Kumbi Pempheru Lingakuwovyani Wuli?
Pamela wati wayamba kutama ukongwa, wangwamba kulonde chovyu chakuchipatala. Chinanga kuti venga viyo, iyu wapempheranga so kwaku Chiuta kuti wamupaski nthazi kuti wakunthiyepu suzgu yaki. Kumbi pempheru lingumuwovya?
Pamela wangukamba kuti: “Asani ndilonde chovyu cha nthenda yangu ya khansa, kanandi ndachitanga mantha. Kweni kupemphera kwaku Yehova Chiuta, kwandiwovyanga kuja ndi chimangu cha mumtima kweniso kuti ndi kunthiyengepu kwambula kuchita mantha. Ndeche kusuzgika mbwenu ndi urwirwi, kweni pempheru litindiwovya kuti ndiwonengi vinthu mwakwenere. Asani ŵanthu atindifumba kuti aziŵi mo ndiliri, nditiŵakambiya kuti, ‘nde umampha viŵi cha, kweni ndikondwa!’”
Chinanga kuti ve viyo, tikhumbika cha kulindizga dankha kuti titami ukongwa ndipu tipempherengi. Tosi tikumana ndi masuzgu, kwali ngakulu pamwenga ngamana. Ndipu kanandi, tikhumbikiya chovyu kuti tikunthiyepu. Kumbi pempheru lingawovya?
Bayibolu likamba kuti: “Muponye Yehova mphingu yaku, Ndipu iyu wakuwovyengi. Iyu wazomerezengi cha kuti murunji wawi.” (Salimo 55:22) Fundu yeniyi njakupembuzga ukongwa! Sonu kumbi pempheru lingakuwovyani wuli? Asani mupemphera kwaku Chiuta munthowa yakwenere, iyu wangakupaskani vo mukhumbikiya kuti mukunthiyepu masuzgu.—Wonani bokosi lakuti, “Kumbi Pempheru Lingakuwovyani Wuli?”