Malifalensi nga Nkhani za Unganu wa Umoyu Widu Wachikhristu Ndipuso Uteŵeti
AUGUST 5-11
CHUMA CHAKUTULIYA MU MAZU NGAKU CHIUTA | 2 TIMOTE 1-4
“Chiuta Wakutipaska Mzimu wa Mantha Cha”
w09 5/15 15 ¶9
Achinyamata Longoni Kuti Muluta Panthazi
9 Kuti wamuwovyi Timote, Paulo wangumukumbusa kuti: “Chiuta wakutipaska mzimu wa mantha cha, kweni wakutipaska mzimu wa nthazi, wa chanju ndipuso wa kuŵanaŵana umampha.” (2 Timo. 1:7) “Kuŵanaŵana umampha” kung’anamuwa kuŵanaŵana mwazeru. Venivi visazgapu kuwona vinthu mo viliri kweniso kuleka kuguŵa asani vinthu vinyaki veumampha cha. Achinyamata anyaki alongo kuti ŵe ndi mzimu wamantha ndipu akhumba cha kusuzgika maŵanaŵanu. Kuti amalani ndi suzgu yeniyi, yiwu asankha kuwonere TV kwa nyengu yitali, atumwa munkhwala wakutimbanyiza wongu, aloŵe, nyengu zinandi asanirika mumaphwandu kweniso achita malusu ngaheni ngakugonana. Bayibolu likamba kuti “tikanengi kuja ndi mijalidu yambula kopa Chiuta kweniso makhumbiru nga charu, ndipuso kuti tijengi ndi maŵanaŵanu ngamampha, tichitengi urunji ndipuso tijengi akujipereka kwaku Chiuta pakati pa mugonezi wunu.”—Tito 2:12.
w03 3/1 9 ¶7
‘Uje ndi Chiganga Kweniso Uje ndi Nthazi!’
7 Paulo wangulembe Timote kuti: “Chiuta wakutipaska mzimu wa mantha cha, kweni wakutipaska mzimu wa nthazi . . . Mwaviyo, ungachitanga soni cha ndi ntchitu yakupereka ukaboni wakukwaskana ndi Ambuyafwi.” (2 Timote 1:7, 8; Mariko 8:38) Asani taŵerenga mazu yanga, tingajifumba kuti: ‘Kumbi ndichita soni ndi vo ndigomezga pamwenga ndilongo kuti nde ndi chiganga? Asani nde kuntchitu pamwenga kusukulu, kumbi nditijibisa pamwenga ndichita soni kuŵakambiya anyangu kuti nde Kaboni waku Yehova? Kumbi ndichita soni kuti ndipambana ndi anyangu wosi, pamwenga ndinyadiya kuti nde pa ubwezi ndi Yehova?’ Asani munthu munyaki watinkha ntchitu yakupharazga uthenga wamampha pamwenga wachita mantha kuja kuchigaŵa chaku Yehova, watenere kukumbuka vo Yehova wangukambiya Yoswa kuti: “Uje ndi chiganga kweniso uje ndi nthazi.” Mungaluwanga cha kuti ŵanthu wo mugwira nawu ntchitu pamwenga wo musambira nawu sukulu ndiwu mbakukhumbika ukongwa cha, kweni mo Yehova ndi Yesu Khristu atikuwoniyani.—Agalatiya 1:10.
Kufufuza Fundu Zakuzirwa za mu Bayibolu
Penjani Chuma Cheneku
13 Timote wenga ndi chivwanu. Paulo wati wakamba kuti Timote wenga ‘msilikali wamampha waku Khristu Yesu,’ wangukamba so kuti: “Palivi munthu yo wateŵete nge msilikali, mweniyo wachitaku malonda nga mu umoyu wunu, kuti wakondwesi yo wakumulemba ntchitu nge msilikali.” (2 Timo. 2:3, 4) Mazuŵa nganu, akusambira aku Yesu kusazgapu wo achita uteŵeti wa nyengu zosi akujumpha 1 miliyoni, atesesa kugwirisiya ntchitu ulongozgi waku Paulo pa umoyu wawu. Kuti aleki kukopeka ndi vinthu va mucharu ichi yiwu akumbuka fundu ya m’Bayibolu yakuti: “Wakubwereka waja kapolu wa wakubwerekesa.” (Nthanthi 22:7) Satana wangayanja kuti timaliyengi nyengu ndi nthazi zidu pakupenja chuma cha mucharu ichi. Vinthu vinyaki vo tisankha vingachitisa kuti tisuzgiki kupereka ngongoli kwa vyaka vinandi. Kuto ngongoli yikulu kuti tiguli nyumba, tilipiri fizi, tiguli galimotu pamwenga kuchita phwandu likulu la nthengwa, vingachitisa kuti tisuzgiki ndi ngongoli. Tilongo kuti tichita vinthu mwazeru asani tija ndi vinthu vimanavi, tileka kuja ndi ngongoli zinandi ndipuso tigula vinthu vimanavi. Asani tichitengi viyo, tijengi akapolu aku Chiuta m’malu mwakuja akapolu a chuma.—1 Timo. 6:10.
