Teŵetiyani Yehova, Satana Cha

Weyosi we ndi wanangwa wakusankha. Tikhoza kusankha kuteŵete Yehova pamwenga Satana ndi viŵanda vaki. Tingachita cha vosi viŵi. Kuteŵete Yehova nchinthu chazeru ukongwa!

Yehova Ngwamampha

Nge mo tawone, viŵanda vikondwa ukongwa asani vipweteka ndipuso kupusika ŵanthu. Yehova we viyo cha. Iyu watanja ŵanthu nge mo Ada atanjiya ŵana ŵawu. Iyu ndiyu Wapereka “mpasku wosi wamampha ndi chawezi chosi chizirima.” (Yakobe 1:17) Watiŵanola cha ŵanthu vinthu vamampha, chinanga kuti wangataya chinthu chakuzirwa ukongwa kwaku iyu.—Ŵaefesu 2:4-7.

Aŵanaŵaniyani vinthu vo Yesu, Mwana Waku Chiuta wanguchita pacharu chapasi. Iyu wanguchitiska kuti ŵanthu ambuwu alongoro ndi kujula masu nga achibulumutiya. Wanguchizga ŵanthu amakhati ndi akupunduka. Watuzganga ŵanthu viŵanda ndi kuchizga mitundu yosi ya matenda. Kuziya mu nthazi yaku Chiuta, Yesu wanguyuska chinanga mbanthu akufwa.—Mateyu 9:32-35; 15:30, 31; Luke 7:11-15.

M’malu mwakutikambiya maboza ngo ngangatilandizga, Chiuta watitikambiya uneneska nyengu zosi. Iyu wapusika munthu weyosi cha.—Maŵerengedu 23:19.

Kanani Kuchita Vinthu Vaukazuzi

Nge mo kachidononu kangawiliya mu mtatavu wa duŵiyuŵi, ŵanthu mamiliyoni nganandi akoleka ukongwa ndi va masenga ndipuso maboza. Atopa ŵanthu akufwa. Atopa viŵanda. Atopa kutembeka, akuwombeza, njirizi ndipuso vinthumwa. Yiwu agomezga ndi kuchita vinthu vo vilongozgeka ndi maboza ngaku Satana Diabolo. Ateŵeti aku Chiuta atopa vinthu ivi cha.

Yehova ngwanthazi ukongwa kuruska Satana. Asani muteŵete Yehova, iyu wakuvikiliyeningi ku viŵanda. (Yakobe 4:7) Afwiti angakulowani cha. Mwakuyeruzgiyapu, ku Nigeria ng’anga zitatu zakuziŵa ukongwa vinthu va masenga zinguthya munkhwala kuti zibayi yumoza wa Akaboni aku Yehova yo wangukana kutuwa mu msumba. Munkhwala wawu wati watondeka kugwira nchitu, ng’anga yimoza yinguwopa ukongwa, ndipu yinguluta kwa Kaboni uyu kuchipepesa.

Asani musuzgika ndi viŵanda, mukhoza kudana pa zina laku Yehova ndipu iyu wakuvikiliyeningi. (Nthanthi 18:10) Kweni kuti Chiuta wakuvikiliyeni, mutenere kuleke limu kuchita chinthu chechosi chakukwaskana ndi kugomezga mizimu ndipuso viŵanda. Ivi ndivu ateŵeti aku Chiuta anguchita ku Efeso m’nyengu yakali. Yiwu anguwunjika mabuku ngawu ngosi nga masenga ndi kungawotcha. (Machitidu 19:19, 20) Mazuŵa nganu ateŵeti aku Chiuta nawu atenere kuchita viyo. Tayani vinthu vosi vakukwaskana ndi kugomezga mizimu nge, vinthumwa, njirizi ndi mabuku nga masenga.

Musopengi Mwauneneska

Asani mukhumba kukondweska Chiuta, mukhumbika kuleka kuchita vinthu viheni ndi kusopa kwa boza pe cha. Kweni mutenere kujipereka pa kusopa kwauneneska. Bayibolo likamba kuti mutenere kuchita ivi:

Muwunganengi ndi Akaboni aku Yehova

Satana ndi viŵanda vaki ŵe ndi ŵanthu wo asambiza ndi kuchita vinthu viheni pacharu chapasi. Kweni Yehova nayuso we ndi ŵanthu ŵaki. Ŵanthu yaŵa mbakaboni aku Yehova. (Yesaya 43:10) Kuzunguliya charu chosi chapasi pe Akaboni akujumpha 7 miliyoni. Wosi atesesa kuchita vinthu vamampha ndi kusambiza ŵanthu uneneska. Mu vyaru vinandi, mukhoza kuchikumana nawu ku Nyumba ya Ufumu, ndipu akukulondiyani umampha ukongwa.

Nchitu yawu nkhovya ŵanthu kuti ateŵetiyengi Chiuta. Yiwu akhoza kusambira namwi Bayibolo pa nyumba pinu, ndipu angakuwovyani kuti muziŵi mo mungasope Yehova mwakwenere. Kweni masambiru ngosi yanga ngawezi. Akaboni akondwa ukongwa kusambiza uneneska chifukwa chakuti atanja ŵanthu ndipuso Yehova Chiuta.