Kumbi Musambira Vosi vo Mungafiska Kutuliya Kwaku Yehova?

1. Kumbi Yehova watikuwona wuli kusambira?

¹ Yehova, ‘Musambizi widu Mura’ wakhumba kuti tisambiri. (Yesa. 30:20) Iyu wangwamba kusambiza wati walenga Mwana waki wakwamba. (Yoha. 8:28) Yehova wanguleka cha kusambiza Adamu wati wagaruka, kweni wangupaska ŵanthu ambula kufikapu marangu mwachanju.​—⁠Yesa. 48:​17, 18; 2 Timo. 3:​14, 15.

2. Kumbi ndi nchitu yakusambiza ŵanthu vinthu wuli yo yichitika pasonupanu?

² Mazuŵa nganu Yehova walongozga nchitu yikulu yakusambiza mu mbiri yosi ya ŵanthu. Nge mo wangukambiya mchimi Yesaya, ŵanthu mamiliyoni nganandi pacharu chapasi andonde ku “phiri la nyumba ya Ambuya [Yehova].” (Yesa. 2:⁠2) Kumbi nchifukwa wuli titenere kundonde ku phiri la nyumba yaku Yehova? Kuti Chiuta wakatilunguchizgi nthowa zaki, kuti tikasambiziki ndi Yehova. (Yesa. 2:⁠3) Mu chaka cha uteŵeti cha 2010, Akaboni aku Yehova angumaliya maora ngakujumpha 1.6 biliyoni pa nchitu yakupharazga ndi kusambiza ŵanthu uneneska wa m’Bayibolo. Kweniso, Akaboni aku Yehova asambizika mu mipingu yakujumpha 105,000 pacharu chosi chapasi, sabata yeyosi, ndipuso muŵanda wakugomezgeka ndi wazeru wapanga mabuku ngachikhristu ngakusambiriya, mu vineneru vakujumpha 500.

3. Kumbi imwi mwayanduwa wuli ndi masambiru ngo Yehova wapereka?

³ Yanduwani Mwakukwana: Tayanduwa ukongwa ndi masambiru ngakutuliya kwaku Chiuta yanga! Tasambira kuti Chiuta we ndi zina ndipuso kuti watitiŵanaŵaniya. (Sumu 83:18; 1 Pet. 5:​6, 7) Taziŵa kwamuka kwa mafumbu nganyaki ngakukhumbika ukongwa ngakukwaskana ndi umoyu nge ngakuti: Nchifukwa wuli ŵanthu asuzgika ndi kufwa? Kumbi ndingasaniya wuli likondwa lenechu? Kumbi chilatu cha umoyu nchinthu wuli? Yehova watitisambiza so mo tingajaliya ndi mijalidu yamampha kuti ‘vinthu vitiyende umampha.’​—⁠Yos. 1:⁠8.

4. Kumbi pe mwaŵi wa masambiru nganyaki nanga ngo ateŵeti aku Chiuta angalonde, ndipu nchifukwa wuli titenere kusambira vosi vo tingafiska kutuliya kwaku Yehova?

⁴ Kweniso, Yehova wachitiska kuti paje masambiru ngapade kuti ngawovyi ateŵeti ŵaki anandi kusazgiyaku uteŵeti wawu. Pa peji 4 mpaka 6 palembeka masambiru ngo ŵanthu anyaki angachita. Chinanga kuti tingatondeka kuchitaku masambiru nganyaki ngo ngalembeka, kumbi tigwiriskiya nchitu mwakwenere masambiru ngakutuliya kwaku Chiuta ngo tilonde? Kumbi ŵana a sukulu wo asambizi ŵawu kweniso ŵanthu anyaki atiŵachiska kuti achiti masambiru ngapachanya, titiŵawovya kuti aje ndi vilatu vauzimu ndi kukhumba masambiru ngakutuwa kwaku Chiuta, ngapachanya ukongwa kuruska masambiru ngosi? Kusambira vosi vo tingafiska kutuliya kwaku Yehova kutiwovyengi kuti tije ndi umoyu walikondwa sonu kweniso kuzija ndi umoyu wamuyaya kunthazi.​—⁠Sumu 119:105; Yoha. 17:⁠3.

Mwaŵi wa Masambiru wo Usanirika mu Gulu Laku Yehova

Sukulu Yakusambiza Kuŵerenga ndi Kulemba

• Chilatu Chaki: Kusambiza ŵanthu kuŵerenga ndi kulemba alinga kuti aŵerengengi ndi kusambira Bayibolo pakuŵija ndipuso kuti asambizengi ŵanthu uneneska.