w14 7/15 14 ¶10
Ŵanthu aku Yehova ‘Agawukeku ku Uwura Urunji’
10 Mazuŵa nganu, nkhaŵikaŵi cha kuti ŵanthu aku Chiuta apindanengi ndi ŵanthu akugaruka mu mpingu. Chinanga kuti vingaŵa viyo, asani tawona kuti visambizu vinyaki vituliya m’Malemba cha, tikhumbika kuvikana mwaliŵi, kaya vingatuwa pani. Kungaŵa kuŵavi zeru kususkananga ndi ŵanthu akugaruka masu ndi masu, kuŵamuka pa Intaneti pamwenga nthowa yinyaki yeyosi. Chinanga kuti chilatu chidu chingaŵa kuwovya munthu wakugaruka kweni kukambiskana nayu kungaŵa kususkana ndi ulongozgi wa m’Malemba wo takambiskana. M’malu mwaki, nge ŵanthu aku Yehova tikhweche limu ndipuso tikana ŵanthu akugaruka.
AUGUST 12-18
CHUMA CHAKUTULIYA MU MAZU NGAKU CHIUTA | TITO 1–FILIMONI
“Uŵiki Ŵara”
w14 11/15 28-29
Vo Akuŵerenga Afumba
Chinanga kuti Malemba ngakonkhoska vosi cha vakukwaskana ndi mo munthu waŵikikiyanga pa udindu m’nyengu ya akutumika, kweni pe fundu zimanavi zo zingatiwovya kuziŵa mo achitiyanga. Pa nyengu yo Paulo ndi Baranaba aweriyanga kwawu pa ulendu wawu wakwamba wa umishonale, anguchita ivi: ‘Anguŵika ŵara mu mpingu wewosi, angupemphera kweniso angufunga, ndipu anguŵapereka mu manja mwaku Yehova, mweniyo ŵenga ndi chivwanu mwaku iyu.’ (Mac. 14:23) Pati pajumpha vyaka, Paulo wangulembe Tito yo wayendanga nayu kuti: “Ndingukuleka mu Kirete kuti unozgi vinthu vambula kunozgeka ndipuso kuti uŵiki ŵara mumatawuni ngakupambanapambana nge mo ndikukulamuliya.” (Tito 1:5) Mwakuyana ŵaka, Timote yo wayendanga ukongwa ndi Paulo, wangupaskika so udindu wakuŵika ŵara mumpingu. (1 Timo. 5:22) Mwaviyo, viwoneke limu kuti akuwonere madera ndiwu aŵikanga ŵara m’malu mwa akutumika ndipuso ŵara a ku Yerusalemu.
Mwakukoliyana ndi fundu za m’Bayibolo zenizi, Wupu Wakulongozga wa Akaboni aku Yehova wasintha nthowa yakuŵikiya ŵara ndi ateŵeti akovya mumpingu. Mwaviyo, kwambiya pa September 1, 2014, ŵara ndi ateŵeti akovya aŵikikengi viyo: Asani wakuwonere dera wafika pa mpingu, wawonengi mwakuphwere mazina nga abali wo ŵara awona kuti angaŵikika pa udindu. Iyu wayesesengi kuŵaziŵa umampha mwakwende nawu limoza mu uteŵeti asani nkhwamachitika. Asani wakuwonere dera wakambiskana ndi wupu wa ŵara vakukwaskana ndi abali wo asachizgika, iyu ndiyu we ndi udindu wakuŵika ŵara pamwenga ateŵeti akovya. Nthowa iyi yiyanana ndi mo achitiyanga m’nyengu ya akutumika.
