeruzgiya Akhristu ndi asilikali wo achita nkhondu. Akhristu achita nkhondu ndi ŵanthu cha kweni ndi Satana kweniso angelu aheni. Satana ndi angelu aheni atiyiziŵa umampha nkhondu chifukwa akwamba kali. Mwaviyo, tingawona nge kuti tingawina cha nkhondu iyi, ukongwa asani te achinyamata. Kumbi achinyamata angawina nkhondu iyi? Hinya ndipu awina. Ntchifukwa wuli awina? Chifukwa ‘asaniya nthazi mwa Ambuya.’ Kweni pe vinandi vo achita kuti awini nkhondu iyi. Yiwu avwala vakuvwala vankhondu. Nge asilikali akusambizika umampha, ‘avwala vidya vosi vankhondu vakutuliya kwaku Chiuta.’—Ŵerengani Aefeso 6:10-12.
Achinyamata, Mungasukunyikanga Cha Pakulimbana ndi Dyaboli
4 Mwakuyanana ŵaka, uneneska wo tisambira mu Mazu Ngaku Chiuta utitivikiliya ku visambizu vaboza. (Yoha. 8:31, 32; 1 Yoha. 4:1) Asani titanja uneneska, vitisuzgengi cha kuvwala “chapachifuŵa,” kung’anamuwa kuvwiya fundu zaku Chiuta. (Sumu 111:7, 8; 1 Yoha. 5:3) Kweniso asani titiwuziŵa umampha uneneska wenuwu, vingatiwovya kuti tiwuvikiliyi ku ŵanthu wo asuska.—1 Petu. 3:15.
7 Fundu zaurunji zaku Yehova zo zivikiliya mtima widu, pamwenga umunthu widu wamukati, tingaziyeruzgiya ndi chakuvwala chapachifuŵa chenichi. (Nthanthi 4:23) Msilikali wangasinthisa cha chakuvwala chaki chapachifuŵa chakukho ndi chambula kukho. Mwakuyanana ŵaka, nasi tingasinthisa cha fundu zaku Yehova ndi vo isi tiwona kuti vamampha. Zeru zidu zimana ukongwa kuti zivikiliyi mtima widu. (Nthanthi 3:5, 6) Ndichu chifukwa chaki nyengu zosi tikhumbika kuwona asani chapachifuŵa cho Chiuta wakutipaska cheche kuvikiliya mtima widu.
10 Nge mo sapatu zawovyiyanga asilikali a Aroma kunkhondu, sapatu zakuyeruzgiya zo Akhristu avwala zitiŵawovya pakupharazga uthenga wamampha wachimangu. (Yesa. 52:7; Aro. 10:15) Chinanga kuti ve viyo, nyengu zinyaki tikhumbika chiganga kuti tipharazgi. Robert yo we ndi vyaka 20 wangukamba kuti: “Ndachitanga mantha kupharazgiya anyangu mukilasi. Panyaki ndachitanga soni ndipu ndiziŵa cha chifukwa cho ndachitiyanga soni. Sonu ndikondwa chifukwa ndipharazgiya anyangu.”
w18.05 29-31 ¶13, 16, 20
Achinyamata, Mungasukunyikanga Cha Pakulimbana ndi Dyaboli
13 Mivi yinyaki yakukole motu yo Satana wagwiriskiya ntchitu ndi maboza ngakukwaskana ndi Yehova. Iyu wakamba kuti Yehova walivi nasi ntchitu kweniso watitiyanja cha. Ida yo we ndi vyaka 19 watijiwona kuti ngwambula ntchitu. Iyu wangukamba kuti: “Kanandi ndiwona kuti Yehova we kutali ndi ini ndipu wakhumba cha kuti ndije nayu pa ubwezi.” Kumbi iyu wachita wuli ndi suzgu iyi? Iyu wangukamba kuti: “Maunganu ngatindiwovya ukongwa kuti chivwanu changu chije chakukho. Pakwamba ndamukangapu cha pa maunganu chifukwa ndawonanga kuti palivi yo wangavwa vo ndingakamba. Kweni sonu ndinozgeke maunganu ndipu ndimukapu kaŵi pamwenga katatu. Ntchipusu cha kuchita viyo kweni ndituvwa umampha asani ndamukapu. Abali ndi azichi atindichiska ukongwa. Asani maunganu ngamala, ndiwona kuti Yehova watindiyanja.”
16 Nge mo chisoti chavikiliyanga wongu wa msilikali, “chilindizga cha utaski” chivikiliya maŵanaŵanu ngidu. (1 Ate. 5:8; Nthanthi 3:21) Chilindizga chititiwovya kuti tiŵanaŵaniyengi vo Chiuta wakulayizga kweniso kuti tiwonengi masuzgu mwakwenere. (Sumu 27:1, 14; Machi. 24:15) Kweni asani tikhumba kuti chisoti chidu chitiwovyengi, tingachipinganga mumanja cha kweni tichivwalengi kumutu.
