Mateyu 6:34—“Lekani Kufipiya Mtima va Mawa”

“Lekani kufipiya mtima va mawa, chifukwa lamawa le ndi vakufipiska mtima vaki. Zuŵa lelosi le ndi masuzgu ngaki.”—Mateyu 6:34, Bayibolu la Charu Chifya.

“Mungafipiyanga mtima ndi va mawa cha: chifukwa la mawa lijikweŵekiyenge lija. Ngwakukwaniya zuŵa lo uheni wake.”—Mateyu 6:34, New International Version.

Vo Lemba la Mateyu 6:34 Ling’anamuwa

Yesu wangukambiya akusambira ŵaki mazu yanga, ndipu wanguŵasimikiziya kuti akhumbikanga cha kufipa ukongwa mtima ndi masuzgu ngo atingi akumanengi nangu kunthazi. Mumalu mwaki akhumbikanga kuŵanaŵaniya va zuŵa lenilo pe.

Yesu wang’anamuwanga kuti tilekengi kuŵanaŵaniya va munthazi cha, pamwenga vo tazamuchita kunthazi. (Nthanthi 21:5) Mumalu mwaki watiwovyanga kuti titenere cha kufipa ukongwa mtima ndi vo vingachitika mawa. Kufipa ukongwa mtima kungatichitiska kuti tileki kukondwa kweniso kungatitondekeska kupanga vinthu vo takhumbanga kuchita. Tingamalisa cha masuzgu ngo tazamukumana nangu kunthazi chifukwa cha kufipa mtima. Kanandi vinthu vo tiŵanaŵana ndivu vichitika cha ndipuso vinangika nge mo taŵanaŵaniyanga cha.

Nkhani ya pa Mateyu 6:34

Mazu ngo Yesu wangukamba pa Upharazgi waki wa pa Phiri ngasanirika pa Mateyu chaputala 5 mpaka 7. Pa upharazgi wenuwu Yesu wangukonkhoska kuti kufipa ukongwa mtima kungachitiska kuti tiŵevi likondwa pamwenga tifwi liŵi. (Mateyu 6:27) Iyu wangukamba so kuti asani tichita khumbu laku Chiuta, tingafipanga mtima ndi va mawa cha. Asani Chiuta waphwere vakume ndi vinyama, wangaleka cha kuphwere wo atimuteŵete.—Mateyu 6:25, 26, 28-33.