Kumbi mbayani wo akwaskika pa nkhani yakuŵika abali pa udindu? Vakuwoneke limu kuti “kapolu wakugomezeka” ndiyu we ndi udindu ukulu wakupereka chakurya kwa akusambira aku Yesu. (Mat. 24:45-47) Ivi visazgapu kufufuza Malemba mwakulongozgeka ndi mzimu wakupaturika kuti aziŵi mo Akhristu angagwiriskiya ntchitu fundu za m’Bayibolo pa umoyu wawu. Kweniso kuti aziŵi mo vinthu vitenere kwende mumipingu yosi yapacharu chapasi. Yiwu aŵika so akuwonere madera wosi ndipuso abali a mu Komiti ya Nthambi. Kweniso, ofesi ya nthambi yilutirizga kuwovya abali kuti aziŵi mo angagwiriskiya nchitu ulongozgi wakutuwa kwaku kapolu. Wakuwonere dera weyosi we ndi udindu ukulu wakuwona mwakuphwere kweniso mwapempheru mazina nga abali wo ŵara azomereza ndipu pavuli paki watiŵaŵika pa udindu. Ndipuso, wupu wewosi wa ŵara we ndi udindu wakufufuza mwakuphwere viyeneresu va m’Malemba va abali wo akhumba kuti aŵikiki pa udindu mumpingu.
Kufufuza Fundu Zakuzirwa za mu Bayibolu
w89 5/15 31 ¶5
Vo Akuŵerenga Afumba
Paulo wawonanga kuti mbumampha cha kutinkha ŵanthu a ku Kirete chifukwa cha mtundu wawu. Fundu iyi yenga yauneneska chifukwa Paulo waziŵanga kuti ku Kirete kwenga Akhristu amampha wo Chiuta wanguŵawona kuti mbakwenere ndipu wanguŵasankha ndi mzimu Waki wakupaturika. (Machitidu 2:5, 11, 33) Ku Kirete kwenga Akhristu anandi wo atingi apangengi mipingu “mumatawuni ngakupambanapambana.” Chinanga kuti Akhristu yaŵa ŵenga ambula kufikapu, akambanga maboza cha kweniso ŵenga alesi cha pamwenga akwanja kurya. Asani venga viyo, atingi alutirizgengi cha kuja pa ubwezi ndi Yehova. (Afilipi 3:18, 19; Chivumbuzi 21:8) Nge mo viliri mazuŵa nganu kuti Akhristu auneneska atuliya mumitundu yosi, tikayika cha kuti ku Kirete naku kwenga ŵanthu anyaki amitima yamampha wo atinkhanga mijalidu yiheni yo yachitikanga ndipu ŵenga akunozgeka kuvwisiya uthenga wamampha.—Ezekiele 9:4; yeruzgiyani ndi Machitidu 13:48.
w08 10/15 31 ¶4
Fundu Zikulu za Mukalata Yakuluta Kwaku Tito, Filimoni ndi kwa Aheberi
15, 16—Ntchifukwa wuli Paulo wanguleka kupempha Filimoni kuti wamufwatuwi Onesimo?
Paulo wakhumbanga kuŵika mtima pa ntchitu yaki ‘yakupharazga uthenga wa ufumu waku Chiuta ndi kupharazga va Ambuyafwi Yesu Khristu.’ Mwaviyo, wakhumbanga cha kuseleriyapu pa nkhani zo zalekanga kumukwaska, nge za ukapolu.—Machitidu 28:31.
AUGUST 19-25
CHUMA CHAKUTULIYA MU MAZU NGAKU CHIUTA | AHEBERI 1-3
“Muyanjengi Urunji, Mutinkhengi Kuleka Kuvwiya Marangu”
w14 2/15 5 ¶8
Tumbikani Khristu Fumu ya Unkhankhu!
