Lutirizgani Kovya Mpingu Kuti Uje Wachimangu Ndipuso Wakutowa

CHAKA chechosi, ŵanthu masawuzandi nganandi atuza munyumba yaku Yehova kuti azimusopengi mwauneneska, ndipu venivi vifiska uchimi wa m’Bayibolu. (Mika 4:1, 2) Tikondwa ukongwa kulonde ŵanthu ŵenaŵa mu “mpingu waku Chiuta”! (Machi. 20:28) Yiwu awonga ukongwa kuti ateŵete Yehova limoza nasi ndipuso akondwa chifukwa ateŵete ndi ŵanthu wo mbakutowa kweniso achimangu. Mzimu wakupaturika waku Chiuta ndipuso ulongozgi wo usanirika m’Mazu ngaki, vititiwovya kuti tilutirizgi kovya mpingu kuti uje wakutowa kweniso wachimangu.—Sali. 119:105; Zeka. 4:6.

² Kugwiriskiya ntchitu fundu za m’Bayibolu, kutitiwovya kuvwala “umunthu wufya.” (Ako. 3:10) Mwaviyo, titesesa kumalisa nkhani zimanazimana ndipuso kupambana maŵanaŵanu ko kungaŵapu ndi Akhristu anyidu. Kuwona vinthu nge mo Yehova wativiwone, kutitiwovya kumalana ndi vinthu va mucharu vo vigaŵanisa ŵanthu ndipu tichita vinthu mwakukoliyana ndi abali ŵidu pacharu chosi.—Machi. 10:34, 35.

³ Chinanga kuti vingaŵa viyo, nyengu zinyaki mu mpingu mungaŵa masuzgu ngo ngangachitiska kuti Akhristu aleki kuja mwachimangu ndipuso kuchita vinthu mwakukoliyana. Ntchifukwa wuli venivi vichitika? Kanandi chituŵa chifukwa chakuti titondeka kugwiriskiya ntchitu ulongozgi wa m’Bayibolu. Ndipu tikhumbika kwesesa kulimbana ndi mijalidu yiheni yo te nayu chifukwa chakuleka kufikapu. Palivi munthu wambula ubudi. (1 Yoha. 1:10) Mwakuyeruzgiyapu, Mkhristu wangachita ubudi, vo vingachitiska kuti mpingu uje wambula kutowa. Tingaguŵiska Mkhristu munyidu chifukwa chakukamba ndi kuchita vinthu mwambula kuŵanaŵana umampha pamwenga tingaguŵa chifukwa cha vo Mkhristu munyidu wakamba pamwenga kuchita. (Aro. 3:23) Asani venivi vatichitikiya, kumbi tingachita wuli kuti tinozgi vinthu?

⁴ Yehova wakuviŵanaŵaniya umampha vosi venivi. Mu Mazu ngaki mwe ulongozgi wa vo tingachita asani vinthu nge venivi vatichitikiya. Ŵara mu mpingu wo mbaliska achanju angatiwovya. Kugwiriskiya ntchitu ulongozgi wa m’Malemba wo atipaska, kungatiwovya kwamba so kwanjana ndi anyidu ndipuso kulutirizga kuja paubwezi wamampha ndi Yehova. Asani tapaskika ulongozgi pamwenga tachenyeka chifukwa chakuti tabuda, titenere kuziŵa kuti Awusefwi akuchanya atitiyanja.—Nthanthi 3:11, 12; Ahe. 12:6.

KUMALISA NKHANI ZIMANAZIMANA

⁵ Nyengu zinyaki Akhristu mu mpingu angapambana maŵanaŵanu pa nkhani zimanazimana. Yiwu atenere kumalisa nkhani zenizi mwaliŵi ndipuso mwachanju. (Aefe. 4:26; Afi. 2:2-4; Ako. 3:12-14) Asani mwapindana ndi Mkhristu munyinu, mwambula kukayika mungamalisa suzgu yo mwakugwiriskiya ntchitu ulongozgi wa wakutumika Peturo wakuti: “Muyanjanengi ukongwa, chifukwa chanju chiwundiya maubudi nganandi.” (1 Petu. 4:8) Bayibolu likamba kuti: “Tosi tiguŵa nyengu zinandi.” (Yako. 3:2) Asani tigwiriskiya ntchitu fundu ya m’Bayibolu yakuti tichitiyengi anyidu vinthu vo nasi tikhumba kuti atichitiyengi, tigowokengi ndi kuluwa vinthu vimanavimana vo atinangiya.—Mate. 6:14, 15; 7:12.

