MO TINGAMALISIYA JALIDU LAKUTINKHANA

4 | Chiuta Wangakuwovyani Kuti Muleki Kutinkha Ŵanthu

Vo Bayibolu Lisambiza:

“Mijalidu yo mzimu utuzga ntchanju, likondwa, chimangu, kuzikira, lisungu, umampha, chivwanu, kuzika, kujiko.”—AGALATIYA 5:22, 23.

Vo Ling’anamuwa:

Chiuta wangatiwovya kuti tileki kutinkha ŵanthu. Mzimu waki ungatiwovya kuja ndi mijalidu yo tingafiska cha kuja nayu paku isi tija. Mwaviyo, mumalu mwakwesesa kugwiriskiya ntchitu nthazi zidu kuti timalani ndi jalidu lakutinkhana, tingachita umampha kuthemba chovyu cho Chiuta watitipaska. Asani tichitengi viyo, tivwengi nge mo wakutumika Paulo wanguvwiya. Iyu wangulemba kuti: “Mu vinthu vosi ndija ndi nthazi kuporote mwaku yo watindipaska nthazi.” (Afilipi 4:13) Ndipu tingakamba kuti: “Chovyu changu chituliya kwaku Yehova.”—Salimo 121:2.

Vo Mungachita:

“Yehova wandisintha kutuwa ku munthu wankhaza kuja munthu wachimangu.”—WALDO

Mupempherengi kwaku Yehova mwakutuliya pasi pa mtima kuti wakupaskeni mzimu waki wakupaturika. (Luka 11:13) Mupemphengi kuti wakuwovyeni kuti mulongongi mijalidu yaki pa umoyu winu. Musambirengi vo Bayibolu likamba pa nkhani ya mijalidu yo yitovya kuleka jalidu lakutinkhana, nge chanju, chimangu, kuzikira kweniso kujiko. Musaniyengi nthowa zo mungajaliya ndi mijalidu yeniyi pa umoyu winu. Ndipu muchezengi ndi ŵanthu wo nawu atesesa kuja ndi mijalidu yeniyi. Ŵanthu ŵenaŵa ‘angakuchiskiyani ku chanju ndi ku ntchitu zamampha.’—Aheberi 10:24.

Vo Vinguchitika Nadi—WALDO

Wanguleka Kutinkha Ŵanthu

Waldo wangulereka umampha cha vo vinguchitiska kuti watinkhengi ukongwa ŵanthu. Iyu wangukamba kuti: “Kanandi ndapumananga ndi ŵanthu wo agulisanga munkhwala wakutimbanyizga wongu . . . Zuŵa linyaki, kagulu kanyaki kavigeŵenga kangulembera chigeŵenga chakofya kuti chindibayi, kweni ndinguthaŵa chati chandigwaza ndi chimayi pe.”

Waldo wangukondwa cha muwolu waki wati wayamba kusambira Bayibolu ndi Akaboni aku Yehova. Iyu wanguti: “Ndaŵatinkhanga Akaboni ndipu kanandi ndaŵatukanga. Kweni nyengu zosi andimukanga mwaulemu.”

Pakumaliya, Waldo nayu wangwamba kusambira Bayibolu. Iyu wanguti: “Chenga chipusu cha kuti ndigwiriskiyengi ntchitu vo ndasambiranga. Ndingusimikiza kuti ndazamuleka cha kuja mukali kweniso wankhaza.” Kweni vo wangusambira mu Bayibolu vingumuwovya ukongwa.

Waldo wangukamba kuti: “Zuŵa linyaki, Alejandro yo wandisambizanga Bayibolu, wangundipempha kuti ndiŵerengi Agalatiya 5:22, 23. . . . Alejandro wangundikonkhoske kuti ndikhumbika kuthemba nthazi zangu cha kuti ndije ndi mijalidu yo yizumbulika pa lemba ili, kweni mzimu wakupaturika waku Chiuta. Fundu ya uneneska yeniyi, yingusinthiya limu mo ndawoniyanga vinthu!”

Waldo wanguleka kutinkha ŵanthu chifukwa wanguthemba Chiuta kuti wamuwovyi. Iyu wangukamba kuti: “Abali ŵangu kweniso mabwezi ngangu ngakali, angavwisa cha mo ndasinthiya.” Iyu wangukamba so kuti: “Yehova wandisintha kutuwa ku munthu wankhaza kuja munthu wachimangu.”