MO TINGAMALISIYA JALIDU LAKUTINKHANA

1 | Mujengi Ambula Sankhu

Vo Bayibolu Lisambiza:

“Chiuta walivi sankhu, kweni iyu walondere munthu wakutuliya mu mtundu wewosi yo watimuwopa ndi kuchita urunji.”—MACHITIDU 10:34, 35.

Vo Ling’anamuwa:

Yehovaa Chiuta watitiyeruzga cha chifukwa cha charu chidu, mtundu widu, khungu pamwenga mudawuku widu. Mumalu mwaki, iyu wawona mo tiliri mumtima. Kukamba uneneska, “munthu wawona ŵaka kubwalu, kweni Yehova wawona mumtima.”—1 Samuyeli 16:7.

Vo Mungachita:

Chinanga kuti tiziŵa cha vo ve mumitima ya ŵanthu, kweni tingayezga Chiuta ndi kuwona ŵanthu wosi mwakuyanana. Muyesesengi kuwona munthu weyosi pakuyija mumalu mwa kuŵawona nge gulu. Asani muwona kuti mutiŵawona mwambula kwenere ŵanthu a mtundu unyaki pamwenga charu chinyaki, pempherani kwaku Chiuta kuti wakuwovyeni kumalana ndi jalidu lenili. (Salimo 139:23, 24) Asani mupempha Yehova mwakutuliya pasi pa mtima kuti wakuwovyeni kuti muŵevi sankhu, mungasimikiza kuti iyu wavwisiyengi pempheru linu kweniso kukuwovyani.—1 Peturo 3:12.

a Yehova ndilu zina laku Chiuta.—Salimo 83:18.

“Ndenga ndechendajepu mwachimangu ndi mzungu . . . Sonu ndenga nadi mugulu chayilu la abali la pacharu chosi.”—TITUS

Vo Vinguchitika Nadi—TITUS

Wanguleka Kutinkha Ŵanthu Anyaki

Titus wenga mugulu la ŵanthu wo atinkhanga marangu ngakukandirizga kweniso kusankhana mtundu. Iyu wanguti: “Talutanga mutawuni ku malu ngo afipa azomerezekanga cha kulutaku, nge mahotelu kweniso mabala kuti tikayambisi ndewu.” Titus wangukamba kuti wachitanga venivi chifukwa chakuti waŵatinkhanga ukongwa ŵanthu anyaki, ndipu wangukamba so kuti: “Asani ndayambana ndi munthu weyosi, kwali ndi munthulumi pamwenga munthukazi, ini ndini ndadankhanga kuponya fayiti.”

Titus wangwamba kusintha wati wayamba kusambira Bayibolu ndi Akaboni aku Yehova. Wati waŵerenga Bayibolu, lingumuwovya ukongwa. Iyu wanguchiskika ukongwa ndi layizgu lakukwaskana ndi charu chifya. Mucharu chenichi “nyifwa yazamuŵaku so cha, kwazamuŵavi kuliya, kukuta pamwenga urwirwi.”—Chivumbuzi 21:3, 4.

Pakwamba, Titus vamusuzganga kuti watuzgemu jalidu lakutinkhana mumtima mwaki. Iyu wanguti: “Venga vakusuzga ukongwa kuti ndisinthi mo ndaŵanaŵaniyanga kweniso kuchitiya vinthu.” Kweni wanguwovyeka ndi vo wanguŵerenga pa Machitidu 10:34, 35, po pakamba kuti Chiuta walivi sankhu.

Kumbi ndi vinthu wuli vo vinguchitika? Titus wangukamba kuti: “Ndingusimikiza kuti Akaboni aku Yehova ndiwu asopa mwauneneska ndati ndawona kuti atanjana kwambula kutoliyaku kanthu kuti mbakupambana mtundu pamwenga khungu. Chinanga mphanyengu yo ndenga ndechendabatiziki nge Kaboni, mubali yo wenga mzungu wangundidaniya kunyumba kwaki kuti tikaryiyi limoza chakurya. Venga nge kuti ndilota. Chijaliyi, ndenga ndechendajepu mwachimangu ndi mzungu, kuti ndiryiyi nayu limoza chakurya munyumba mwaki. Sonu ndenga nadi mugulu chayilu la abali la pacharu chosi.”