⁶ Asani mwaziŵa kuti Mkhristu munyinu waguŵa chifukwa cha vo mwakamba pamwenga vo mwachita, mukhumbika kwamba ndimwi kuchitapu kanthu mwaliŵi kuti muje so nayu pa chimangu. Ziŵani kuti venivi vikwaska so ubwezi winu ndi Yehova. Yesu wangupereka ulongozgi kwa akusambira ŵaki wakuti: “Sonu asani utuza ndi mphasu yaku paguŵa la sembi, ndipu we penipo wakumbuka kuti mubali waku we nawi ndi chifukwa, leka mphasu yaku panthazi pa guŵa la sembi, ndipu luta ku mubali waku. Chakwamba kayanjani ndi mubali waku ndipu pavuli paki ukawe so kuzipereka mphasu yaku.” (Mate. 5:23, 24) Vingachitika kuti mwapambana maŵanaŵanu ndi Mkhristu munyinu. Asani ndi viyo, yesesani kukambiskana mwakufwatuka. Kukambiskana umampha, kutovya kuti ŵanthu wosi mu mpingu aleki kupambana maŵanaŵanu kweniso amalisengi mphindanu zo zingaŵapu chifukwa chakuleka kufikapu.

KUPEREKA ULONGOZGI WA M’MALEMBA MWAKWENERE

⁷ Nyengu zinyaki ŵara angawona kuti Mkhristu munyaki wakhumbika kupaskika ulongozgi kuti wasinthi nkharu yaki. Kuchita venivi nkhwakusuzga nyengu zinyaki. Wakutumika Paulo wangulembe Akhristu a ku Galatiya kuti: “Abali, asani munthu walandiya kuheni kwambula kuziŵa, yimwi Akhristu akukhwima, yesani kumunyolo munthu waviyo mwakuzika.”—Aga. 6:1.

⁸ Asani ŵara achita maulendu nga uliska, angawovya kuti mpingu uje wakuvikilirika ku vinthu vo vingawufipiska ndipuso kuti uleki kukumana ndi masuzgu ngakulu. Yiwu atesesa kuti uteŵeti wo achita mu mpingu ukoliyanengi ndi vo Yehova wangulayizga kuporote mwaku Yesaya kuti: “Weyosi wazamuja nge malu ngakubisamiyapu mphepu, malu ngakuthaŵiyaku pa nyengu ya chimphunga, nge timisinji tamaji mucharu chambula maji, nge mduzi wa jalawi likulu mucharu chakumira.”—Yesa. 32:2.

KUDINDA CHIDINDU WO ATENDA MWAMBULA KWENERE

⁹ Wakutumika Paulo wangutcheŵeska vakukwaskana ndi ŵanthu anyaki wo atingi ayambiskengi mijalidu yiheni mu mpingu. Iyu wanguti: “Titikupaskani ulongozgi . . . kuti mukhwechengi mubali weyosi yo watenda mwambula kwenere ndipuso mwambula kukoliyana ndi midawuku yo mukulonde kwaku isi.” Iyu wangukonkhoska fundu yeniyi mwakuvwika umampha kuti: “Kweni asani munyaki waleka kuvwiya mazu ngidu ngo nge mukalata iyi, munthu waviyo mumudindi chidindu ndipu muleki kuchitiya nayu vinthu limoza, kuti wachiti soni. Kweni mungamuwonanga nge murwani winu cha, mumalu mwaki mumulunguchizgengi nge mubali winu.”—2 Ate. 3:6, 14, 15.

