Gulu lo Lichita Khumbu Laku Yehova

PACHARU chapasi pe magulu nganandi nga visopa, ndali, malonda ndipuso ngo ngatovya ŵanthu. Magulu yanga ngapambana vo ngachita, vilatu, fundu kweniso maŵanaŵanu. Kweni pe gulu limoza lo lipambana ukongwa ndi nganyaki ngosi. Mazu ngaku Chiuta ngalongo kuti gulu lenili Mbakaboni aku Yehova.

² Ntchakukondwesa kuti mukusere mugulu laku Yehova. Sonu muchita khumbu laki chifukwa chakuti mutiliziŵa. (Sali. 143:10; Aro. 12:2) Muteŵete mwaphamphu limoza ndi abali pacharu chosi wo atanjana. (2 Akori. 6:4; 1 Petu. 2:17; 5:9) Ivi vitikuchitiskani kuti mulonde vitumbiku vinandi ndipuso kuti mukondwengi nge mo Mazu ngaku Chiuta ngakambiya. (Nthanthi 10:22; Mariko 10:30) Chifukwa chakuti sonu muchita khumbu laku Yehova mwakugomezgeka, ndimwi akunozgeka kuzilonde umoyu wamampha kweniso wambula kumala kunthazi.—1 Timo. 6:18, 19; 1 Yoha. 2:17.

³ Mulengi widu Mura we ndi gulu lapade la pacharu chosi lo lilondo ulongozgi waki. Ivi ve viyo chifukwa chakuti Yehova, yo ndi Mulongozgi wa vinthu vosi ndiyu walamuliya gulu lenili. Titimugomezga ndi mtima wosi. Yehova Ngwakweruzga, Ngwakupereka Marangu ndipuso ndi Fumu yidu. (Yesa. 33:22) Chifukwa chakuti iyu wachita vinthu mwandondomeku, wanozga nthowa yakuti ‘tigwiri ntchitu limoza ndi iyu,’ kuti chilatu chaki chifiskiki.—2 Akori. 6:1, 2.

⁴ Po charu ichi che pafupi kumala, tiluta panthazi mwakulongozgeka ndi Yesu Khristu yo ndi Fumu yakusankhika. (Yesa. 55:4; Chivu. 6:2; 11:15) Yesu wangukamba kuti Akhristu azamugwira ntchitu zakuluska zo iyu wangufiska pa uteŵeti waki po wenga pacharu chapasi. (Yoha. 14:12) Vo wangukamba venga vauneneska chifukwa chakuti Akhristu atingi azipharazgengi kwa nyengu yitali ndipuso atingi aŵengi anandi. Venivi vatingi vichitiskengi kuti apharazgi chigaŵa chikulu. Yiwu atingi apharazgengi uthenga wamampha wa Ufumu mpaka kuvigoti va charu chapasi.—Mate. 24:14; 28:19, 20; Machi. 1:8.

⁵ Venivi ndivu vichitika nadi. Kweni nge mo Yesu wangukambiya, ntchitu yakupharazga uthenga wamampha yazamumala pa nyengu yo Yehova wakusankha. Mauchimi ngo nge m’Mazu ngaki ngalongo kuti zuŵa likulu ndipuso lakofya laku Yehova le pafupi.—Yowe. 2:31; Zefa. 1:14-18; 2:2, 3; 1 Petu. 4:7.

⁶ Pakuti tivwisa umampha khumbu laku Yehova mu mazuŵa nganu ngakumaliya, titenere kusazgiyaku phamphu lidu pakuchita vo iyu wakhumba. Kuti tichiti venivi, tikhumbika kuziŵa umampha mo gulu laki litende ndipuso kuchita vinthu mwakukoliyana nalu. Vo gulu lenili lichita, vituliya mu fundu, marangu ndipuso visambizu vo visanirika m’Mazu ngaku Chiuta.—Sali. 19:7-9.

⁷ Asani ŵanthu aku Yehova agwiriskiya ntchitu ulongozgi wa m’Bayibolu, atanjana ndipu agwira ntchitu mwakukoliyana kweniso mwachimangu. (Sali. 133:1; Yesa. 60:17; Aro. 14:19) Ntchinthu wuli cho chichitiska kuti tikoliyanengi ukongwa? Chanju ndichu chichitiska kuti tikoliyanengi ndipu tichita kuchivwala. (Yoha. 13:34, 35; Ako. 3:14) Asani tichita viyo, titende limoza ndi chigaŵa chakuchanya cha gulu laku Yehova.

