Kumbi Akaboni aku Yehova Akusintha Bayibolu Kuti Likoliyani ndi vo Agomezga?
Awa, tikusintha cha. Mumalu mwaki asani tawona kuti vinyaki mwa vinthu vo tigomezga vipambana ndi vo ve mu Bayibolu tisintha kuti tikoliyani ndi vo Bayibolu likamba.
Bayibolu la Charu Chifya la Malemba Ngakupaturika lechendatuzgiki mu 1950, tingufufuza mwakwenere vo Bayibolu likamba. Tingugwiriskiya ntchitu ma Bayibolu ngakupambanapambana pakukhumba kuwonesesa kuti vo tigomezga vikoliyana ndi Bayibolu. Wonani vakuyeruzgiyapu vimanavi vo Akaboni aku Yehova aja achigomezga kwa nyengu yitali ndipu wonani asani vikoliyana ndi vo Bayibolu lisambiza.
Vo tigomezga: Kulivi achiuta atatu mwaku Chiuta yumoza. Magazini ya Zion’s Watch Tower ya July 1882 yingukamba kuti: “Ŵanthu wo aŵerenga magazini ngidu aziŵa kuti tigomezga kuti kwe Yehova, Yesu kweniso Mzimu wakupaturika. Yiwu aziŵa so kuti tigomezga cha kuti kwe achiuta atatu mwaku Chiuta yumoza vo Bayibolu lileka kusambiza.”
Vo Bayibolu likamba: “Yehova Chiuta widu ndi Yehova yumoza” (Dotoronome 6:4) “Kweni kwaku isi kwe Chiuta yumoza, Ada, mweniyo chifukwa chaku iyu, vinthu vosi vilipu ndipuso isi te ŵaki. Kweniso kwe Mbuya yumoza Yesu Khristu, mweniyo kuporote mwaku iyu vinthu vosi vilipu, ndipu isi so kuporote mwaku iyu.” (1 Akorinto 8:6) Yesu mweneku wangukamba kuti: “Ada mbara kuluska ini.”—Yohane 14:28.
Vo tigomezga: Kulivi malu nga helo ngo munthu wamutombozgekiyaku kwamuyaya. Magazini ya Zion’s Watch Tower ya July 1882 yenga ndi nkhani ya mutu wakuti: “Malipiru nga Ubudi ndi Nyifwa.” Mutu wenuwu ungutuliya pa lemba la Aroma 6:23 mu Bayibolu la King James Version. “Ndipu fundu yeniyi yenga yambula kusuzga kweniso yakuvwika umampha. Kweni vakuziziswa kuti ŵanthu anandi wo awona kuti Bayibolu ndi mazu ngaku Chiuta asuska fundu yakuvwika umampha yeniyi. Yiwu agomezga kuti Bayibolu lisambiza kuti asani munthu yo wachitanga vinthu viheni wafwa wamutombozgeka kwamuyaya.”
Vo Bayibolu lisambiza: “Umoyu wo ubuda ndiwu ufwengi.” (Ezekiyeli 18:4, 20) Chilangu chakumaliya cho chazamuperekeka ku ŵanthu wo asuska mazu ngaku Chiuta nkhutombozgeka kwamuyaya cha kweni ‘azamunangika kwamuyaya.’—2 Atesalonika 1:9.
Vo tigomezga: Ufumu waku Chiuta ndi boma chayilu ndipu we mu mtima mwa munthu cha. Pakukamba za Ufumu waku Chiuta magazini ya Zion’s Watch Tower ya December 1881 yingukamba kuti: Ufumu wenuwu wazamujalikiskika kweniso wazamutuzgapu maufumu ngosi pacharu chapasi.”
Vo Bayibolu lisambiza: “Mu mazuŵa nga mafumu ngenanga, Chiuta wakuchanya wazamujalikiska ufumu wo wazamubwangandulika cha. Ufumu wo, wazamuperekeka ku mtundu wewosi cha wa ŵanthu. Wazamuphwanya ndi kutuzgapu maufumu ngosi ngenanga, ndipu ufumu wenuwu pe ndiwu wazamuŵaku mpaka muyaya.”—Daniyeli 2: 44.
Kumbi Akaboni aku Yehova athemba waka Bayibolu la Charu Chifya kuti avikiliyi vo agomezga?
Awa, tilutirizga mbwenu kugwiriskiya ntchitu ma Bayibolu ngakupambanapambana pa ntchitu yidu yakupharazga. Chinanga kuti tipereka kwa wezi Bayibolu la Charu Chifya ku ŵanthu wo tisambira nawu Bayibolu kweni wo akhumba kugwiriskiya ntchitu ma Bayibolu nganyaki titiŵakaniya cha.