Kumbi Mbumampha Kusopa Vikozgu?

Vo Bayibolu limuka

Awa, mbumampha cha. Pakukamba za marangu ngo Chiuta wangupaska Ayisirayeli, buku la New Catholic Encyclopedia likamba kuti: “Nkhani zinandi za mu Bayibolu zilongo kuti wo asopa Chiuta mwauneneska akhumbika cha kugwiriskiya ntchitu vikozgu.” Wonani vo Bayibolu likamba:

• “Ungajipangiyanga chikozgu chakusema cha, pamwenga chikozgu cha chinthu chechosi chakuchanya, chapacharu chapasi pamwenga chamumaji nga pacharu chapasi. Ungavisindamiyanga cha pamwenga kunyengeka kuti uviteŵete, pakuti ini Yehova Chiuta waku, ndini Chiuta yo wakhumba kuti ŵanthu ajiperekengi kwaku ini pe.” (Ekisodo 20:4, 5) Pakuti Chiuta ‘wakhumba kuti ŵanthu ajiperekengi kwaku iyu pe,’ wakondwa cha asani titumbika pamwenga kusopa vikozgu, vithuzi kweniso angoza.

• “Ndikhumba cha kuti ŵanthu athamikengi vikozgu vakujoba mumalu mwakuthamika ini.” (Yesaya 42:8) Chiuta wakana kuti ŵanthu amusopengi mwakugwiriskiya ntchitu vikozgu. Pa nyengu yo Ayisirayeli asopanga Chiuta mwakugwiriskiya ntchitu chikozgu cha mwana wa ng’ombi, Chiuta wangukamba kuti “achita vinthu vo vingachitiska kuti anangiki.”—Ekisodo 32:7-9.

• “Tingaŵanaŵananga cha kuti Chiuta we nge golidi pamwenga siliva pamwenga mwa, pamwenga we nge chinthu chechosi chakusemeka mwalusu cho munthu wangapanga.” (Machitidu 17:29) Pa kusopa kwaboza, ŵanthu agwiriskiya ntchitu vikozgu vo ‘vikusemeka mwalusu,’ kweni nge mo Bayibolu likambiya, Akhristu akhumbika ‘kwenda mwachivwanu, mwavakuwoneka ndi masu cha.’—2 Akorinto 5:7.

• “Mwaŵana, jivikiliyeni ku angoza.” (1 Yohane 5:21) Marangu ngo Chiuta wangupaska Ayisirayeli kweniso ngo wakupaska Akhristu, ngalongo kuti chisambizu chakuti Chiuta wazomereza kuti timusopengi mwakugwiriskiya ntchitu vikozgu, ntchauneneska cha.