Bokosi la Mafumbu

◼ Kumbi ndiyani yo watenere kulemba mu kabokosi kakudanisiya Mabuku ko Kasanirika pa Magazini ndi pa Intaneti?

Nyengu zinandi magazini ngidu ngaja ndi kabokosi ko munthu wangalemba ndi kukatumiza ku ofesi ya nthambi kuti wadanisi buku pamwenga kuti Akaboni aku Yehova amuyende. Kweniso, adiresi yidu ya pa Intaneti ya www.jw.org yingagwiriskikiya nchitu pakupempha sambiru la Bayibolo. Vinthu ivi vitovya ŵanthu anandi kuti asambiri uneneska. Kweni pasanirika masuzgu asani mupharazgi wagwiriskiya nchitu vinthu ivi kuti abali ŵaki alonde mabuku pamwenga kuti munthu munyaki waŵayende.

Anyaki wo alondiyapu mabuku kwambula kungadanisa kutuliya ku ofesi ya nthambi, adandawula kuti gulu lidu litiŵachitiya phuzu ndipuso likuŵaŵika pa gulu la ŵanthu wo litiŵatumiziya mabuku. Pasanirika kuti apharazgi wo apempheka kuti aluti ku munthu yo wangupempha cha paku iyu yija kuti amuyende achita soni asani munthu yo angumuyende wanguŵakalipiya. Mwaviyo, munthu wakunweka ndiyu watenere kulemba pa adiresi yidu ya pa Intaneti pamwenga pa kabokosi kakudanisiya mabuku ndipu mupharazgi wangamulembiyanga cha. Asani ofesi ya nthambi yaziŵa kuti mupharazgi ndiyu watumiza pemphu ili m’malu mwa munthu munyaki, yiwu achitengepu kanthu cha.

Sonu, kumbi tingamuwovya wuli mwauzimu m’bali widu pamwenga munthu yo tiziŵana nayu? Asani mukhumba kuti walonde mabuku, mungamutumiziya waka nge chawanangwa. Asani walongo linweka ndipu wakhumba kuti Akaboni amuyende kweni imwi muziŵa cha mo mungakumaniyana ndi ŵara a mpingu wa ko waja, mutenere kupereka fomu ya Kaonaneni ndi Wachidwi Uyu (S-43) ku mlembi wa mpingu winu yo wayiwonengi so ndi kuyitumiza ku ofesi ya nthambi. Kweni asani wakunweka yo we ku jeri pamwenga ku chipatala, mungalembiyanga ofesi ya nthambi m’malu mwaki cha. Kweni mungamuchiska kuti wakumani ndi abali wo ayende malu ngeningo pamwenga kuti walembe yija ku ofesi ya nthambi.