Mungafipanga Mtima Cha

FUNDU YA M’BAYIBOLU: “Lekani kufipiya mtima umoyu winu.”—Mateyu 6:25.

Kumbi fundu iyi ying’anamuwanji? Yesu wangukamba mazu yanga pa Upharazgi wa Paphiri. Dikishonale yinyaki yikamba kuti mazu nga Chigiriki ngo akungafwatuliya kuti “kufipiya mtima,” ngangang’anamuwa “mo tosi tivwiya chifukwa cha ukavu, nja kweniso masuzgu nganyaki ngo tikumana nangu pa umoyu.” Kanandi tifipa mtima ndi vinthu va mnthazi. Tosi tifipa mtima ndi vinthu vakukhumbika pa umoyu kweniso tifipiya mtima ŵanthu wo titanja. (Ŵafilipi 2:20) Yesu wachikamba kuti “mungafipanga mtima cha,” watcheŵeskanga akusambira ŵaki kuti angafipiyanga ukongwa mtima vinthu vamawa cha chifukwa vingaŵachitisa kuti aleki kukondwa.—Mateyu 6:31, 34.

Kumbi fundu iyi njakovya mazuŵa nganu? Tingachita umampha ukongwa kulondo ulongozgi waku Yesu. Nchifukwa wuli tikamba viyo? Buku linyaki likamba kuti asani munthu wafipa mtima ukongwa, liŵavu lingatondeka kugwira ntchitu umampha ndipu “wangayamba kutama vilonda va m’moyu, matenda nga mtima ndipuso asima.”

Vo Yesu wangukamba vilongo kuti kufipa mtima kungatiwovya cha. Iyu wanguŵafumba kuti: “Kumbi ndiyani waku imwi yo wangasazgiyaku utali wa umoyu waki chinanga nkhamanavi mwakufipa mtima?” (Mateyu 6:27) Tingasazgiyaku cha utali wa umoyu widu chinanga nkhamanavi chifukwa chakufipa mtima. Kanandi vinthu vo tifipa navu mtima vichitika cha. Munthu munyaki wangukamba kuti: “Nkhutaya ŵaka nyengu kufipiya mtima vamunthazi, ndipu kanandi vinthu vituŵa umampha ukongwa kuluska mo taŵanaŵaniyanga.”

Nchinthu wuli cho chingatiwovya kuti tilekengi kufipa ukongwa mtima? Chakwamba, tigomezengi Chiuta. Asani Chiuta waliska tiyuni ndi kuvwalika maluŵa, wangatondeka cha kuŵapasa vakukhumbika ŵanthu wo atimuteŵete ndi mtima wosi. (Mateyu 6:25, 26, 28-30) Chachiŵi, tikhumbika cha kufipa mtima ndi vinthu vazuŵa linyaki. Yesu wangukamba kuti: “Lekani kufipiya mtima vamawa, chifukwa lamawa le ndi vakufipiska mtima vaki.” Kumbi namwi mugomeza kuti “zuŵa lelosi le ndi masuzu ngaki?”—Mateyu 6:34.

Kulondo ulongozi waku Yesu kungatiwovya kuti tileki kutama. Kweniso kungatiwovya kuja ndi chimangu cha m’mtima cho Bayibolu litichizumbuwa kuti “chimangu chaku Chiuta.”—Ŵafilipi 4:6, 7.