CHIGAŴA CHAKUCHANYA CHA GULU LAKU YEHOVA

⁸ Mchimi Yesaya, Ezekiyeli ndi Daniyeli, anguwona chiwona cha chigaŵa chakuchanya cha gulu laku Yehova. (Yesa., chap. 6; Ezeki., chap 1; Dani. 7:9, 10) Wakutumika Yohane wanguwona so chiwona cha chigaŵa chenichi ndipu watitikonkhoske m’buku la Chivumbuzi, vo wanguwona. Iyu wanguwona Yehova yo wanguja pampandu waufumu waunkhankhu, ndipu wenga limoza ndi angelu wo adaniriza kuti: “Mtuŵa, mtuŵa, mtuŵa ndi Yehova Chiuta, Wanthazizosi, yo wengaku, yo waliku ndipuso yo watuza.” (Chivu. 4:8) Yohane wanguwona so “mwanawambereri wama pakati pa mpandu waufumu.” Mwanawambereri mwenuyu ndi Yesu Khristu.—Chivu. 5:6, 13, 14; Yoha. 1:29.

⁹ Mu chiwona ichi Yohane wanguwona kuti Yehova waja pampandu waufumu, ndipu ivi vilongo kuti Yehova ndiyu Mulongozgi wa gulu lenili. Pakukamba vaku iyu ndipuso udindu wapachanya wo wenawu, lemba la 1 Mbiri 29:11, 12 likamba kuti: “Yimwi Yehova, ukulu, nthazi, kutowa, unkhankhu ndipuso ulemu vinu, pakuti chechosi kuchanya kweniso pacharu chapasi ntchinu. Ufumu ngwinu yimwi Yehova. Yimwi Ndimwi mutijikweza mwija nge mulongozgi wa chechosi. Chuma kweniso unkhankhu vituliya kwaku yimwi, ndipu yimwi mulamuliya chechosi. Mu janja linu mwe nthazi, ndipu janja linu lingakuzga kweniso lingapaska nthazi weyosi.”

¹⁰ Yesu Khristu yo wagwira ntchitu limoza ndi Yehova, we ndi udindu ukulu kuchanya ndipuso wakupaskika mazaza. “Chiuta wakuthereske . . . vinthu vosi kusi kwa maphazi ngaki ndipuso wakumuŵika kuja mutu wa vinthu vosi vakukwaskana ndi mpingu.” (Aefe. 1:22) Pakukamba vaku Yesu, wakutumika Paulo wanguti: “Chiuta wakumukweza ndi kumuŵika pamalu ngapachanya ukongwa ndipu mwachanju wakumupaska zina lo liluska mazina nganyaki ngosi, kuti mu zina laku Yesu, gongonu lelosi lijikami, kwali ndaku wo ŵe kuchanya, wo ŵe pacharu chapasi ndipuso wo ŵe kusi kwa charu, ndipuso kuti lilimi lelosi lizomerezi pakweru kuti Yesu Khristu ndiyu Ambuya, vo vichitiskengi kuti Chiuta, Ada wakankhuskiki.” (Afi. 2:9-11) Mwaviyo, te ndi chigomezgu mwaku Yesu Khristu yo ndi mulongozgi murunji.

¹¹ Muchiwona chaki, mchimi Daniyeli wanguwona Wamazuŵa Nganandi we pampandu Waki waufumu, ndipu angelu “masawuzandi nganandi amuteŵetiyanga ndipu ateŵeti mamiliyoni nganandi anguma pa masu paki.” (Dani. 7:10) Bayibolu likamba kuti gulu la angelu ŵenaŵa, ndi “mizimu yo yichita uteŵeti wakupaturika, yo yitumika kuchiteŵete wo azamuhara utaski.” (Ahe. 1:14) Angelu wosi akupaskika maudindu ngakupambanapambana.—Ako. 1:16.