¹⁰ Nyengu zinyaki, munthu wangachita ubudi ukulu cha wo ungachitiska kuti wasezgeki mu mpingu, kweni wangaja ndi mijalidu yo yingalongo kuti watumbika cha fundu zaku Chiuta zo Akhristu atenere kulondo. Mwakuyeruzgiyapu, anyaki angaja alesi ukongwa, angasuska mo vinthu vitende mugulu, angaŵa akazuzi pamwenga angaja ndi jalidu ‘lakuselere pa nkhani zo zileka kuŵakwaska.’ (2 Ate. 3:11) Panyaki waryiya Akhristu anyaki masuku pa mutu pamwenga wachita vakusangaluska vo viwoneke limu kuti viheni. Mijalidu yiheni yeniyi, yinganyozesa mpingu ndipuso kungaŵa kwambula kusuzga kuti Akhristu anyaki ayambi kutoliyaku.

¹¹ Ŵara akhumbika kumuwovya dankha munthu waviyo mwakumupaska ulongozgi wa m’Bayibolu. Asani walutirizga kuleka kuvwiya fundu za m’Bayibolu chinanga kuti wapaskika ulongozgi mwakuwerezawereza, ŵara angasankha kuti pakambiki nkhani yakutcheŵeska mpingu. Nkhani iyi yingakambika asani ŵara asimikiziya kuti mijalidu ya munthu yo njiheni nadi ndipu yitimbanyizga Akhristu mu mpingu. Wakukamba nkhani watenere cha kuzumbuwa zina la munthu yo, kweni wakhumbika ŵaka kupereka ulongozgi wakukwaskana ndi mijalidu yiheni ya munthu yo. Venivi vingawovya kuti ŵanthu wo aziŵa jalidu la munthu yo aleki kucheza nayu chinanga kuti alutirizgengi mbwenu kuwungana nayu, ndi ‘kumulunguchizga nge mubali.’

¹² Mwambula kukayika, asani Akhristu akugomezgeka aleka kucheza nayu, vimuwovyengi kuti wachiti soni ndi kusintha nkharu yaki. Asani munthu yo walongo kuti waleka jalidu laki, wakhumbika cha kumuwona nge wakudindika chidindu.

KUMALISA NKHANI ZINYAKI ZIKULUZIKULU

¹³ Chinanga kuti tiziŵanizga vo munthu watinangiya ndi kumugowoke, kweni ving’anamuwa kuti tizomereza vo wachita cha pamwenga tileka kutoliyaku kanthu. Ndi maubudi ngosi cha ngo ngachitika chifukwa chakuleka kufikapu ndipuso ngo ngakhumbika kungaziŵanizga. (Levi. 19:17; Sali. 141:5) Dangu laku Mozesi lilongo kuti maubudi nganyaki ngakulu kuluska nganyaki, ndimu so viliri mu mpingu wachikhristu.—1 Yoha. 5:16, 17.

¹⁴ Yesu wangukonkhoska nthowa yakumalisiya nkhani zikuluzikulu zo zichitika pakati pa Akhristu. Iyu wangukamba kuti: “Kweniso asani mubali waku wakunangiya, [1] luta kuti ukamukambiyi cho iyu wanangisa mwe ŵaŵi, yiwi ndi iyu. Ndipu asani iyu wakuvwiya ndikuti wamuweza mubali waku. Kweni asani watikuvwiya cha, [2] to yumoza pamwenga ŵaŵi kuti nkhani yosi yisimikiziki pa ukaboni wa ŵanthu ŵaŵi pamwenga atatu. Asani watiŵavwiya cha, [3] kakambi ku mpingu. Asani mpingu nawu watiwuvwiya cha, umuwonengi nge munthu wamitundu ndipuso wakusonkhesa msonkhu.”—Mate. 18:15-17.

¹⁵ Yesu wati wamaliza kupereka ulongozgi wenuwu, wangukamba ntharika yo ye pa Mateyu 18:23-35. Viwoneka kuti umoza mwa maubudi ngo ngakambika pa Mateyu 18:15-17 ukwaskana ndi nkhani za ndalama pamwenga malu ndi katundu nge kutondeka kuweza ngongoli pamwenga kuchita chinyengu. Kweniso asani munthu wapusikiya munyaki ndipuso wananga mbiri ya munyaki.