20 Paulo wangukamba kuti Mazu Ngaku Chiuta ngenge lipanga. Yehova ndiyu wakutipaska mazu yanga. Kweni tikhumbika kuziŵa mo tingangagwiriskiya ntchitu umampha kuti tivikiliyi vo tigomezga pamwenga kusintha maŵanaŵanu ngidu. (2 Akori. 10:4, 5; 2 Timo. 2:15) Kumbi tingachita wuli venivi? Sebastian yo we ndi vyaka 21, wangukamba kuti: “Asani ndiŵerenga Bayibolu, ndilemba vesi limoza pa chaputala chechosi ndipuso ndisunga mavesi ngo nditanja. Ivi vitindiwovya kuti ndije ndi maŵanaŵanu ngaku Yehova pa nkhani zakupambanapambana.” Daniel yo tamukambapu kali wangukamba kuti: “Asani ndiŵerenga Bayibolu ndisankha mavesi ngo ndiwona kuti ngangachiwovya ŵanthu mu uteŵeti. Ndiwona kuti ŵanthu avwisiya asani awona kuti wamweni nawi ugomezga vo Bayibolu likamba ndipuso asani utesesa kuti uŵawovyi.”
Kufufuza Fundu Zakuzirwa za mu Bayibolu
it-1 1128 ¶3
Kupaturika
Mzimu wakupaturika. Nthazi yaku Yehova pamwenga kuti mzimu wakupaturika, ndiwu ulongozga ndipu nyengu zosi ufiska khumbu laki. Mzimu uwu ngutuŵa, ngwakutowa kweniso ngwakupaturika ndipu Chiuta watiwugwiriskiya ntchitu pa vinthu vamampha. Ndichu chifukwa chaki udanika kuti “mzimu wakupaturika.” (Sumu 51:11; Luka 11:13; Aro. 1:4; Aefe. 1:13) Mzimu wakupaturika ndiwu uchitiska munthu kuti waje mutuŵa pamwenga kuti wakutowa. Chinthu chechosi chaukazuzi pamwenga jalidu liheni vingachitiska “chitima” mzimu wakupaturika. (Aefe. 4:30) Mzimu wakupaturika ulongo mijalidu yakupaturika yo Chiuta wenayu. Mwaviyo, Chiuta ‘wangavwa chitima’ asani munthu wachita mijalidu yiheni. Ivi vilongole limu kuti jalidu lelosi liheni ‘lingazimwa motu wa mzimu.’ (1 Ate. 5:19) Asani munthu walutirizga kuchita jalidu liheni, mzimu wakupaturika “ungaguŵa,” ndipu Chiuta wawona kuti munthu waviyo ngwakugaruka. (Yesa. 63:10) Munthu yo wachitiska chitima mzimu wakupaturika, ndikuti watiwunyoza. Ndichu chifukwa chaki Yesu Khristu wangukamba kuti munthu yo wanyoza mzimu wakupaturika wagowokerekengi cha, mu mugonezi wunu kweniso wo utuza.—Mate. 12:31, 32; Mariko 3:28-30.
it-1 1006 ¶2
Mbunu
Yiwoneke mu Vakuchita. Munthu wangalongo kuti we ndi mbunu mu vakuchita vaki ndipu venivi vingalongo kuti we ndi khumbiru liheni ukongwa. Yakobe wangulemba kuti asani khumbiru liheni lame nthumbu, libala ubudi. (Yako. 1:14, 15) Mwaviyo, munthu wambunu wangaziŵika chifukwa cha vo wachita. Wakutumika Paulo wangukamba kuti kuchita mbunu kuyanana ŵaka ndi kusopa ngoza. (Aefe. 5:5) Vinthu vo munthu wambunu wativikhumbira ukongwa wativito nge chiuta waki ndipu wativiwona kuti vakukhumbika ukongwa kuluska uteŵeti pamwenga kusopa Mulengi.—Aro. 1:24, 25.
JUNE 24-30
CHUMA CHAKUTULIYA MU MAZU NGAKU CHIUTA | AFILIPI 1-4
“Mungafipanga Mtima ndi Chinthu Chechosi Cha”
“Chimangu Chaku Chiuta . . . Chiluska Kuziŵa Vinthu Kosi”
10 Kumbi ntchinthu wuli cho chingatiwovya kuti tilekengi kufipa mtima ndi chinthu chechosi kweniso kuti tije ndi “chimangu chaku Chiuta”? Vo Paulo wangukambiya abali ku Filipi vilongo kuti pempheru ndilu lingatiwovya asani tifipa mtima. Mwaviyo, asani tifipa mtima, tikhumbika kupemphera kwaku Yehova. (Ŵerengani 1 Peturo 5:6, 7.) Tingakayikanga cha asani tipemphera kwaku Yehova chifukwa watitiphwere. Tipempherengi ‘ndi kumuwonga’ chifukwa cha vinthu vamampha vo watitichitiya. Titimugomezga ukongwa Yehova asani tikumbuka kuti “wangachita vinthu vikulu ukongwa kuluska vinthu vosi vo tipempha pamwenga kuziŵa.”—Aefe. 3:20.