8 Yehova wangusankha Mwana waki, Yesu kuja Fumu ya Ufumu waki mu 1914. ‘Ndodu yaki ya ufumu ndi ndodu yaurunji,’ mwaviyo muwusu waki wazamuja wambula sankhu ndipuso waurunji. Iyu ngwakwenere kuwusa chifukwa ‘chitengu chaki’ nchaku Chiuta. Fundu iyi ying’anamuwa kuti Yehova ndiyu wakumusankha. Kusazgiyapu pa fundu yeniyi, chitengu chaku Yesu chazamuja “muyaya ndi muyaya.” Kumbi mukondwa cha kuteŵete Yehova mwakulongozgeka ndi Fumu yo iyu wakusankha?
w14 2/15 4-5 ¶7
Tumbikani Khristu Fumu ya Unkhankhu!
7 Ŵerengani Sumu 45:6, 7. Yehova wangusankha Yesu kuja Fumu ya Ufumu waki chifukwa chakuti wayanjanga urunji ndipuso wachitanga cha vinthu vo vatingi vilekengi kutumbika Awisi. Yehova wangupaska Yesu “likondwa” kuluska ‘anyaki,’ wo ŵenga mafumu nga ku Yuda ngo ngangutuwa mwaku Davidi. Chifukwa wuli? Chakwamba, Yesu wangusankhika ndi Yehova mwenechu. Chifukwa chinyaki nchakuti Yehova wangumusankha kuti waje Fumu kweniso wa Sembi Mura. (Sumu 2:2; Ŵah. 5:5, 6) Kusazgiyapu pa fundu yeniyi, Yehova wangugwiriskiya nchitu mafuta cha pakumusankha kweni mzimu wakupaturika ndipu ufumu waku Yesu ngwapacharu chapasi cha kweni kuchanya.
Kufufuza Fundu Zakuzirwa za mu Bayibolu
it-1 1185 ¶1
Chikozgu
Kumbi mijalidu yaku Yesu yiyanana ndi ya Awisi nyengu zosi?
Yesu ndi Mwana wakwamba waku Chiuta yo pavuli paki wanguzija munthu pacharu chapasi. Iyu wakulengeka muchikozgu cha Awisi. (2 Akori. 4:4) Kweniso tikayika cha kuti ndi Mwana waki mwenuyu yo Chiuta wakambiskananga nayu kuti, “Tiyeni tipangi munthu muchikozgu chidu.” Kutuliya po wangulengeke, Yesu wangwamba kuja ndi mijalidu yakuyanana ndi Awisi wo akulenga vinthu vosi. (Chiya. 1:26; Yoha. 1:1-3; Ako. 1:15, 16) Pa nyengu yo wenga pacharu chapasi nge munthu wakufikapu, Yesu wangulongo mijalidu ya Awisi kuluska mo munthu weyosi wangachitiya. Mwaviyo, penga pakuvwika kuti Yesu wakambi kuti “munthu weyosi yo wawona ini, wawona so Ada.” (Yoha. 14:9; 5:17, 19, 30, 36; 8:28, 38, 42) Kweni Yesu wangutole mijalidu yinandi yo Awisi ŵe nayu wati wayuskikiya kuchanya ndi liŵavu lauzimu ndipuso Awisi ŵati amupaska “mazaza ngosi . . . kuchanya ndi pacharu chapasi.” (1 Petu. 3:18; Mate. 28:18) Chifukwa chakuti Chiuta wakukweza Yesu “pamalu ngapachanya ukongwa,” sonu Mwana waku Chiuta mwenuyu, walongo unkhankhu waku Chiuta ukulu ukongwa kuluska wo wenga nawu wechendazi pacharu chapasi. (Afi. 2:9; Ahe. 2:9) Iyu sonu “ntchikozgu chayichu cha mo Chiuta waliri.”—Ahe. 1:2-4.
it-1 1063 ¶7
Kuchanya
Mazu ngo nge pa Sumu 102:25, 26 ngakamba zaku Yehova Chiuta, kweni wakutumika Paulo wangungagwiriskiya ntchitu pakukamba zaku Yesu Khristu. Veviyo chifukwa Yehova wangugwiriskiya ntchitu Mwana waki wapade mwenuyu pakupanga vinthu vinyaki vosi va muchilengedu. Paulo walongo kuti pe kupambana pakati pa nyengu yo Mwana waku Chiuta wangajaliyaku kwamuyaya ndipuso nyengu yo chilengedu chingajaliyaku, chifukwa asani wangakhumba ‘wangachivunga nge mkhanju’ ndi kuchiŵika pade.—Ahe. 1:1, 2, 8, 10-12; yeruzgiyani ndi 1 Petu. 2:3.