¹⁶ Asani mwe ndi ukaboni kuti Mkhristu munyinu wakuchitiyani ubudi nge wenuwu, mungathaŵiriyanga cha kuchikambiya ŵara kuti akuwovyeni. Mwakukoliyana ndi ulongozgi waku Yesu, chakwamba kambiskanani dankha ndi munthu yo wakunangiyani. Yesani kumalisa nkhani yo mwe mwaŵaŵi kwambula kudaniyapu munthu munyaki. Kumbukani kuti Yesu wakukambapu cha kuti ‘uluti kamoza pe kuti ukamukambiyi cho iyu wanangisa.’ Mwaviyo, asani wanguzomera cha kuti wakunanga pamwenga kukupemphani kuti mumugowoke, kungaŵa umampha kuzikambiskana nayu so. Mwambula kukayika, asani mungamalisa nkhani yo mu nthowa yeniyi, munthu yo wangukunangiyani wakondwengi kuziŵa kuti mungukambiya munthu munyaki cha vo wangunanga pamwenga kunanga mbiri yaki mu mpingu. Kuchita viyo kuwovyengi kuti ‘mumuwezi mubali winu.’

¹⁷ Palivi chifukwa chakuti nkhani yo yilutiriyi asani munthu wazomereza kunanga kwaki, wapempha kuti mumugowoke ndipuso wachitapu kanthu kuti wanozgi vo wananga. Chinanga kuti nkhani yaviyo yingaŵa yikulu kweni mungayimalisa mwe mwaŵaŵi.

¹⁸ Asani mwatondeka kuweza Mkhristu munyinu mwakumukonkhoske vo wananga “mwe ŵaŵi,” mungachita vo Yesu wangukamba kuti, toni “yumoza pamwenga ŵaŵi,” ndipu kambiskanani so nayu. Ŵanthu wo mungato kuti akuwovyeni, akhumbika kuja ndi chilatu chakuti amuwezi mubali winu. Vingaŵa umampha kuti muto ŵanthu wo ŵengapu pa nyengu yo vinthu vo vachitikanga, kweni asani palivi, mungapempha munthu yumoza pamwenga ŵaŵi kuti aje akaboni muchikambiskana. Yiwu akhumbika kuja ŵanthu wo atiziziŵa umampha nkhani za viyo ndipu angasuzgika cha kuziŵa yo wangunangisa. Asani wo asankhika kuja akaboni mbara mu mpingu, pa nyengu iyi yiwu amiya mpingu cha, chifukwa atumika ndi wupu wa ŵara cha.

¹⁹ Vingachitika kuti mwakambiskana mwaŵaŵi, pavuli paki mwadaniyapu kaboni yumoza pamwenga ŵaŵi kweni mwatondeka kumalisa nkhani yo. Asani muwona kuti nkhani yo yingamala ŵaka viyo cha, kambiyani ŵara mu mpingu. Mutenere kukumbuka kuti ŵara akhumba kuti mu mpingu mujengi chimangu ndipuso mwakutowa. Asani mwakambiya ŵara mutenere kuŵaleke kuti ayiphwere ndipu gomezgani kuti Yehova ndiyu wanozgengi vosi. Mungazomerezanga cha kuti vakuchita va munthu munyaki vikuguŵiskeni pamwenga vikuchitiskeni kuti muleki kukondwa pakuteŵete Yehova.—Sali. 119:165.

²⁰ Ŵara afufuzengi nkhani yosi. Asani pe ukaboni wakuti munthu wakukunangiyani ukongwa ndipu walapa cha kweniso wakhumba cha kunozga vinthu vo wakunangisa, vingaŵa umampha kuti komiti yacheruzgu yimusezgi mu mpingu. Kuchita viyo, kungavikiliya mbereri kweniso mpingu kuti uleki kufipiskika.—Mate. 18:17.

