Chiuta Watikuŵanaŵaniyani
CHIFUKWA chakuti Bayibolu ndi buku lakutuliya kwaku Chiuta, le ndi ulongozgi wamampha ukongwa wo ungatiwovya. Buku ili ndi buku la vachipatala cha, kweni lingatiwovya kuti timalani ndi vinthu vo vititifipiska mtima, asani tisuzgika maŵanaŵanu kweniso titama matenda nganyaki.
Kweni chakukhumbika ukongwa ntchakuti Bayibolu lititisimikiziya kuti Mlengi widu Yehova Chiuta,a wavwisa maŵanaŵanu ngidu kweniso mo tivwiya kuluska munthu weyosi. Iyu ngwakukhumbisiska kutiwovya pa suzgu yeyosi. Wonani uthenga wakuchiska wo we mu mavesi ngaŵi yanga:
“Yehova we pafupi ndi wo asweka mtima; iyu wataska wo mzimu wawu watekenyeka.”—SALIMO 34:18.
“Ini, Yehova Chiuta waku, ndakolesa janja laku lamaryi, ndini Yo watikukambiya kuti, ‘Ungawopanga cha. Ndikuwovyengi.’”—YESAYA 41:13.
Nanga kumbi Yehova watitiwovya wuli kukunthiyapu asani titama matenda ngakusuzgika maŵanaŵanu? Nge mo muwoniyengi mu nkhani zakulondopu, Yehova walongo kuti watitiphwere mu nthowa zakupambanapambana.
a Yehova ndilu zina laku Chiuta.—Salimo 83:18.