MO TINGAMALISIYA JALIDU LAKUTINKHANA

3 | Tuzganimu Jalidu Lakutinkhana Mumaŵanaŵanu Nginu

Vo Bayibolu Lisambiza:

“Sambukani mwakusintha maŵanaŵanu nginu, kuti muziŵi khumbu laku Chiuta lamampha, lakuzomerezeka kweniso lakufikapu.”—AROMA 12:2.

Vo Ling’anamuwa:

Vo tiŵanaŵana ndi nkhani yikulu kwaku Chiuta. (Yeremiya 17:10) Tikhumbika kuchita vinandi kuluska waka kukhwecha kukamba pamwenga kuchita chechosi chakulongo kuti titinkha anyidu. Kutinkha ŵanthu kutambiya mumaŵanaŵanu kweniso mumtima. Mwaviyo, tikhumbika kuleka maŵanaŵanu ngengosi ngo ngangachitiska kuti titinkhengi ŵanthu. Asani tingachita viyo, ‘tingasambuka’ nadi ndi kuleka jalidu la kutinkhana.

Vo Mungachita:

Mujifufuzengi mwauneneska pa nkhani ya mo muŵanaŵaniya kweniso mo muwone ŵanthu, ukongwa a mtundu unyaki pamwenga charu chinyaki. Jifumbeni kuti: ‘Kumbi nditiŵawona wuli? Kumbi nditiŵawona mwakutole waka vo ndiziŵa vakukwaskana ndi yiwu? Pamwenga ndichita viyo chifukwa cha sankhu?’ Mukhwechengi kuwonere pamwenga kuŵerenga nkhani zo zichiska kutinkhana kweniso nkhaza.

Mazu ngaku Chiuta ngangatiwovya kuti tileki kutinkha anyidu mumaŵanaŵanu ndi mumtima mwidu

Kanandi titijiŵikiya kuvuli pa nkhani ya mo tiŵanaŵaniya kweniso mo tivwiya. Kweni Mazu ngaku Chiuta, ngangatiwovya ‘kuziŵa maŵanaŵanu ndi makhumbiru nga mtima.’ (Aheberi 4:12) Mwaviyo, lutirizgani kusambira Bayibolu. Muyeruzgiyengi vo musambira ndi maŵanaŵanu nginu, ndipu muyesesengi kuti vo muŵanaŵana vikoliyanengi ndi vo Bayibolu lisambiza. Mazu ngaku Chiuta ngangatiwovya kuti tileki jalidu lakutinkhana, lo ‘likujinthika mwanthazi’ mumaŵanaŵanu kweniso mumtima widu.—2 Akorinto 10:4, 5.

Vo Vinguchitika Nadi

STEPHEN—Wangusintha Maŵanaŵanu Ngaki

Stephen ndi ŵanthu a mubanja laki atinkhikanga ndi azungu. Venivi vinguchitiska kuti wakopeki ndi gulu landali lo larwiyanga wanangwa wa ŵanthu. Pati pajumpha nyengu wangwamba kuchita vinthu vinyaki vankhaza. Stephen wanguti: “Zuŵa linyaki ini ndi anyangu tinguwonere filimu yo yalongonga mo akapolu afipa atombozgekiyanga ku United States. Chifukwa cha kukwiya ndi vinthu vambula urunji venivi, tingupuma azungu wosi achinyamata wo ŵenga muholu yakuwonesiyamu mafilimu. Pavuli paki, tinguluta munyumba za azungu zo zenga muchigaŵa chidu kuti tikaŵakwechuwi.”

Maŵanaŵanu ngaku Stephen ngangusinthiya limu wati wayamba kusambira Bayibolu ndi Akaboni aku Yehova. Iyu wangukamba kuti: “Chifukwa chakuti ndinguja nyengu yitali ndi ŵanthu asankhu, ndinguzizwa ukongwa ndi vo Akaboni achitanga. Mwakuyeruzgiyapu, Kaboni munyaki yo ndi mzungu wanguluta kucharu chinyaki, ndipu ŵana ŵaki wanguŵasiya kuti aje ndi banja linyaki la Akaboni la ŵanthu afipa. Kweniso banja linyaki laleranga mnyamata mufipa yo wasoŵanga pakuja.” Stephen wangusimikiza kuti Akaboni aku Yehova atanjana ukongwa pacharu chosi chapasi nge mo Yesu wangukambiya limu kuti ndivu Akhristu auneneska azamuchitanga.—Yohane 13:35.

Kumbi ndi vinthu wuli vo vinguwovya Stephen kuleka jalidu laki lakutinkha ŵanthu anyaki? Lemba la Aroma 12:2 ndilu lingumuwovya. Iyu wangukamba kuti: “Ndinguwona kuti ndakhumbikanga kusintha maŵanaŵanu ngangu ndipuso kulutirizga kuchita vinthu mwachimangu ndipu ndinguwona kuti wenuwu mbumoyu wamampha.” Sonu pajumpha vyaka 40 kutuliya po Stephen wakuleke kutinkha ŵanthu.