KUPHWERE NKHANI ZA MAUBUDI NGAKULUNGAKULU

²¹ Asani munthu wachita ubudi ukulu nge ureŵi, chigololu, kugonana kwa anthulumi pamwenga anthukazi pe, kunyoza gulu laku Yehova, kugaruka, kusopa angoza ndipuso maubudi nganyaki ngakulu, wakhumbika kuwovyeka kuluska ŵaka kugowokereka ndi munthu yo wamunangiya. (1 Akori. 6:9, 10; Aga. 5:19-21) Chifukwa chakuti maubudi ngenanga ngangananga mijalidu ya ŵanthu mu mpingu ndipuso ubwezi wawu ndi Yehova, ŵara akhumbika kuŵaziŵiska kuti aphwere nkhani zenizi. (1 Akori. 5:6; Yako. 5:14, 15) Akhristu anyaki angaluta kwa ŵara kuti akasumuwi ubudi wawu pamwenga wo Mkhristu munyawu wachita asani awuziŵa. (Levi. 5:1; Yako. 5:16) Mwambula kuphwere vo ŵara ŵavwa vakukwaskana ndi ubudi wo Mkhristu wakubatizika wachita, ŵara ŵaŵi akhumbika kufufuza dankha nkhani yo. Asani aziŵa kuti vo anguvwa vauneneska ndipu pe ukaboni wakuti ubudi ukulu ukuchitika nadi, wupu wa ŵara ujalikiskengi komiti yacheruzgu ya ŵara atatu pamwenga kujumpha kuti yiphwere nkhani yo.

²² Ŵara atesesa kuvikiliya abali ndi azichi ku chinthu chechosi cho chingananga ubwezi wawu ndi Yehova. Yiwu atesesa so kugwiriskiya ntchitu Mazu ngaku Chiuta mwalusu kuti achenyi weyosi yo wabuda ndi kumuwovya kuti waje so pa ubwezi wamampha ndi Chiuta. (Yuda 21-23) Ivi vikoliyana ndi ulongozgi wo wakutumika Paulo wangupaska Timote wakuti: “Nditikulamula pa masu paku Chiuta ndipuso pa masu paku Khristu Yesu yo wazamuyeruzga amoyu ndi akufwa, . . . Chenya, tcheŵeska ndipuso chiska. Chita vosi venivi mwakuzikira ukongwa ndipuso mwakusambiza umampha.” (2 Timo. 4:1, 2) Kuchita venivi kukhumba nyengu yitali kweni yeniyi ndi ntchitu yo ŵara agwira mwaphamphu. Mpingu uwonga phamphu lawu ndipu uwona kuti atenere kupaskika “ulemu ukulu.”—1 Timo. 5:17.

²³ Pa nkhani yeyosi yo Mkhristu wasanirika kuti wabuda, chinthu chakukhumbika ukongwa cho ŵara atesesa kuchita, nkhumuwovya kuti waje pa ubwezi wamampha ndi Chiuta. Asani walapa ndi mtima wosi ndipu wakhumbika kuchenyeka, kaya amuchenyengi pakuyija pamwenga pa masu pa ŵanthu wo anguchitiya ukaboni pa nyengu yo nkhani yaki yayeruzgikiyanga, ulongozgi wo amupasengi ukhumbika kumuwovya ndipuso kovya akaboni wo kuti awopengi Yehova. (2 Samu. 12:13; 1 Timo. 5:20) Pa nkhani zosi zo Mkhristu wachenyeka, wakanizgika kuchita vinthu vinyaki mu mpingu. Venivi vitovya kuti ‘wanyoloski nthowa’ ya malundi ngaki. (Ahe. 12:13) Asani pajumpha nyengu ndipu wawoneka kuti wasintha nadi, wazomerezeka kwamba so kuchita vinthu vo wangukanizika.

CHIPHARAZGU CHA MUNTHU YO WACHENYEKA

²⁴ Asani komiti yacheruzgu yasimikizgiya kuti munthu yo ngwakulapa kweni kwambula kukayika nkhani yo yiziŵikengi mu mpingu ndipuso muchigaŵa, panyaki yawona so kuti mpingu ukhumbika kuphwere ndi munthu yo, patenere kuperekeka chipharazgu chifupi pa nyengu ya Unganu wa Umoyu Wachikhristu Ndipuso Uteŵeti. Chipharazgu cho chitenere kuja chakuti: “[Ngana] wachenyeka.”