• Nyengu yo Yito: Malingana ndi po akusambira achitiya.

• Ko Yichitikiya: Nyumba ya Ufumu yinu.

• Wo Angasambira: Apharazgi kweniso wo angayanja.

• Mo Mungalembese: Ŵara a mpingu anozga kuti paje makilasi yanga asani pa mpingu pe ŵanthu wo akhumbika kusambira ndipu atiŵachiska kuti ayambi kusambira.

Sukulu ya Uteŵeti Waku Chiuta

• Chilatu Chaki: Kovya apharazgi kuti aje apharazgi ndi asambizi alusu a uthenga wamampha.

• Nyengu yo Yito: Ya nyengu zosi.

• Ko Yichitikiya: Nyumba ya Ufumu yinu.

• Wo Angalembesa: Apharazgi wosi. Kweniso wosi wo awungana ndi mpingu mwakujalikiskika, wo azomerezga vo Bayibolo lisambiza, ndipuso wo achita vinthu vakukolerana ndi fundu zachikhristu pa umoyu wawu.

• Mo Mungalembese: Kambiskanani ndi wakuwonere Sukulu ya Uteŵeti Waku Chiuta.

Makilasi Ngakusambiza Chineneru Chinyaki

• Chilatu chaki: Kusambiza apharazgi mo angapharazgiya uthenga wamampha mu chineneru chinyaki.

• Nyengu yo Yito: Myezi yinayi pamwenga yinkhondi. Kanandi sukulu iyi yichitika pa Chisulu mulenji kwa ora limoza pamwenga maora ngaŵi.

• Ko Yichitikiya: Nyengu zinandi yichitikiya pa Nyumba ya Ufumu yo yepafupi.

• Wo Angalembesa: Apharazgi a jalidu lamampha wo akhumba kupharazga mu chineneru chinyaki.

• Mo Mungalembese: Sukulu iyi yinozgeka ndi ofesi ya nthambi asani njakukhumbika.

Kuzenga Nyumba za Ufumu

• Chilatu Chaki: Kuzenga ndi kunozga Nyumba za Ufumu. Iyi ndi sukulu cha, kweni ŵanthu wo atijipereka asambizika malusu ngakupambanapambana ngo angagwiriskiya nchitu pakovya nchitu yakuzenga.

• Nyengu yo Yito: Malingana ndi mo vinthu viliri pa umoyu wa munthu yo wajipereka.

• Ko Yichitikiya: Kwekosi ko munthu wangachiteŵete mu Chigaŵa cha Komiti Yakuzenga ya chigaŵa cho. Ŵanthu anyaki akujipereka angapempheka kuti akawovyi pa nchitu yakovya ŵanthu mu malu ngo mwachitika masoka nga chilengedu.

• Viyeneresu: Atenere kuja abali ndi azichi akubatizika ndipuso wo azomerezgeka ndi wupu wa ŵara a mpingu. Angaja kuti ŵe ndi lusu kali pamwenga cha.

• Mo Mungalembese: Mutenere kusayina fomu Yofunsirapo Ntchito Yomanga Nyumba za Ufumu (S-82), yo mungachito ku ŵara a mpingu winu.

Sukulu ya Uteŵeti wa Upayiniya

• Chilatu Chaki: Kovya apayiniya kuti ‘afiski uteŵeti wawu.’​—⁠2 Timo. 4:⁠5.

• Nyengu yo Yito: Masabata ngaŵi.

• Ko Yichitikiya: Ofesi ya nthambi ndiyu yisankha; nyengu zinandi yichitikiya pa Nyumba ya Ufumu yapafupi.

• Viyeneresu: Wo achita upayiniya wa nyengu zosi kwa chaka champhumphu.

• Mo Mungalembese: Mlembi wa mpingu waziŵiska apayiniya akwenere kuti asere sukulu iyi.

Sukulu ya Ateŵeti a pa Beteli Asonu

• Chilatu Chaki: Sukulu iyi, yichitika kuti yiwovyi wo ŵaza waka sonu kuti aziŵiriyi umoyu ndipuso uteŵeti wa pa Beteli.

• Nyengu yo Yito: Yichitika kwa ora limoza sabata yeyosi kwa myezi 4.

• Ko Yichitikiya: Pa Beteli.

• Viyeneresu: Atenere kuja ateŵeti a pa Beteli pamwenga ateŵeti akujipereka ambula kujaliska wo ateŵete kwa kanyengu (kwa chaka chimoza pamwenga kujumpha).

• Mo Mungalembese: Wo ŵe pa banja la Beteli atenere kusere sukulu iyi.