AUGUST 26–SEPTEMBER 1
CHUMA CHAKUTULIYA MU MAZU NGAKU CHIUTA | AHEBERI 4-6
“Yesesani Kuti Muzisere mu Chipumulu Chaku Chiuta”
w11 7/15 24-25 ¶3-5
Kumbi Chipumulu Chaku Chiuta Ntchinthu Wuli?
3 Pe vinthu viŵi vo vingatiwovya kuziŵa kuti ŵanthu asunganga mbwenu zuŵa lanambala 7 mu nyengu yaku Yesu. Chakwamba ŵanaŵaniyani vo Yesu wangumuka ŵanthu wo amususkanga chifukwa chakuchizga ŵanthu pa zuŵa la Sabata. Ŵanthu ŵenaŵa awonanga kuti kuchizga munthu kwayanananga waka ndi kugwira ntchitu pa zuŵa la Sabata. Yesu wanguŵakambiya kuti: “Ada ŵeche kugwira ntchitu mpaka sonu, ndipu ini nani ndilutirizga kugwira ntchitu.” (Yohane 5:16, 17) Kumbi wang’anamuwanganji penapa? Yesu wambikanga mulandu wakugwira ntchitu pa zuŵa la Sabata. Vo Yesu wangukamba kuti, “Ada ŵeche kugwira ntchitu” ndivu vingumuka fumbu lawu. Munthowa yinyaki tingakamba kuti Yesu wanguŵakambiya kuti: ‘Ada ndi ini tigwira ntchitu yimoza. Mwaviyo, chifukwa chakuti Ada aja achigwira ntchitu pa zuŵa la Sabata kwa vyaka masawuzandi nganandi, nani nditenere kugwira ntchitu pa zuŵa la Sabata.’ Yapa Yesu wang’anamuwanga kuti zuŵa la Sabata lenga leche kugwira ntchitu mu nyengu yaki, chifukwa Chiuta wenga weche kugwira ntchitu yakufiska khumbu laki lakukwaskana ndi charu chapasi.
4 Ukaboni unyaki usanirika mumazu ngo wakutumika Paulo wangulemba. Pakukamba za chipumulu chaku Chiuta cho chikambika pa Chiyambo 2:2, Paulo wangulemba kuti: “Isi talongo chivwanu tisere mu chipumulu chenichi.” (Ahe. 4:3, 4, 6, 9) Ivi vilongo kuti zuŵa la Sabata lenga leche kulutiriya mu nyengu yaku Paulo. Kumbi zuŵa la chipumulu lenili latingi lilutirizgengi kuŵapu mpaka zukwanji?
5 Kuti fumbu ili limukiki, titenere kukumbuka chilatu cha zuŵa la Sabata. Lemba la Chiyambo 2:3 likonkhoska chilatu cha zuŵa lenili. Likamba kuti: “Chiuta wangutumbika zuŵa la nambala 7 ndipu wangulipatuwa.” Yehova ‘wangupatuwa’ zuŵa lenili, wangulitowesa pamwenga kuti wanguliŵika kuti lije lapade kuti wafiski chilatu chaki. Iyu wakhumbanga kuti charu chapasi chizazi ndi ŵanthu akuvwiya wo atingi achiphweriyengi kweniso kuphwere vamoyu vosi vo venga mwenimo. (Chiya. 1:28) Mwaviyo, Yehova Chiuta kweniso Yesu Khristu yo ndi “Mbuya wa Sabata,” “ŵeche kugwira ntchitu mpaka sonu” kuti afiski chilatu chenichi. (Mate. 12:8) Zuŵa la chipumulu chaku Chiuta lilutirizgengi kuŵapu mpaka po chilatu chaki chakukwaskana ndi charu chapasi chazifiskikiya mu Ulamuliru Waku Khristu wa Vyaka 1000.
w11 7/15 25 ¶6
Kumbi Chipumulu Chaku Chiuta Ntchinthu Wuli?