ASANI MUNTHU WAKHUMBIKA KUSEZGEKA

²⁵ Nyengu zinyaki munthu yo wabuda wangakana kusintha chinanga kuti ŵara angayesesa kuti amuwovyi. Ndipu pa nyengu yo komiti yacheruzgu yikambiskana nayu, wangatondeka kulongo “ntchitu zakukoliyana ndi kulapa.” (Machi. 26:20) Ntchinthu wuli cho ŵara angachita? Asani ndi viyo, vingaŵa umampha kumusezga mu mpingu munthu wambula kulapa, kung’anamuwa kumukaniza kuchitiyanga vinthu limoza ndi ŵanthu akutowa aku Yehova. Kuchita viyo kutovya kuti Akhristu mu mpingu aleki kutoliyaku mijalidu yaki yiheni ndipu kutovya so kuti mpingu uvikiliriki, uleki kufipiskika kweniso ulutirizgi kuja ndi mbiri yamampha. (Doto. 21:20, 21; 22:23, 24) Wakutumika Paulo wati wavwa vakukwaskana ndi jalidu lakuchitiska soni lo munthu munyaki wenga nalu mu mpingu wa ku Korinto, wangukambiya ŵara kuti: “Muperekeni kwaku Satana . . . , ndi chilatu chakuti mzimu [wa mpingu] uzitaskiki.” (1 Akori. 5:5, 11-13) Paulo wanguzumbuwa so ŵanthu anyaki akugaruka wo angusezgeka mu mpingu mu nyengu ya akutumika.—1 Timo. 1:20.

²⁶ Asani komiti yacheruzgu yasankha kuti munthu yo wasezgeki, yitenere kumuziŵiska ndipuso kumukonkhoske mwakuvwika umampha vifukwa va m’Malemba vo amusezgiyengi. Pavuli pakuti komiti yacheruzgu yamuziŵiska vo yasankha, yikhumbika kumukambiya kuti asani wawona kuti nkhani yaki yayeruzgika umampha cha ndipu wakhumba kuti yiyeruzgiki so, walembi kalata ndipu wakonkhoski mwakuvwika umampha vifukwa vo wakhumbiya viyo. Watenere kuchita venivi pechendajumphi mazuŵa 7, kutuliya pa nyengu yo komiti yamuziŵiskiya. Asani wupu wa ŵara walonde kalata yo, ukambiskanengi ndi wakuwonere dera yo wasankhengi ŵara akwenere wo ajengi mu komiti yacheruzgu kuti aphwere so nkhani yeniyi. Komiti yasonu yeniyi, yiyesesengi kuti yiphwere nkhani yo pechandajumphi sabata yimoza kutuliya po alondere kalata. Asani munthu wapempha kuti nkhani yaki yiyeruzgiki so, pakhumbika dankha cha kupharazga kuti wasezgeka. Pa nyengu iyi, munthu yo wakhumbika cha kumuka pamwenga kupemphera pa maunganu ndipuso asani wenga ndi udindu wewosi wamikika dankha.

²⁷ Chifukwa cha lisungu, munthu yo atimuŵanaŵaniya kuti wachita ubudi, wapaskika mwaŵi wakupempha kuti nkhani yaki yiyeruzgiki so kuti wakonkhoski madandawulu ngaki. Mwaviyo, asani watondeke dala kuza pa zuŵa lo nkhani yaki yikambikiyengi so, ndipu watuza mbwenu cha pavuli pakuti ŵara ayesesa kumuziŵiska, atenere kupharazga kuti wasezgeka.

²⁸ Asani yo wachita ubudi wakhumba cha kuti nkhani yaki yikayeruzgiki so, komiti yacheruzgu yimukonkhoskiyengi kukhumbika kwa kulapa kweniso vo wangachita kuti kunthazi waziwezeke mugulu laku Yehova. Kuchita venivi kungamuwovya ndipuso vingalongo kuti atimuyanja. Yiwu akhumbika kulongo kuti agomezga kuti kunthazi wasinthengi nthowa zaki ndipu waweriyengi mugulu laku Yehova.—2 Akori. 2:6, 7.

CHIPHARAZGU CHA MUNTHU YO WASEZGEKA

²⁹ Asani munthu yo wachita ubudi wasezgeka mu mpingu, pakhumbika kupharazga mwakudumuwa kuti: “[Ngana] ndi Kaboni waku Yehova so cha.” Venivi viwovyengi kuti Akhristu akugomezgeka mu mpingu aleki kucheza nayu.—1 Akori. 5:11.