¹² Asani tiŵanaŵaniya mo vinthu viliri m’chigaŵa chakuchanya cha gulu laku Yehova, tingavwisa chifukwa cho Yesaya wanguchitiya mantha wati wawona chiwona. Mu chiwona ichi, iyu ‘wanguwona Yehova waja pampandu waufumu wapachanya kweniso wakukwezeka,’ ndipuso “Aserafi anguma pachanya paku iyu.” Yesaya wanguti: “Soka ini! Ndifwengi, pakuti nde munthu wa milomu yakufipiskika, ndipuso ndija pakati pa ŵanthu a milomu yakufipiskika; chifukwa masu ngangu ngawona Fumu, Yehova wa mizinda!” Mphakwenere kuti Yesaya wachiti mantha ukongwa chifukwa chakuwona mo gulu laku Yehova litende. Iyu wangukwaskika ndi vo wanguwona ndipu wati wavwa mdanu wakutuwa kuchanya wakukwaskana ndi ntchitu yapade yakupharazga uthenga wacheruzgu chaku Yehova, Yesaya wangumuka kuti: “Ndini panu! Nditumeni!”—Yesa. 6:1-5, 8.

¹³ Kuŵanaŵaniya ndipuso kuziŵa mo gulu laku Yehova litende, kuchitiska ŵanthu aku Chiuta kukwaskika nge mo Yesaya wanguchitiya. Asani titesesa kwende limoza ndi gulu laku Yehova po liluta panthazi, tilongo kuti titiligomezga.

GULU LAKU YEHOVA LILUTA PANTHAZI

¹⁴ Muchaputala 1 cha uchimi waku Ezekiyeli, Yehova wawoneka nge wakwera galeta likulu lakuchanya. Galeta lakutowa ukongwa lenili, limiya chigaŵa chambula kuwoneka chakuchanya cha gulu laku Yehova. Iyu watililongozga umampha kweniso watiligwiriskiya ntchitu kuti wafiski chilatu chaki.—Sali. 103:20.

¹⁵ Mkati mwa chingelengeli chechosi cha galeta ili, mwe so chingelengeli chinyaki cho chikupinjika, ndipu vosi viyanana kukuwa kwaki. Venivi vichitiska kuti vingelengeli venivi ‘vilutengi kuvigaŵa vosi vinayi.’ (Ezeki. 1:17) Vingelengeli venivi, visintha mwaliŵiliŵi ko viluta. Chinanga kuti ve viyo, galeta lenili litenda lija cha. Yehova watilirekele cha gulu laki kuti lilutengi kwekosi ko lakhumba. Lemba la Ezekiyeli 1:20, likamba kuti: “Yivu valutanga ko mzimu wakhumba kuti viluti.” Yehova ndiyu wachitiska kuti gulu laki lilutengi ko mzimu waki ukhumba kuti liluti. Mwaviyo, tikhumbika kujifumba kuti, ‘Kumbi nditende limoza ndi galeta lenili?’

¹⁶ Kuluta ku maunganu ndipuso kupharazga ndiku pe cha ko kungachitiska kuti tiyendiyengi limoza ndi gulu laku Yehova. Chinthu chakukhumbika ukongwa nkhuluta panthazi ndipuso kuja pa ubwezi wakukho ndi Chiuta. Titenere kwesesa ‘kuti tisimikizengi kuti vinthu vakukhumbika ukongwa ndi nivi’ kweniso tiziŵengi fundu zifya zo gulu lisambiza. (Afi. 1:10; 4:8, 9; Yoha. 17:3) Tikhumbika so kukumbuka kuti gulu laku Yehova lilongozgeka umampha ndipuso ndakukoliyana. Titenere kuziŵa chifukwa cho tikhumbikiya kugwiriskiya ntchitu umampha vinthu vo Yehova watitipaska kuti tifiski ntchitu yaki. Po titende limoza ndi galeta laki lakuchanya, umoyu widu ukoliyanengi ndi uthenga wo tipharazga.

¹⁷ Tilutirizga kuchita khumbu laku Yehova chifukwa gulu laki lititiwovya. Tikumbukengi kuti Yehova ndiyu watendesa galeta lakuchanya. Mwaviyo, asani titende limoza ndi galeta laku Yehova yo ndi Jarawi lidu, tilongo kuti titimutumbika ndipuso titimugomezga. (Sali. 18:31) Bayibolu lilayizga kuti: “Yehova waperekengi nthazi ku ŵanthu ŵaki. Yehova watumbikengi ŵanthu ŵaki ndi chimangu.” (Sali. 29:11) Pakuti te chigaŵa cha gulu laku Yehova, iyu watitipaska nthazi ndi chimangu cho wapereka ku gulu laki. Tikayika cha kuti walutirizgengi kutitumbika po tichita khumbu laki sonu kweniso muyaya.