Kumbi ndi Vinthu Wuli vo Vichitika pa Zowala za Akaboni aku Yehova?
Kanandi zowala za Akaboni aku Yehova zichitika munthowa yipusu, mwaulemu kweniso pakambika nkhani ya mu Bayibolu. Nyengu zinyaki ŵeneku a zowala angasankha kuti pachitiki phwandu asani nkhani ya mu Bayibolu yakambika.a Kukwamba kwa uteŵeti waki, Yesu nayu wanguluta kuphwandu nge lenili ku Kana.—Yohane 2:1-11.
Kumbi ŵanthu wo adanika ku zowala za Akaboni aku Yehova atenere kuvwala wuli?
Kumbi wo adanika apumisana mabotolu pamwenga matambula nga vakumwa?
Kumbi ndi vinthu wuli vo vichitika pa mwambu wa zowala?
Nkhani ya mu Bayibolu yo yikambika pa zowala ndichu chigaŵa chakukhumbika ukongwa. Nkhani yeniyi yikambika ndi mura mumpingu wa Akaboni aku Yehova ndipu yito maminisi 30. Nkhani iyi yikambika mwaulemu ndipuso mwakuchiska kuti yiwovyi ŵanthu wo atorana kuti ayanjanengi, akondwengi ndipuso kuti nthengwa yawu yije yakukho.—Aefeso 5:33.
Muvyaru vinandi boma litiŵapaska mazaza ŵara mumipingu ya Akaboni aku Yehova kuti alimiyi asani akwatisa zowala za Akaboni aku Yehova anyawu, mwakukoliyana ndi marangu nga charu cho. Asani veviyo, kukumaliya kwa nkhani, ŵanthu wo atorana alayizgana. Nyengu zinyaki avwalikana so mpheti. Pakumaliya, mura yo watiŵakwatisa wapharazga ku ŵanthu kuti yiwu sonu ndi banja.
Kweni muvyaru vinyaki marangu nga boma ngakamba kuti ŵanthu wo atorana akakwatisiyengi mumaofesi nga boma. Ŵanthu wo atorana achita ivi asani kwaja kamanavi kuti zuŵa lakukambiya nkhani likwani. Asani munthulumi ndi munthukazi anguchita cha malayizgu nga nthengwa kuofesi ya boma, angachita venivi kukumaliya kwa nkhani. Asani anguchita malayizgu nga nthengwa kuofesi ya boma, angasankha kungawereza so pa nyengu ya nkhani. Kweni pa nyengu iyi atenere kungakamba munthowa yakuti ngavwiki kuti akulayizgana kali. Asani nkhani yamala, paperekeka pempheru kuti Chiuta watumbiki banja lasonu.
Kumbi zowala za Akaboni aku Yehova zichitikiya pani?
Akaboni aku Yehova anandi asankha kuti nkhani ya nthengwa yawu yikambikiyi mu Nyumba ya Ufumu asani pasanirika mpata.b Asani wo atorana asankha kuti pachitiki phwandu pavuli pa nkhani, yiwu apenja ŵija malu ngo angachitiyaku phwandu lo.
Kumbi mbayani wo atenere kusanirikapu?
Asani nkhani ya nthengwa yikambikiya mu Nyumba ya Ufumu, weyosi wangasanirikapu, kaya ndi Kaboni waku Yehova pamwenga cha. Kweni asani ŵanthu wo atorana asankha kuti pachitiki phwandu, yiwu asankha ŵija ŵanthu wo angaŵadana.
Kumbi ŵanthu wo adanika ku zowala za Akaboni aku Yehova atenere kuvwala wuli?
Chinanga kuti palivi dangu lakuŵika la mo angavwaliya asani nkhani ya nthengwa yikambikengi mu Nyumba ya Ufumu, kweni Akaboni aku Yehova ayesesa kulondo ulongozgi wa mu Bayibolu ndipu avwala umampha ndipuso mwaulemu. Mwaviyo, vija umampha ukongwa asani wosi wo asanirika pa nkhani ya nthengwa yo yikambikiya mu Nyumba ya Ufumu alondo ulongozgi wenuwu. (1 Timote 2:9) Asani wo atorana asankha kuti pachitiki phwandu, wo adanika akhumbika so kulondo ulongozgi wenuwu.