ASANI MUNTHU WALEKA KUJA KABONI

³⁰ Munthu yo waleka kuja Kaboni, ndi munthu yo wangubatizika kweni wakamba kuti wakhumba so cha kuziŵika kuti ndi Kaboni waku Yehova. Panyaki wangaŵa munthu yo vakuchita vaki vilongo kuti wakhumba cha kuja mu mpingu wachikhristu. Mwakuyeruzgiyapu asani wasere wupu wo vakuchita vaki visuskana ndi vo Bayibolu lisambiza ndipu we mugulu la vinthu vo vazamubwangandulika ndi Yehova.—Yesa. 2:4; Chivu. 19:17-21.

³¹ Pakukamba zaku wo angukana kuja Akhristu, wakutumika Yohane wangulemba kuti: “Yiwu akutuwaku kwaku isi chifukwa ŵenga mu gulu lidu cha, pakuti asani ŵenga mu gulu lidu atingi alutirizgengi kuja ndi isi.”—1 Yoha. 2:19.

³² Asani munthu waleka yija kuja Kaboni, Yehova watimuwona mwakupambana ndi Mkhristu wakulopwa yo wakuleka kupharazga. Munthu wangalopwa chifukwa chakuti wasambiranga cha Mazu ngaku Chiuta mwakujalikiskika. Panyaki wangukumana ndi masuzgu nganyaki pamwenga wangutombozgeka ndipu wakulopwa. Ŵara kweniso abali ndi azichi akhumbika kulutirizga kumuwovya Mkhristu yo wakulopwa.—Aro. 15:1; 1 Ate. 5:14; Ahe. 12:12.

³³ Asani munthu wasankha yija kuti wajengi so Kaboni cha, pakhumbika kupharazga mwakudumuwa mu mpingu kuti: “ [Ngana] ndi Kaboni waku Yehova so cha.” Munthu waviyo wakhumbika kumuwona nge wakusezgeka.

KUWEZEKE MUGULU LAKU YEHOVA

³⁴ Munthu yo wangusezgeka pamwenga yo wanguleka kuja kaboni, wangawezeke so mu mpingu asani walongo kwa nyengu yitali kuti wakulapa. Iyu walongo kuti wakhumbisiska kuja so pa ubwezi wamampha ndi Yehova. Ŵara akhumbika kuwonesesa kuti pajumpha nyengu yakukwana, yingaŵa myezi, chaka pamwenga kujumpha mwakukoliyana ndi mo vinthu viliri. Venivi vingawovya kuti munthu wakusezgeka walongo kuti wakulapa nadi. Asani walembe kalata wupu wa ŵara yakupempha kuti wawezeke mu mpingu, komiti yakuweze mu mpingu yikambiskanengi nayu. Komiti yeniyi, yiwonengi asani walongo nadi “ntchitu zakukoliyana ndi kulapa” ndipuso asani mphakwenere kumuweze mu mpingu nyengu yeniyo pamwenga cha.—Machi. 26:20.

³⁵ Asani munthu yo walemba kalata wangusezgeke ku mpingu unyaki, komiti yakuweze mu mpingu ya mpingu wo walimu, yitenere kuŵanaŵaniya vo wapempha ndipu yingakumana nayu. Asani komiti iyi yawona kuti munthu yo watenere kuwezeke mu mpingu, yikhumbika kulemba masachizgu ngawu ndi kutumiziya wupu wa ŵara wa mpingu wo unguphwere nkhani yo. Makomiti ngosi ngaŵi ngakambiskanengi fundu zosi zo ngasaniya ndipu ngatenere kusankha vinthu mwaurunji. Komiti ya ku mpingu wo munthu wangusezgeke ndiyu yisankha asani mphakwenere kuweze munthu yo mu mpingu pamwenga cha.

CHIPHARAZGU CHA MUNTHU YO WAWEZEKE MUGULU

³⁶ Asani komiti yakuweze mu mpingu yasimikizga kuti munthu yo wangusezgeka walapa nadi ndipu wakhumbika kuwezeke mu mpingu, chipharazgu chiperekekengi mu mpingu wo ungumusezga. Asani munthu yo we mu mpingu unyaki, mpingu wo nawu ukhumbika so kupharazga. Chipharazgu cho chitenere kuja chakuti: “[Ngana] sonu ndi Kaboni waku Yehova.”

