Chinthu cho Titenere Kuŵika Pakwamba
1. Kumbi Yesu wangulongo wuli kuti uteŵeti wenga wakuzirwa kwaku iyu?
1 Uteŵeti ndiwu chenga chinthu chakwamba pa umoyu waku Yesu. Iyu wagwiranga nchitu iyi mwakujipereka, wayendanga mitunda yitaliyitali kuzunguliya mu Palesitina wachipharazga ku ŵanthu anandi wo wangufiska kuŵafikiya. Wajanga umoyu wambula kukhumba vinandi kuti wamaliyengi nyengu ndi kuŵika maŵanaŵanu ngaki ngosi pa uteŵeti. (Mate. 8:20) Po ŵanthu ayesanga kumukanizga kuti waleki kuluta ku malu nganyaki ndi chilatu chakuti waŵachizgiyengi akutama ŵawu, iyu wangukamba kuti: “Kutindenere kutaula makani ghakunozga gha ufumu waku Chiuta mu mizi yamwenga so, pakuti ndatumikiya chenichi.”—Luka 4:43
2. Kumbi nchifukwa wuli uteŵeti wenga wakuzirwa kwaku Yesu?
2 Kumbi nchifukwa wuli uteŵeti wenga wakuzirwa kwaku Yesu? Chinthu chikuru cho iyu waŵanaŵaniyanga ukongwa chenga kutoweseka kwa zina laku Yehova. (Mate. 6:9) Iyu wayanjanga Awiski akuchanya, mwaviyo wakhumbanga kufiska khumbu Lawu ndipuso kuvwiya dangu Lawu lelosi. (Yoha. 14:31) Kweniso waphweriyanga ukongwa ŵanthu ndipu wakhumbanga kuti waŵawovyengi.—Mate. 9:36, 37.
3. Kumbi tingalongo wuli kuti tiwona uteŵeti kuja chinthu chakuzirwa ukongwa?
3 Yezgani Yesu: Kulutirizga kuŵika uteŵeti panthazi nge mo Yesu wachitiyanga kuja kwakusuzga chifukwa chakuti charu chititiryiya nyengu ukongwa ndipuso chendi vinthu vinandi vakutimbanyiza. (Mate. 24:37-39; Luka 21:34) Mwaviyo, titenere kuwonesesa kuti tiŵika vinthu vakukhumbika panthazi, kupatuwa nyengu yakunozgeke ndi kugwira nawu nchitu ya kupharazga nyengu zosi. (Ŵafi. 1:10) Titesesa kuja umoyo wambula kukhumba vinandi ndipuso titcheŵa kutangwanika ukongwa ndi charu.—1 Ŵako. 7:31.
4. Nchifukw wuli sonu ndipu tikhumbika kulutirizga kuŵika dankha vinthu vakwenere panthazi?
4 Asani nyengu njimana, munthu wazeru wachita dankha vinthu vakukhumbika ukongwa. Mwakuyeruzgiyapu, asani wavwa kuti kutuza chiphempu chakofya ukongwa, iyu wagwiriskiya nchitu nyengu ndi nthazi zaki pakupanga manozgeru nga mo wangataskiya banja laki ndipuso wachenjeza azengezgani ŵaki. Walekeza dankha kuchita vinthu vambula kukhumbika ukongwa. Nyengu yo yajaku kuti chimphepu cha Haramagedone chizi yafupika. (Zefa. 1:14-16; 1 Ŵako. 7:29) Kuti tijitaski ndipuso titaski anyidu wo atitivwisiya, nyengu zosi titenere kujiphwere ukongwa taŵeni kweniso mo tisambizgiya, kaya ndi mukati pamwenga kubwalu kwa mpingu. (1 Timo. 4:16) Kupona kwidu kuthemba pa kuŵika uteŵeti kuja chinthu chakwamba pa umoyu widu.