Abali Asonu Ŵaŵi a mu Wupu Wakulongozga

PA CHITATU, 18 January, 2023, pa jw.org panguŵikika chipharazgu chapade chakukamba kuti Mubali Gage Fleegle ndi Mubali Jeffrey Winder asankhika kuti ateŵetiyengi mu Wupu Wakulongozga wa Akaboni aku Yehova. Abali wosi ŵaŵi ŵenaŵa ateŵete Yehova mwakugomezgeka kwa nyengu yitali.

Mubali Fleegle wangukuliya kuzambwi kwa Pennsylvania, U.S.A., ndipu wakulereke mu banja la Akaboni aku Yehova. Pa nyengu yo iyu wenga mnyamata, banja lawu lingusamiya mutawuni yinyaki ya kumuzi kuti akawovyi ko kwakhumbikanga apharazgi anandi. Pati pajumpha nyengu yimanavi, iyu wangubatizika pa 20 November, 1988.

Apapi a Mubali Fleegle kanandi amuchiskanga kuti wazichiti uteŵeti wa nyengu zosi. Yiwu ayanjanga kudana akuwonere madera kweniso abali ndi azichi wo ateŵete pa Beteli kuti azichezi nawu kunyumba kwawu. Ndipu Mubali Fleegle wawonanga mo abali ŵenaŵa akondwiyanga. Pati pajumpha ŵaka nyengu yimanavi kutuliya po wangubatizikiya, iyu wangwamba kuchita upayiniya wa nyengu zosi pa 1 September, 1989. Pati pajumpha vyaka viŵi, iyu wangufiska chilatu chaki chakuteŵete pa Beteli cho wangujiŵikiya pa nyengu yo wenga ndi vyaka 12. Iyu wangwamba uteŵeti wa pa Beteli ku Brooklyn mu October 1991.

Mubali Fleegle wangugwira ntchitu yakupanga mabuku kwa vyaka 8 ndipu pavuli paki wangwamba kuteŵete mu Dipatimenti ya Uteŵeti. Pa nyengu yeniyi, wanguteŵete mu mpingu wa chineneru cha Chirashiya kwa vyaka vimanavi. Mu 2006 wangutorana ndi Nadia, ndipu nayu wangwamba kuteŵete pa Beteli. Wosi ŵaŵi ateŵetiyapu mu mpingu wa Chiphwitikizi kweniso Chisipanishi kwa vyaka vakujumpha 10. Wati wateŵete kwa vyaka vinandi mu Dipatimenti ya Uteŵeti, Mubali Fleegle wangwamba kuteŵete mu Ofesi ya Komiti Yakuwonere Ntchitu Yakusambiza ndipu pavuli paki mu Ofesi ya Komiti ya Uteŵeti. Mu March 2022, wangusankhika kuti wateŵetiyengi nge wakovya Komiti Yakuwonere Uteŵeti ya Wupu Wakulongozga.

Mubali Winder wangukuliya ku Murrieta, ku California, U.S.A. Apapi ŵaki ndiwu angumusambiza uneneska ndipu wangubatizika pa 29 March, 1986. Mwezi wakulondopu wangwamba kuchita upayiniya wakovya. Iyu wakondwanga ukongwa ndi upayiniya ndipu wakhumbanga kulutirizga. Wati wachita upayiniya wakovya kwa myezi yinandiku, wangwamba kuchita upayiniya wa nyengu zosi pa 1 October, 1986.

Pa nyengu yo wenga mnyamata, Mubali Winder wanguluta kuchiwona aku ŵaki ŵaŵi wo ateŵetiyanga pa Beteli. Ulendu wenuwu ungumuchiska kuti waziyambi kuchita uteŵeti wa pa Beteli asani wazikuwa. Ndipu mu May 1990, wangudanika kuti wakayambi kuteŵete pa Beteli ku Wallkill.

Pa Beteli, Mubali Winder wanguchita mauteŵeti ngakupambanapambana, nge kuteŵete mu Dipatimenti Yakutowesa Malu, Dipatimenti Yakulima kweniso mu Ofesi yo Yiphwere Ateŵete a pa Beteli. Mu 1997, wangutorana ndi Angela, ndipu kwambiya nyengu yeniyi wosi aja achiteŵete pa Beteli. Mu 2014, anguŵakambiya kuti aluti ku Warwick, ko Mubali Winder wawovyanga pa ntchitu yakuzenga likulu lidu la pacharu chosi. Mu 2016, yiwu angusamiya ku Patterson ko kuchitikiya masukulu nga gulu laku Yehova ndipu kwenuku Mubali Winder wateŵetiyanga mu Dipatimenti Yakupanga Mavidiyo ndi Vinthu Vakuvwisiya. Pati pajumpha vyaka vinayi, yiwu anguwere so ku Warwick, ndipu Mubali Winder wangwamba kuteŵete mu Ofesi ya Komiti Yakuwonere Ateŵeti a pa Beteli. Mu March 2022, iyu wangusankhika kuti wateŵetiyengi nge wakovya Komiti Yakuwonere Ateŵeti a pa Beteli ya Wupu Wakulongozga.

Tipempha Yehova kuti waŵatumbiki ukongwa abali ŵenaŵa wo ŵe “nge mphasu,” po alutirizga kugwira mwaphamphu ntchitu za Ufumu.—Aefe. 4:8.