Sukulu ya Uteŵeti wa Ufumu

• Chilatu Chaki: Kusambiza ŵara ndi ateŵeti akovya kuti aphwere maudindu ngawu ngo akupaskika ndi gulu. (Machi. 20:28) Sukulu iyi yichitika asani papita vyaka, mwakulingana ndi ulongozgi wa Wupu Wakulongozga.

• Nyengu yo Yito: Sukulu ya ŵara yaja yichichitika kwa zuŵa limoza ndi hafu ndipu ya ateŵeti akovya yaja yichichitika kwa zuŵa limoza.

• Ko Yichitikiya: Kanandi yichitikiya pa Nyumba ya Ufumu yapafupi pamwenga pa Malu Ngakuchitiyapu Unganu.

• Viyeneresu: Atenere kuja ŵara pamwenga ateŵeti akovya.

• Mo Mungalembese: Wakuwonere dera ndiyu wakambiya ŵara ndi ateŵeti akovya akwenere kuti asere sukulu iyi.

Sukulu ya Ŵara a Mpingua

• Chilatu Chaki: Kovya ŵara kuti aphweriyengi umampha maudindu ngawu mu mpingu.

• Nyengu yo Yito: Mazuŵa ngankhondi.

• Ko Yichitikiya: Ofesi ya nthambi ndiyu yisankha malu; kanandi paja pa Nyumba ya Ufumu pamwenga Malu Ngakuchitiyapu Unganu.

• Viyeneresu: Atenere kuja ŵara.

• Mo Mungalembese: Ofesi ya nthambi ndiyu yikambiya ŵara akwenere.

Sukulu ya Akuwonere Vigaŵa ndi Madera Pamoza ndi Awolu Ŵawub

• Chilatu Chaki: Kovya akuwonere dera ndi akuwonere chigaŵa kuti ateŵetiyengi mipingu mwakuko mtima ukongwa ndipuso kuti ‘ŵatakatakiyengi mu mazu ndi chisambizu.’ Kweniso kuti aphweriyengi ŵanthu m’chigaŵa chawu.​—⁠1 Timo. 5:17; 1 Pet. 5:​2, 3.

• Nyengu yo Yito: Myezi yiŵi.

• Ko Yichitikiya: Ofesi ya nthambi ndiyu yisankha.

• Viyeneresu: Atenere kuja akuwonere dera pamwenga akuwonere chigaŵa.

• Mo Mungalembese: Ofesi ya nthambi ndiyu yidana akuwonere madera ndi vigaŵa pamoza ndi awolu ŵawu.

Sukulu ya Bayibolo ya Abali Ambula Kutoc

• Chilatu Chaki: Kovya ŵara ndi ateŵeti akovya ambula kuto kuti anozgeke kuja ndi maudindu ngakusazgikiyaku. Anandi wo amaliza sukulu iyi azamutumika kuchiteŵete ko kukhumbika ateŵeti mu charu chawu. Ndipu amanavi akhoza kutumika ku charu chinyaki asani angaziŵiska ofesi ya nthambi kuti mbakunozgeka.

• Nyengu yo Yito: Myezi yiŵi.

• Ko Yichitikiya: Malu ngo ofesi ya nthambi yasankha; kanandi paja pa Malu Ngakuchitiyapu Unganu pamwenga pa Nyumba ya Ufumu.

• Viyeneresu: Abali ambula kuto a vyaka vapakati pa 23 ndi 62 ndipuso ambula kutamatama wo akhumba kuteŵete abali ŵawu ndipuso wo akhumba kusazgiyaku nchitu yakupharazga yo yichitika ndi gulu laku Yehova. (Marko 10:​29, 30) Atenere kuteŵete nge ŵara pamwenga ateŵeti akovya kwambula kulekezga kwa vyaka viŵi.

• Mo Mungalembese: Asani sukulu iyi yichitika mu charu chinu, unganu wa ŵanthu wo angayanja kulembeska mu sukulu iyi uchitika pa unganu wadera. Pa unganu uwu ndipu pakonkhoskeka vinandi vakukwaskana ndi sukulu iyi.

Sukulu ya Bayibolo ya Akhristu Akutoranad

• Chilatu Chaki: Kusambiza mwapade ŵanthu akutorana kuti agwiriskikiyi nchitu mwakukwana ndi Yehova ndipuso gulu laki. Anandi wo amaliza masambiru yanga azamutumikanga m’charu chawu mu vigaŵa vo vikhumbika ukongwa chovyu. Ndipu amanavi azamutumikanga ku vyaru vinyaki asani angazikambiya ofesi ya nthambi kuti mbakunozgeka.