ASANI ŴANA ANAMANA WO AKUBATIZIKA ACHITA UBUDI UKULU

³⁷ Ŵara akhumbika kuŵaziŵiska asani mwana munamana yo wakubatizika wachita ubudi ukulu. Asani ŵara akambiskana nkhani yakukwaskana ndi ubudi wo mwana yo wachita, kungaŵa umampha kuti apapi ŵaki wo mbakaboni aku Yehova aŵepu. Yiwu atenere kukoliyana ndi komiti yacheruzgu ndipu angayesanga cha kumuŵikiya kuvuli mwana wawu kuti waleki kulonde chilangu chifukwa cha vo wachita. Nge mo komiti yacheruzgu yichitiya ndi Akhristu ŵaraŵara wo achita ubudi, yikhumbika kwesesa kumuchenya ndi kumuwovya kuti waje pa ubwezi wamampha ndi Yehova. Kweni asani mwana yo wakhumba cha kulapa, wakhumbika kusezgeka.

ASANI MUPHARAZGI WAMBULA KUBATIZIKA WACHITA UBUDI UKULU

³⁸ Ntchinthu wuli cho ŵara atenere kuchita asani mupharazgi wambula kubatizika wachita ubudi ukulu? Chifukwa chakuti ngwambula kubatizika wangasezgeka cha. Vingaŵa viyo chifukwa chakuti panyaki watiziziŵa umampha cha fundu za m’Bayibolu ndipu asani wangapaskika ulongozgi mwachanju, ungamuwovya kuti ‘wanyoloski nthowa’ ya malundi ngaki.—Ahe. 12:13.

³⁹ Asani mupharazgi wambula kubatizika yo wachita ubudi walapa cha pavuli pakuti ŵara ŵaŵi akumana nayu ndipu ayesesa kumuwovya, mbumampha kupharazga mu mpingu. Pakhumbika kupharazga mwakudumuwa kuti: “[Ngana] ndi mupharazgi wambula kubatizika so cha.” Abali ndi azichi mu mpingu akhumbika kumuwona nge munthu wakubwalu. Chinanga kuti wasezgeka cha kweni Akhristu akhumbika kuphwere ukongwa pa nkhani yakucheza nayu. (1 Akori. 15:33) Iyu watenere so cha kupereka malipoti nga mu uteŵeti.

⁴⁰ Mukuluta kwa nyengu, mupharazgi wambula kubatizika yo angumulekeska kupharazga wangakhumba kuja so mupharazgi. Ŵara ŵaŵi angakumana nayu kuti awoni asani wasintha. Asani ngwakwenere kuja mupharazgi, angapharazga mwakudumuwa kuti: “[Ngana] waŵikika so kuja mupharazgi wambula kubatizika.”

YEHOVA WATUMBIKA ŴANTHU ACHIMANGU NDIPUSO AKUTOWA

⁴¹ Ŵanthu wosi wo awungana ndi mpingu waku Chiuta mazuŵa nganu, akondwa chifukwa cha vinthu vinandi vamampha vo Yehova wapereka ku ŵanthu ŵaki. Kukamba uneneska, te ndi chakurya chinandi ndipu tiziŵa fundu zinandi za uneneska zo zititisisipuwa. Yehova watitivikiliya mwakutipaska marangu kuporote mwaku Khristu yo watitilongozga. (Sali. 23; Yesa. 32:1, 2) Chinanga kuti te m’mazuŵa ngakumaliya ndipuso ngakusuzga, tichita mantha cha chifukwa te muparadayisu wauzimu.

⁴² Mwaviyo, asani tilutirizgengi kovya mpingu kuti uje wachimangu kweniso wakutowa, tiŵaliskengi ukweru wa uneneska wa Ufumu. (Mate. 5:16; Yako. 3:18) Chiuta watitumbikengi ndipu tikondwengi kuwona kuti ŵanthu anandi asambira vakukwaskana ndi Yehova ndi kumuteŵete limoza nasi mwakuchita khumbu laki.