Kabuku Kasonu ko Tazamugaŵiya
1. Kumbi tigaŵiyengenji mu mwezi wa November, nanga kabuku kenaka ke ndi chilatu wuli?
1 Pa unganu widu wa chigaŵa wa 2009, wa mutu wakuti: “Khalani Maso!” pangutuzika kabuku kakuti The Bible—What Is Its Message? [Kumbi Bayibolo le ndi Uthenga wuli?] Mipingu yosi pacharu chapasi yazamugaŵiya kabuku kenaka m’mwezi wa November, ndipu kazamuja kakwamba kugaŵiya kabuku kenaka. Kumbi kabuku kenaka, kazamuwovya wuli ŵanthu mu chigaŵa chidu? Ŵanthu anandi aziŵa vinthu vimanavi vakukwasana ndi Bayibolo, ukongwa wo ŵe mu visopa va Chikhristu cha. Mwaviyo, pa peji 3 la kabuku yaka, pakonkhoska “mwakudumuwa vo ve m’Bayibolo.”
2. Kumbi kabuku kenaka tazakukagaŵiya wuli?
2 Mo Tazakukagaŵiya: Tingakamba mazu ngakuyanana ndi yanga: “Tikhumba kuziŵa maŵanaŵanu nginu pa vo lemba ili likamba. [Ŵerengani 2 Timote 3:16.] Ŵanthu anandi wo tikambiskana nawu akoliyana nangu mazu yanga, ndipu anyaki awona kuti Bayibolo ndi buku lamampha ukongwa. Kumbi imwi mutiliwona wuli Bayibolo? [Lindizgani kwamuka.] Mwambula kuphwere kanthu za vigomezgu va visopa vidu, te ndi vifukwa vamampha vakuti tiŵerengengi Bayibolo pakutija. [Ŵerengani mazu ngakwamba ngo nge pa peji 3.] Po muŵerenga fundu zakudumuwa za m’Bayibolo zo zisanirika mu kabuku yaka, muwonengi so fundu zinyaki zakukondwesa: Bayibolo le ndi nkhani ndipuso mutu umoza.”
3. Kumbi ndi nthowa inyaki niyi yo tingagwiriskiya nchitu, ukongwa mu chigaŵa cho ŵanthu anandi ŵe mu chisopa cha Chikhristu cha?
3 Sachizgu linyaki la mo mungachitiya, ukongwa asani mupharazga ku ŵanthu wo ŵe mu chisopa cha Chikhristu cha: “Tikhumba kuziŵa maŵanaŵanu nginu pa vo vikulembeka m’Bayibolo pa lemba ili. [Ŵerengani Sumu 37:11.] Kumbi muŵanaŵana kuti charu chazamuja wuli asani uchimi wenuwu wazifiskika? [Lindizgani kwamuka.] Ichi nchakuwoniyapu cha vinthu vamampha ndipuso vakuchiska vo ŵanthu amitundu yosi kweniso wo ŵe ndi chivwanu angasaniya m’Bayibolo.” Ŵerengani mazu ngakwamba ngo nge pa peji 3, ndipu pavuli paki agaŵiyeni kabuku.
4. Kumbi tingakagwiriskiya nchitu wuli kabuku kenaka kuti tiyambisi sambiru la Bayibolo?
4 Yambisani Sambiru la Bayibolo: Asani taweriyaku, tingamukumbuska mweneku wa nyumba vo tingukambiskana ulendu wakwamba ndipu tingakambiskana nayu ndimi yimoza pamwenga ziŵi pa nkhani yo tikukambiskanapu kali, mwakugwiriskiya nchitu mafumbu ngo nge pakumaliya pa nkhani yo tingusankha. Pamwenga asani tikhumba kumulongo pa nyengu yeniyo, buku la Kodi Bayibolo Limaphunzitsa Chiyani, tingaŵerenga nayu peji lakumaliya la kabuku kenaka, pavuli paki tingamupaska buku ndi kumufumba mutu wo wamukondwesa ndipu tingakambiskana nayu ndimi yimoza pamwenga ziŵi kutuliya pa mutu weniwo. Tiyeni tosi tizitomu chigaŵa mwakukwana pakugaŵiya kabuku kenaka m’mwezi wa November!