“Chimangu Chaku Chiuta . . . Chiluska Kuziŵa Vinthu Kosi”
7 Abali ku Filipi ŵati aŵerenga kalata yaku Paulo, angukumbuka vo vingumuchitikiya kweniso kuti pengavi yo walindizganga kuti Yehova wangachita vinthu nge mo wanguchitiya. Kumbi Paulo waŵasambizanganji mukalata yo wangulemba? Waŵasambizanga kuti angafipanga mtima cha. Waŵakambiyanga kuti apempherengi ndipu alondiyengi chimangu chaku Chiuta. Paulo wanguŵakambiya kuti “chimangu chaku Chiuta . . . chiluska kuziŵa vinthu kosi.” Kumbi mazu yanga ngang’anamuwanji? Mu Mabayibolu nganyaki, mazu yanga akungafwatuliya kuti “chiluska vosi vo tiŵanaŵana” pamwenga “chiluska vosi vo munthu wakhumba kuchita.” Paulo wang’anamuwanga kuti “chimangu chaku Chiuta” ntchamampha ukongwa kuluska mo tingaŵanaŵaniya. Mwaviyo, taŵanthu tingawona nge kuti palivi nthowa yo tingamalisiya masuzgu, kweni Yehova wangamalisa ndipu wangachita viyo munthowa yo isi talindizganga cha.—Ŵerengani 2 Peturo 2:9.
“Chimangu Chaku Chiuta . . . Chiluska Kuziŵa Vinthu Kosi”
16 Ntchinthu wuli chichitika asani te ndi “chimangu chaku Chiuta cho chiluska kuziŵa vinthu kosi”? Malemba ngamuka kuti chimangu chaku Chiuta ‘chivikiliya mitima yidu ndi maŵanaŵanu ngidu kuporote mwaku Khristu Yesu.’ (Afi. 4:7) Mazu nga Chigiriki ngo akungafwatuliya kuti “kuvikiliya” ngenga mazu ngo asilikali agwiriskiyanga ntchitu. Ngakambanga za asilikali wo angusankhika kuti avikiliyengi msumba mu nyengu yakali. Umoza mwa misumba iyi wenga wa Filipi. Ŵanthu wo ajanga mumsumba uwu, achitanga mantha cha usiku chifukwa aziŵanga kuti asilikali alonde pageti la msumba. Mwakuyanana ŵaka, asani te ndi “chimangu chaku Chiuta” tifipa mtima cha. Tiziŵa kuti Yehova watitiphwere ndipu wakhumba kuti tikondwengi. (1 Petu. 5:10) Ivi vititivikiliya kuti tileki kufipa mtima pamwenga kugongowa.
Kufufuza Fundu Zakuzirwa za mu Bayibolu
it-2 528 ¶5
Sembi
Sembi yachakumwa. Ayisirayeli aperekanga sembi yachakumwa pamoza ndi sembi zinyaki. Kweni yiwu aperekanga ukongwa sembi iyi ŵati afika mu Charu Chakulayizgika. (Maŵe. 15:2, 5, 8-10) Yiwu aperekanga vinyu (“moŵa”) nge sembi ndipu amudiranga pamalu ngakuperekiyapu sembi. (Maŵe. 28:7, 14; yeruzgiyani ndi Chitu. 30:9; Maŵe. 15:10.) Wakutumika Paulo wangulembe Akhristu a ku Filipi kuti: “Ndipungulika nge sembi yachakumwa yo yipungulikiya pa sembi ndipuso uteŵeti wakupaturika weniwo chivwanu chinu chakulongozgiyaniku, ndikondwa.” Pa lemba ili, Paulo wangugwiriskiya ntchitu mazu ngakuti sembi yachakumwa kuti walongo kuti wakhumbisiska kuteŵete Akhristu anyaki. (Afi. 2:17) Kwati kwaja kamanavi kuti Paulo wafwi, wangulembe Timote kuti: “Ndipungulika ndikali nge sembi yachakumwa, ndipu nyengu yakufwatulika kwangu ye pafupi.”—2 Timo. 4:6.
w07 1/1 26-27 ¶5
“Chiyuka Chakwamba” Chemukati!
5 Kweniso, Akhristu akusankhika wo ndi “Isirayeli waku Chiuta” ayuskika kuti akalamuliyi limoza ndi Yesu Khristu kuchanya, ndipu amukuŵa ndi “Ambuya nyengu zosi.” (Agalatiya 6:16; 1 Atesalonika 4:17) Chiyuka chenichi chidanika kuti “chiyuka chakwamba.” (Afilipi 3:10, 11; Chivumbuzi 20:6) Asani chiyuka chenichi chajumphapu, ŵanthu mamiliyoni nganandi azamuyuskika pacharu chapasi ndipu azamulonde umoyu wamuyaya mu Paradayisu. Mwaviyo, kaya tazamuluta kuchanya pamwenga tazamulonde umoyu wamuyaya pacharu chapasi, tosi tikondwa ndi “chiyuka chakwamba.” Kumbi chiyuka chenichi ntchinthu wuli? Nanga chichitikengi zukwanji?