6 Chiuta wangukambiya Adamu ndi Heva chilatu chaki, kweni yiwu angukana kukoliyana ndi chilatu chenichi. Adamu ndi Heva ndiwu ŵenga ŵanthu akwamba kuleka kuvwiya Chiuta. Kutuliya nyengu yeniyi, ŵanthu mamiliyoni nganandi atimuvwiya cha Chiuta. Chinanga ndi mtundu wa Isirayeli wo Chiuta wanguwusankha, nawu wamuvwiyanga cha. Ndichu chifukwa chaki Paulo wangutcheŵeska Akhristu a mu nyengu ya akutumika kuti nawu angawira muchiŵana chakuleka kuvwiya nge mo anguchitiya Ayisirayeli. Iyu wangulemba kuti: “Tiyeni tiyesesi kuti tisere mu chipumulu chenichi, ndi chilatu chakuti paŵevi wakutole jalidu la kuleka kuvwiya.” (Ahe. 4:11) Wonani kuti Paulo wangukamba kuti kuleka kuvwiya kungatondekesa munthu kuti wasere mu chipumulu chaku Chiuta. Kumbi venivi vititikwaska wuli? Kumbi vingachitika kuti tisere mu chipumulu chaku Chiuta chinanga kuti tigarukiya chilatu chaki? Kwamuka kwa fumbu ili nkhwakukhumbika ukongwa, ndipu tikambiskanengi venivi munkhani yeniyi. Kweni pasonu panu, tiyeni tiwoni vo tingasambira pa nkhani yakusere mu chipumulu chaku Chiuta mwakukambiskana vinthu viheni vo Ayisirayeli angunangisa.
w11 7/15 28 ¶16-17
Kumbi Chipumulu Chaku Chiuta Ntchinthu Wuli?
16 Mazuŵa nganu, Akhristu auneneska agomezga cha kuti munthu wakhumbika kulondo Dangu laku Mozesi kuti wazitaskiki. Vo Paulo wangukamba kwa Akhristu a ku Efeso vingatiwovya pa nkhani iyi. Iyu wanguti: “Mwakugwiriskiya ntchitu wezi ukulu wenuwu, mwataskika chifukwa cha chivwanu, ndipu venivi vachitika chifukwa cha vakuchita vinu cha, kweni ndi mphasu yaku Chiuta. Ntchifukwa cha ntchitu cha, kuti paŵevi wakuja ndi chifukwa chakujitumbwiya.” (Aefe. 2:8, 9) Kumbi Akhristu akhumbika kuchitanji kuti asere mu chipumulu chaku Chiuta? Yehova wakupatuwa zuŵa la sabata pamwenga kuti zuŵa laki lakupumuliya kuti wafiski khumbu laki lakukwaskana ndi charu chapasi. Tisere mu chipumulu chaku Yehova pamwenga kuti tipumuliya nayu limoza asani tivwiya kweniso asani tichita vinthu mwakukoliyana ndi khumbu laki nge mo wakutivumbuliya kuziya mugulu laki.
17 Kweni asani tileka kuvwiya ulongozgi wa mu Bayibolu wo tilonde kuziya mwa kapolu wakugomezgeka ndi wazeru kweniso asani titende maŵanaŵanu ngidu, ndikuti tisuskana ndi khumbu laku Chiuta. Venivi vingatimbanyizga ubwezi widu ndi Yehova. Munkhani yakulondopu, tikambiskanengi vinthu vinyaki vo vingakwaska ŵanthu aku Chiuta. Kweniso tiwonengi asani vo tisankha vilongo kuti tivwiya Chiuta pamwenga titende maŵanaŵanu ngidu. Venivi ndivu vingalongo kuti tikusere nadi mu chipumulu chaku Chiuta pamwenga cha.
Kufufuza Fundu Zakuzirwa za mu Bayibolu
Vo Akuŵerenga Afumba
Kumbi “mazu ngaku Chiuta” ngo ngakambika pa Aheberi 4:12 kuti “ngamoyu ndipuso nganthazi” ngamiyanji?
▪ Mavesi nganyaki ngo nge pafupi ndi vesi ili, ngalongo kuti wakutumika Paulo wachikamba mazu yanga, wang’anamuwanga uthenga pamwenga vo Chiuta wakamba vakukwasana ndi khumbu laki vo tisaniya m’Bayibolu.