• Nyengu yo Yito: Myezi yiwi.

• Ko Yichitikiya: Makilasi ngamanavi ngakwamba ngachitikiya ku Likulu la Masambiru la Watchtower ku Patterson, New York, U.S.A. Pavuli paki sukulu iyi yazamuchitikanga mu malu ngo ofesi ya nthambi yingasankha, malu yanga ngakhoza kuja Malu Ngakuchitiyapu Unganu pamwenga pa Nyumba ya Ufumu.

• Viyeneresu: Ŵanthu akutorana a vyaka va pakati pa 25 ndi 50 ambula kutamatama wo akhoza kuchiteŵete kwekosi ko kukhumbika chovyu ndipuso wo ŵe ndi mzimu wakuti: “Ndini panu! Nditumeni.” (Yesa. 6:⁠8) Kweniso atenere kuja mu nthengwa kwa vyaka pafufupi viŵi ndipuso wo ŵe mu uteŵeti wanyengu zosi kwa vyaka pafufupi viŵi kwambula kulekezga.

• Mo Mungalembese: Asani sukulu iyi yichitika mu charu chinu, unganu wa ŵanthu wo akhumba kulembesa uchitika pa zuŵa la unganu wapade. Pa unganu uwu ndipu pakonkhoskeka vinandi vakukwaskana ndi sukulu iyi.

Sukulu ya Watchtower ya Giliyadi

• Chilatu Chaki: Kovya apayiniya ndi ateŵeti a nyengu zosi kuti asambiri uteŵeti wa umishonale.

• Nyengu yo Yito: Myezi yinkhondi.

• Ko Yichitikiya: Likulu la Masambiru la Watchtower ku Patterson, New York, U.S.A.

• Viyeneresu: Ŵanthu akutorana wo ajumpha vyaka vitatu kutuliya pa nyengu yo akubatizikiya ndipu aje ndi vyaka va pakati pa 21 ndi 38 pa nyengu yo apereke fomu yakwamba yakufumbiya sukulu iyi. Atenere kuziŵa kuŵereŵeta Chingelezi, wo aja vyaka pafufupi viŵi munthengwa ndipuso ateŵeti a nyengu zosi kwa vyaka pafufupi viŵi kwambula kulekezga. Atenere kuja ambula kutamatama. Apayiniya wo ateŵete ku charu chinyaki (kusazgapu wo ateŵete nge amishonale); akuwonere dera ndi chigaŵa; ateŵeti a pa Beteli; ndipuso wo akumaliza kali Sukulu Yakusambiza Uteŵeti, Sukulu ya Bayibolo ya Abali Ambula Kuto ndipuso Sukulu ya Bayibolo ya Akhristu Akutorana akhoza so kulembesa asani afiska viyeneresu vosi.

• Mo Mungalembese: Unganu wa ŵanthu wo angayanja kulembesa sukulu iyi uchitikengi pa unganu wachigaŵa ku nthambi zakusankhika. Pa unganu uwu ndipu pakonkhoskeka vinandi vakukwaskana ndi sukulu iyi. Asani mukhumba kulembesa sukulu iyi, mukhoza kulembe kalata ku ofesi ya nthambi kuti muziŵi vinandi asani unganu uwu wachitika cha pa maunganu nga chigaŵa nga m’charu chinu.

Sukulu ya Ŵanthu a mu Komiti ya Nthambi ndi Awolu Ŵawu

• Chilatu Chaki: Kovya wo ateŵete mu Komiti ya Nthambi kuti aphweriyengi umampha nchitu yawu yakuwonere nyumba za Beteli, kuphwere nkhani za uteŵeti zo zikwaska mipingu ndipuso kuwonere madera ndi vigaŵa vo apaskika kuti aviphweriyengi kweniso nchitu yakufwatuliya mabuku, kusindikiza, kungatumiza mu vigaŵa vakupambanapambana ndipuso kuwonere madipatimenti ngosi ngo nge pa nthambi yawu.​—⁠Luka 12:48b.

• Nyengu yo Yito: Myezi yiŵi.

• Ko Yichitikiya: Likulu la Masambiru la Watchtower ku Patterson, New York, U.S.A.

• Viyeneresu: A mu Komiti ya Nthambi pamwenga Komiti ya Charu pamwenga so wo aŵikika waka pa maudindu yanga.

• Mo Mungalembese: Wupu Wakulongozga ndiwu udana abali akwenere ndi awolu ŵawu.

[Mazu nga m’mphata]