Kumbi wo adanika apereka mphasu pa zowala?
Bayibolu lititichiska kuti tije ndi mtima wakupaska. (Salimo 37:21) Akaboni aku Yehova akondwa kupereka kweniso kulonde mphasu pa zowala. (Luka 6:38) Kweni Akaboni aku Yehova apharazga cha mazina nga ŵanthu wo apereka mphasu pamwenga kupemphesa mphasu. (Mateyu 6:3, 4; 2 Akorinto 9:7; 1 Peturo 3:8) Kuchita viyo kukoliyana cha ndi fundu za mu Malemba kweniso kuchitiska soni ŵanthu wo adanika.
Kumbi wo adanika apumisana mabotolu pamwenga matambula nga vakumwa?
Bayibolu likanizga cha kupumisana ndipuso kusoske muchanya mabotolu pamwenga matambula nga vakumwa. Kweni kuti aleki kuguŵiska ŵanthu anyaki, Akaboni anyaki angapempha ŵanthu wo aŵadana ku zowala zawu kuti angachitanga cha venivi.—Aroma 14:21.
Kumbi wo atorana atiŵawaziya mpunga?
Awa. Mumadera nganyaki ŵanthu atiŵawaziya mpunga pamwenga vinthu vinyaki ŵanthu wo atorana. Yiwu agomezga kuti kuchita venivi kutovya ŵanthu wo atorana kuti vinthu viŵayendiyengi umampha, akondwengi kweniso kuti aje ndi umoyu utali. Kweni Akaboni aku Yehova achitaku cha miyambu yosi yo yikoliyana ndi vamasenga yo yisazgapu kukhumbiya ŵanthu mwaŵi, chifukwa kuchita venivi kususkana ndi vo Bayibolu likamba.—Yesaya 65:11.
Kumbi patuŵa chakurya ndi vakumwa?
Pa mwambu wa nthengwa wo uchitikiya ku Nyumba ya Ufumu paja vakurya cha pamwenga vakumwa. Anyaki wo atorana asankhiya limu malu ngakuchiryiyaku vakurya pamwenga vakumwa asani nkhani ya nthengwa yamala ku Nyumba ya Ufumu. (Wakutawula 9:7) Asani asankha kuti paŵi moŵa, yiwu awonesesa kuti ngunandi cha kweniso kuti uperekeka ku ŵanthu ŵija wo ŵe ndi vyaka vakuzomerezeka ndi boma kuti angamwa moŵa.—Luka 21:34; Aroma 13:1, 13.
Kumbi patuŵa sumu ndi kuvina?
Asani wo atorana asankha kuti achiti phwandu pavuli pa nkhani, yiwu angasankha kuti paŵi sumu ndi kuvina. (Wakutawula 3:4) Chinanga kuti yiwu angasankha sumu mwakukoliyana ndi vo yiwu ndipuso ŵanthu a muchigaŵa chawu atanja, kweni atenere kuyesesa kusankha sumu zamampha. Kweni sumu zo zimbika mu Nyumba ya Ufumu pakukwatisa nthengwa zija zakutuliya mu Malemba.
Kumbi Akaboni aku Yehova akumbukiya zuŵa lo angutoriyana?
Chifukwa chakuti Bayibolu lizomereza cha pamwenga kukaniza kukumbukiya zuŵa lo ŵanthu angutoriyana, Akaboni aku Yehova wo akutorana asankha ŵija kukumbukiya zuŵa lenili pamwenga cha. Asani asankha kuti achitengi venivi, angakumbukiya zuŵa ili ŵija pamwenga ndi ŵanthu a mubanja lawu ndipuso mabwezi ngawu.
a Miyambu yinyaki, kayendeseru ka nthengwa ndipuso marangu nga boma ngo Akaboni aku Yehova angalondo pa zowala ngangapambana mwakukoliyana ndi dera lo aja.
b Mubali yo wakamba nkhani ya nthengwa watiŵalipirisa cha wo atorana kweniso yiwu apereka ndalama cha kuti agwiriskiyi ntchitu Nyumba ya Ufumu.