Kanandi asani lemba la Aheberi 4:12 laŵikika mumabuku ngidu likonkhoseka kuti, Bayibolu le ndi nthazi yakusintha ŵanthu. Ndipu mphakwenere kulikonkhosa viyo. Chinanga kuti veviyo, vingaŵa vakovya kuwona mavesi ngosi nga muchaputala ichi. Paulo wachiskanga Akhristu achiheberi kuti achitengi vinthu mwakukoliyana ndi khumbu laku Chiuta. Fundu zinandi zo Paulo wangukamba zingulembeka m’malemba ngakupatulika. Paulo wangukamba za Ayisraele wo Chiuta wanguŵawombo ku ukapolu ku Egipiti. Yiwu alindizanga kuchisere mucharu chakulayizgika, “chakwenda mukaka ndi uchi” cho atingi akapumuliyengemu.—Chit. 3:8; Mar. 12:9, 10.
Venivi ndivu Chiuta wakhumbanga. Chinanga kuti venga viyo, pavuli paki Ayisraele angunonopesa mitima yawu ndipu anguleka kuja ndi chivwanu. Mwaviyo, anandi angutondeka kusere mucharu cho atingi akapumuwengi. (Maŵ. 14:30; Yos. 14:6-10) Paulo wangukamba so kuti “layizgu lakupumuwa pa zuŵa lakupumuliya [laku Chiuta]” lecheŵaka. (Ŵah. 3:16-19; 4:1) “Layizgu” lenili le mugulu la vinthu vo Chiuta wakhumba kuti vichitiki. Nge mo anguchitiya Akhristu achiheberi, nasi tingasambira za khumbu laku Chiuta ndi kuchita vinthu mwakukoliyana nalu. Kulongo kuti layizgu ili lituliya m’Malemba, Paulo wanguko mazu ngo ngasanirika pa lemba la Chiyambo 2:2 ndi Sumu 95:11.
Kukamba uneneska, tichiskika chifukwa chakuziŵa kuti “layizgu lakupumuwa pa zuŵa lakupumuliya [laku Chiuta] lechendamali.” Mwakukoliyana ndi vo Bayibolu likamba, tigomeza kuti tingapumuwa nadi pa zuŵa lakupumuliya laku Chiuta ndipu tayamba kali kusintha mijalidu yidu kuti tipumuwi. Kuti tipumuwi pa zuŵa lakupumuliya laku Chiuta, tichita kulondo marangu ngo Chiuta wangupasa Mosese cha pamwenga tichita ŵaka vinthu vamampha vo vingachitisa kuti Yehova watiyanji. M’malu mwaki, tichita vinthu mwakukoliyana ndi khumbu laku Chiuta ndipuso tilutiriza kukoliyana nalu chifukwa chakuti te ndi chivwanu. Nge mo takambiya pachanya yapa, ŵanthu masawuzandi nganandi pacharu chosi, ayamba kusambira Bayibolu kuti aziŵi vo Chiuta wakhumba. Anandi mwa ŵanthu ŵenaŵa, asintha mijalidu yawu, alongo chivwanu ndipu abatizika. Mo asinthiya vinthu pa umoyu wawu, mbukaboni wakuti “mazu ngaku Chiuta ngamoyu ndipuso nganthazi.” Kuziŵa vo Chiuta wakhumba kwatiwovya kuti tisinthi umoyu widu ndipu tilutirizengi kusintha.
it-1 1139 ¶2
Chilindizga
Chilindizga ichi ntcha ŵanthu wo ŵe “mugulu lakudanikiya kuchanya” (Ahe. 3:1) wo amulonde umoyu wambula kufwa kweniso wambula kuvunda. Chilindizga ichi ntchakusimikizika chifukwa Chiuta yo wangakamba boza cha ndiyu wakulayizga ndipuso wakuchita kulapizga. Kweniso ntchakusimikizika chifukwa chakuti Khristu yo wakupaskika umoyu wambula kufwa kuchanya ndiyu we ndi mazaza pa chilindizga chenichi. Mwaviyo, chilindizga ichi che nge “ndondowa ya maumoyu ngidu. Ntchakusimikizika kweniso ntchakukho, ndipu chititisereza mukati kujumpha ketani [nge mo wasembi mura wasereriyanga Muchipinda Chakupaturika Ukongwa pa Zuŵa Lakubenekere Maubudi], mo Yesu yo we panthazi pidu wakusere mumalu mwaku isi. Iyu waja wasembi mura kwamuyaya nge mo vinguŵiya ndi Melekizedeki.”—Ahe. 6:17-20.